1 Corinthians 13
13
Piniqelleq
1Akuzikayuguyaghngaaghma yugetlu yaqulgetlu akuzillghistun, temngi tengngaagtaghllequnga nalighmeng lengaaghtaghllequnga piniqinghilkuma. 2Uuknaliqegkayugughngaaghma, liigikegkayugughngaamki aliinneghilnguut qamaglluki, liisimalleq qamagtekaqsaghngaamkun, ugpeqillelgughngaaghma naayghanun nuugtisighqameng, pitngunaanghitunga piniqinghilkuma. 3Tuunyaghngaamki qamaglluki sanka aklumalghiinun, nalighmeng paneghtesaghngaaghma ungipaqilqa Pinilghiineng Ungipaneng apalluqluku, allgeghunnaanghitunga piniqinghilkuma.
4Piniqelleq nuqenneghtuuqlu, nangllegtaghtuqlu; piniqelleq aqinangituq, nalighmeng yamrrangituq, nalighmeng aangaayugneghituq. 5Piniqelleq seghleghyugutngituq, nalighmeng ellnginaayugneghituq. Piniqelleq sagiqigatuq piyukelleghmitun pinaluni, qikeghqungigatuq, nalighmeng neqamikingigatuq anaggutelleghmeng. 6Piniqellghem quyasiqigataa seghleq, yeghlegi quyasiqaqaa ipapilleq. 7Piniqelleq ataasiighmetuq sangwa sayaghngaan. Iiwleng ugpeqingaaq, iiwleng neghyukingaaq, iiwleng nuqenneghtuuq.
8Piniqelleq kenlengilnguq. Uuknaliqellghet kenletghuusaghqaagut; allastun akuzillghet taaqsaghqaagut; liisimalleq kenletghuusaghqaaguq. 9Qayughllak tunusagput liisimalleqlu uuknaliqelleqlu iighwinneghilnguuk. 10Iwernga iighwilnguq kaaskan, qamaglluteng iighwinneghilnguut aviighughsaghqaagut.
11Taghnughhaalunga akuzikayuguyaghtunga, sumeghtaghaqayuguyaghtunga, liigikegkayuguyaghtunga taghnughhaghestun, iwernga yugughsalghiinga taghnughhaghestun pinanightunga. 12Liigikelleghput Kiyaghneghmeng iighwinneghituq, katam tawatetuq esghalghiistun taghneghaghquutelugkun. Qakuqaaqun liigikngwaaghyaghqaghput Kiyaghneq qayughllak esghaghlleqaghput gginasaghqughluku. Maaten liisimalqa iighwinneghituq. Ilangani aghneghem liisimalqa iighwighyaghqaaguq katam tawaten Kiyaghneghem liisimakngwaaqanganga iighwighma.
13Enkaangam ukut pingayut kenletghuunnaanghitut: ugpelleq, sighimalleq, piniqelleq; iwernga piniqellghuuq angelleghpigaq.
© 2018, Wycliffe Bible Translators, Inc. All rights reserved.