1 Thessalonians 1
1
1Ukut latat Paul‑meng, Silas‑meng, Timothy‑mengllu pinguut, Thessalonica‑ghmiit ugpeqiitnun Kiyaghneghem Atam pingi Atanghemllu Jesus Christ‑am. Kiyaghneghem nangllekillghallu nekeggmellghallu elpesinillik.
Thessalonica‑ghmiit Kiyaghtaallghatlu Ugpellghatlu
2Quunpeng iqamsiqayugvikaqaghput Kiyaghneq tamaghhaghpesinun, iiwlengllu yughaatkaqamsi. 3Yughanemta Kiyaghneghmun Atamnnun neqamikaqaghput qepghalleghsi ugpelleghpesigun, qepghalleghsi piniqelleghpesigun. Iqamsiqayugvikaqaghputlu ugpelleghsi nagneghuskesi iknaqluku qayughllak sighimangulghiisi Atanemteggun Jesus Christ‑akun. 4Ugpeqaalgutemnni, Kiyaghneghem piniqegkaani, liisimakaghput nakmikegkaqiisi 5qayughllak Pinilghiineng Ungipaneng tagitaqngamsi, akuziteraaghinaghteggun pimangitukut, iwernga aghtughyaghqaanghilleghqunllu, Agleghnalghiignekunllu Taghneghagnekun pikaagukut. Enkaam ugpeqasi Pinilghiit Ungipat ipangutangi. Liisimakaghsillu naten kiyaghtekaatfut elpesinilluta, tawaten kayusiinnalusi kiyaghtekaagukut. 6Enkaam whangkutestunllu Ataneghtunllu lliightek. Qaywa ikfiqeghllagngaaghpesi, tuguklighasi Pinilghiit Ungipat quyamallelighlusi Agleghnalghiigneng Taghneghagneng. 7Enkaam usputaaghtusi tamaghhiitnun ugpeqanun Macedonia‑millu Achaia‑millu. 8Atanghem ungipaa mingitnguuq elpesineng Macedonia‑millu Achaia‑millu. Ugpeqilleghsillu Kiyaghneghmeng liitaat tamangani. Enkaam whangkuta sameng pinghisaghngaamteggu ugpeqilleghsi, qayughllak siingenllu yuget nagaquumaat. 9Tamangani aapghaqaat upughatilleghllagsi whangkunneng elpesinitnguluta. Qiivumanilusillu unguvalghiimun Kiyaghnepigmun qepghaannaluku, peglluki kiyaghnengllaqat. 10Utaqaaqaghsillunguq Kiyaghneghem Ighnegha, Jesus, tagiyaghqaq qilagmeng. Ellnganguuq Kiyaghneghem unguvaghtekaa tuqulleghmeng, yuguliiqiinkutlu Kiyaghneghem sakraallghaneng kaasaghqameng.
© 2018, Wycliffe Bible Translators, Inc. All rights reserved.
