Maŵerengedu 17
17
Ndodo yaku Aroni yime
1Ambuya angurongoro ndi Mosese, 2“Kamba ndi ŵaYisraele, ndipo uronde zindodo kwaku iwo, pa nyumba ye yose ya auskeu ndodo yimoza, kutuliya ku ŵarongozgi ŵawo kwakuyana ndi nyumba za auskeu, ndodo chumi ndi ziŵi. Zina la munthu lirembeke pa ndodo yake, 3zina la ku Aroni lirembeke pa ndodo yaku Levi, chifukwa pa mura we yose wa nyumba ndi nyumba za auskeu pakaŵanga ndodo yimoza, 4uziŵike mu hema lakuwunganamo paurongo pa chisimikizgu, penipo ndikumana ndi iwe. 5Ndipo ndodo ya munthu yo ndikamusankhanga yikamenga; umu ndimo ndimariskeyenge madinginiku gha ŵaYisraele, gho ŵadinginikiya paku iwe.”
6Mosese wangukamba ndi ŵaYisraele; ndipo ŵarongozgi ŵawo wose ŵangumpaska zindodo, murongozgi yose ndodo yimoza, kwakuyana ndi nyumba za auskeu, ndodo chumi ndi ziŵi; yaku Aroni nayo yenga mukati mu ndodo zawo. 7Ndipo Mosese wanguŵika ndodo zo paurongo pa Ambuya mu hema la chisimikizgu. 8Sono ndi mlenji Mosese wanguruta mu hema la chisimikizgu; ndipo wanguwona, ndodo yaku Aroni ya nyumba yaku Levi yingume ndi kubuska mani, yinguwoneska maluŵa, ndi kupasa vipasi vyakufya. 9Penipo Mosese wangutuzga ndodo zose zo zenga paurongo pa Ambuya ŵanguza nazo pa ŵaYisraele: ŵanguziwona, ndipo munthu yose wanguto ndodo yake, 10Ambuya angunena ndi Mosese, “Wezgiyapo ndodo yaku Aroni paurongo pa chisimikizgu, yisungikiye kuŵa chakuwoniyapo ku ŵakugaruka, kuti umare madinginiku ghawo kumikana ndi ine, vinu ŵangafwa.” 11Nge ndimo angumulanguliya; ndimu Mosese wanguchitiya.
12Ndipo ŵaYisraele ŵanguti kwaku Mosese, “Awonani, titufwa, timara, tose timara. 13Yose yo wandere kufupi, yo wandere ku chihema chakupaturika cha Ambuya, watufwa. Kumbi tose tikafwangadi?”
Bible Society of Malawi