2 Corinthians 6
6
1Qepghalgutkututemnneng Kiyaghneqlu, taawa kayemamsi Kiyaghneghem nangllegtallgha tuguklighpenaan temngitwhanguluku. 2Kiyaghneq pikaaguq,
“Pilleghqaghlluwaaghmi nagaquqaqamken,
aghneghani yugulillghem kayusiqaqamken.”
Ungipaatamsi, maatenguuq Kiyaghneghem pilleghqaghlluwaagha; nagatek, maatenguuq aghnegha yugulighillghem! 3Kiyaghtaallemteggun naagsaghanglliigataput yuget, seghlequufqaan pisqelluku qepghaqaghput Ataneghmun. 4Iwernga sallemteggun tamaghhaakun liigikestaqukut yugnun Kiyaghneghmun qepghaghtekniluta. Tamaaken apalluqluku nuqetutimallemteggun suflughtaghaqaput seghleliillghet, piyaqliillghet, ikfiqellghet. 5Qevutquqaagukut, anusimingllaqaagukut, uglaatellengegkaagukutlu. Ughleghiiqaagukut, qavalqumangitukut, iyataqaagukutlu. 6Liigikestengnguukutlu Kiyaghneghmun qepghaghtekutfut pinitun kiyaghtaallemteggun, liisimakillemteggun, nuqetutillemteggun, nangllegtallemteggun, piniqipillemteggun, Agleghnalghiignekun Taghneghagnekun. 7Qepghaatngwaaghput Kiyaghneq ungipaqellemteggun ipapilleq. Atuqaqaghput Kiyaghneghem aghtughyaghqaanghillgha, elqughutngalleqlu guututkelluku aghenqignemnnunllu saghumignemnnunllu. 8Quulvallengaqukutlu ukavaghllengaqukutlu; seghlequughsighaqukutlu usuqellengaqukutlu. Iqlengalghiinguniiqiinkut, iwernga akuziiqukut ipapigmeng. 9Yuget nallukniqiinkut, naqamllu liisimakluta; uglaghngaan tuquvzighaqukut, iwernga paninang unguvaakut. Aghyuughyaghngiinkut, tuqusigatiinkut. 10Qivghungughngaamta, naqamllu quyangaghllawaaqukut; aklumaghngaamta, naqamllu aklungighistaqaput yuget; avaqraggiiteghngaamta, naqamllu pilwaaqukut sameng tamaghhaaneng.
11Ugpeqaalgutemnni, Corinth‑eghmiini, ipapighqullusi ayuqamsi. Ungipaatamsi piniqepigtamsi. 12Nuqneghusimangitamsi piniqellemnneng, iwernga elpesinguut nuqneghutikat piniqilleghpesineng whangkunnun. 13Maaten aleghqughamsi avaqutaqepiglleghhiistun, piniqeqeghtikut katam whangkuta piniqellemtestun elpesi.
Kelengasaalleq Ugpeqaanghilnguut Ayuqniighqillghitneng
14Inglukegpenaki ugpeqaanghilnguut. Elqughutngallghenkuk seghleghenkuk inglukutepagningituk. Nighugenkuklu mamlegenkuklu qerngaghmetepagningituk. 15Christ‑am itagnaqsaghqaqenghitngwaaghaa Tughneghaq. Ugpeqat piyukellghit allanguut ugpeqaanghilngughneng. 16Kiyaghnengllaqat manigughyaghqaanghitut Kiyaghneghem Temple‑ngani. Qayughllak whangkuta Temple‑kiinkut unguvalghiim Kiyaghneghem, Kiyaghneq pikaalghii, “Ellngitnillequngallu akulngitnillequngallu; Kiyaghneqelleqaatnga, ellngitlu yukelleqanka.”
17“Tamaaken apalluqluku Ataneq pikaalghii,
Uniteki tamaakut yuget, aaftek ellngitneng.
Saaftegpenaki ukmanginneghilnguut;
enkaam tuguklighlleqamsi.
18Atakelleqaghpesinga,
enkaam elpesi ighneqelleqamsillu panikelleqamsillu,
piiq Ataneq Aghtughyaghqaghhaanghilnguq.”
© 2018, Wycliffe Bible Translators, Inc. All rights reserved.
