यूहन्ना 21
21
येशू सात चेलन्हकठे देखपर्लक
1तबदोस्र येशू तिबेरियास समुद्रक#२१:१ तिबेरियास समुद्र: यी गालील समुद्रक और नाउँ हो (यूहन्ना ६:१), याकर और नाउँ गनेसरेत समुद्र हो (लूका ५:१), याकर और नाउँ किन्नरेत समुद्र हो (गन्ती ३४:११)। लग्घ चेलन्हकठे फेदोस्र देखपर्ल। यी कसिक हुइल् कलसे: 2सिमोन पत्रुस, दिदुमस कैजिना थोमा, गालील क्षेत्र काना सहरक नथानेल, जब्दियक दुइ भाइ छावन ओ और दुइ जन चेलावँ सँगसँग रलह। 3सिमोन पत्रुस हुँकन कल, “मै त मच्छी मार जाइटुँ।” हुँक्र हुँकहीन कल, “हम्र फे टुँहारसँग जाइटी।” हुँक्र जाक लाऊम चिहुर्ल, तर हुँक्र रातभर एकठो फे मच्छी मार नैसेक्ल।#लूक ५:५
4बिहान हुइना-हुइना ब्याला येशू किनारम ठह्र्याइल रलह। तर चेलावँ उहाँ येशू जो हुइट कैक नैचिह्न्ल।
5येशू हुँकन कल, “ऐ लर्काओँ, टुन्हकठे मच्छी बा कि?”
हुँक्र जवाफ देल, “अहँ, एकठो फे नैहो!”
6उहाँ हुँकन कल, “लाऊक दाहिनओर जाल फाँको तब भेटैबो।” येशूक कहल ठाउँम हुँक्र जाल फँक्ल, त अत्रा धेर मच्छी पर्ल, कि हुँक्र जाल तान नैसेक्ल।#लूक ५:६
7येशू जौन चेलह प्रेम करँट्, उ चेला पत्रुसह कल, “उहाँ त प्रभु हुइट।” “उहाँ त प्रभु हुइट” कलक सुन्टीकि सिमोन पत्रुस आपन बाहिरी लुगा लपेट्ल (काकरकि ऊ लुगा काहार रख्लह), ओ पहुँर्टी किनारम झट्ट पुगक लाग समुद्रम फन्कल। 8और चेलावँ लाऊम रल-रल जाल तान्क किनारम अन्ल। हुँक्र किनारसे धेर त नाहीँ, लगभग सय मिटर जत्रा दूर रलह। 9हुँक्र किनारम पुग्ल त आगीक भौगरम मच्छी ओ रोटी देख्ल।
10येशू हुँकन कल, “टुन्हक पक्रल मच्छीमसे डान्चे मच्छी आनो।”
11सिमोन पत्रुस लाऊम चिहुर्क बराबरा मच्छीले भरल जाल तान्क किनारम अन्ल। जम्माजम्मी एक सय त्रिपन्नठो मच्छी रलह। तर अत्रा धेर मच्छी रलसे फे उ जाल नैफाटल। 12येशू हुँकन कल, “आओ ओ खाओ।” चेलाहुँक्रमध्ये कुई फे “अप्न के हुइटी?” कैक पुछ्ना आँट नैकर्ल, काकरकि हुँक्र उहाँ प्रभु हुइट कैक पैल्हहेँ चिनरख्लह। 13येशू अइल, ओ हुँकन रोटी ओ मच्छी देल। 14मुवलमसे जिक उहाँ चेलन्हकठे देखपर्लक यी तीसर फ्यारा रह।
येशू ओ पत्रुस
15हुँक्र खाक सेक्ल त, येशू सिमोन पत्रुसह कल, “यूहन्नक छावा सिमोन, का टुँ जाट्टीसे महीह हिँकनसे धेर प्रेम कर्ठो?”
पत्रुस कल, “हजुर प्रभु, मै अप्नह प्रेम कर्ठुं कना बात अप्नह थाहाँ बा।”
येशू हुँकहीन कल, “म्वार पठ्रून चह्राओ।”
16उहाँ हुँकहीन द्वासर फ्यारा कल, “यूहन्नक छावा सिमोन, का टुँ महीह जाट्टीसे प्रेम कर्ठो?”
पत्रुस कल, “हजुर प्रभु, मै अप्नह प्रेम कर्ठुं कना बात अप्नह थाहाँ बा।”
उहाँ हुँकहीन कल, “म्वार भेँरीन्हक रेखदेख करो।”
17उहाँ हुँकहीन तीसर फ्यारा कल, “यूहन्नक छावा सिमोन, का टुँ महीह प्रेम कर्ठो?”
उहाँ हुँकहीन तीसर फ्यारा “का टुँ महीह प्रेम कर्ठो?” कलक कारण पत्रुसह दुःख लग्लन। ऊ उहाँह कल, “प्रभु, अप्न सब बात जन्ठी। मै अप्नह प्रेम कर्ठुं कना बात अप्नह थाहाँ बा।”
येशू हुँकहीन कल, “म्वार भेँरीन चह्राओ। 18जाट्टीसे मै टुँहीन कहटुँ, टुँ जवान रहल समयम आपन फाँर अपन्हे कस्ना करो, ओ आपन मन लागल ठाउँम जैना करो। तर टुँ बुह्रैबो त, आपन हाँठ पसर्बो, ओ और जन टुँहार फाँर कसदेहीँ, ओ टुँहीन मन नैलागल ठाउँम लैजहीँ।” 19येशू यी बात पत्रुस परमेश्वरह महिमा देहक लाग ऊ मुवपर्ना तरिकह संकेत कर्ना हिसाबले कलह। तबदोस्र येशू हुँकहीन कल, “म्वार पाछ लग्लरहो।”
येशू ओ उहाँ प्रेम कर्ना चेला
20पत्रुस पाछओर घुम्क हेर्ल त, येशू प्रेम कर्ना चेलह पाछपाछ आइट् देख्ल। यिह चेला मुक्ति-दिवसक खाना खाइबेर उहाँक छातीम ओमर्क, “प्रभु, अप्नह पक्रादेहुइया के हो?” कैक पुछ्लह।#यूह १३:२५ 21पत्रुस हुँकहीन देख्ल त, येशूह कल, “प्रभु, हिँकहीन जे का हुहीन?”
22येशू हुँकहीन कल, “यदि मै नैआइट्सम ऊ बच्लरहीँ कैक मै इच्छा कर्लसे फे, टुँहार का हुइटा त? टुँ म्वार पाछ लग्लरहो ना।” 23येशूक यी बातले करबेर उ चेला नैमुहीँ कैक चेलन्हक#२१:२३ चेलन्हक: शाब्दिक रूपले अनुवाद कर्लसे यिहाँ “भैयन्हक” हुइठा। बीचम हल्ला फैलल्। वास्तवम येशू उ चेला नैमुहीँ कैक नैकल, तर “यदि मै नैआइट्सम ऊ बच्लरहीँ कैक मै इच्छा कर्लसे फे, टुँहार का हुइटा त?” कैक कलह।
24यी सब घट्नक बारेम साक्षी देहुइया ओ यी बात लिखुइया यिह चेला हुइट। ओ हुँकहार देहल साक्षी सत्य हो कैक हम्र जन्ठी।
25येशू और काम फे एकदम धेर कर्ल। यदि उहाँक करल सब काम एक-एक कैक लिख्ना हो कलसे, सायद उ लिखल किताब सारा संसारम फे नैअटैनेरह।
© 2020, Wycliffe Bible Translators, Inc. All rights reserved.
