2 John 1
1
1Ukut latat Elder‑meng pinguut Kiyaghneghem nakmikegkaanun aghnamun, avaqutaanunllu ipapigmeng piniqegkamnun. Ellnginaanghitunga piniqistezi, qamagllutengllu liisimakelghiit ipapighqelleghmeng piniqiisi, 2qayughllak ipapighqelleq ilumnnilnguq. Taana ipapighqelleq ilumnnisaghqaaguq quunperugllak.
3Kayusilleq, nangllegyulleq, nekeggmelleqlu whangkunnillequt kiyaghtengnguluta ipapighqelleghqunllu piniqelleghqunllu. Taakut Kiyaghneghmeng Atameng, Jesus Christ‑amengllu, Atam Ighneghaneng pinguut.
Ipapighqelleqlu Piniqelleqlu
4Quyapigtekaagunga nagaqughluki ilangi avaqutaghten kiyaghtengnguniluki ipapighqelleghqun tawateghpigaq Atam qelellghatun whangkuta. 5Aghnami, piimken piniqututelta. Taana nutaghaanghituq qelghuusaq latatkegkegka elpenun; qelghusaaguq ima piinlighyuggaalleghmeng. 6Una piniqellghuuq, qaatkutelleq Kiyaghneghem qelghuusaanun. Qelghuusaq nagaquqaghsi piinlighyuwhaalleghmeng unanguuq: qamagllusi piniqullusi kiyaghtek.
Anguyakilghiit Christ‑ameng
7Uglapiglleghhii puughtista nunami mingilluni ayuquq. Tamaakut yuget apeghnaanghitaat Jesus Christ‑a yuguluni allgeqaaniluku qayughllak ugpeqigataat. Tawatelnguq yuuk puughtistenguuqlu, anguyakilghiinguuqlu Christ‑ameng. 8Enkaam kelengalusi, pegsaqunaan qepghaatkaghsi akileghtuusaghqaghsi qamaglluku allgeghsaghqaqaghsi.
9Kitum alngunak qaasghuskumiki apeghtuusii Christ‑am Kiyaghneq ellnganinneghituq. Iwernga kitum alngunak atuqumanginaqumiki apeghtuusii Christ‑am, Atallu Ighneqlu ellnganituk. 10Kitum alngunak apeghtughyaghtuqangisi atuqegpenaki Christ‑am apeghtuusii, aqelqangllaghpenaan nalighmeng quyakegpenaan, 11qayughllak kitum alngunak quyakegkumigu qepghalgusiqallghuughlleqaa seghleghmeng qepghaqaaneng.
Naangniitet
12Apeghyaghqaghllagughngaaghma elpesinun latatgun piyunghitanka. Iwernga sunanguq laalighfiklamsi, aleghquunnayaghtukut gginasaghquulluta, enkaam quyateghllagnayaghtukut.
13Avaqutiita nakmikegkam aakaghpesi piniqiisinguq.
© 2018, Wycliffe Bible Translators, Inc. All rights reserved.