Genesis 1
1
Akngeyel alker-then ahern-then ingkerrenh arrpmernek
1Awank-akerr, Akngeyel alker-then ahern-then arrpmernek. 2Kwaty alayelant ahern ingkerrenh artenh. Ingwemerntarl ingkerrenh-angkwarr ayntenh. Akngeyel awer ilkwa tyarlewek. Akngey-kenh Itnweng rtnenh.
3Akngey angkek, “Arrtyernerl-aynta!” Rap arrtyernenhey-alhek-anem. 4Akngeyel arek mwerr arrtyernenhey-alhek. Akngeyel ingwethen arltethen amentant-atherr arrpmernek. 5Akngeyel itnewek “Arlta.” Kel ra akethirrenhek. Ingwer Akngeyel itnewek “Ingwa.” Arlta arrwekel anyent ikwerel, atwerrpirrenhek. Ingwemernt-anem irrek. Ingwel-anem. Ikwer-they angkep arrpemarl ra akethirrenhey-alhek.
6Akngey angkek, alker ampep-warl arrkngert rnkernetyek, kwaty alay amentant-atherriletyek. Kel alakenh-anyem. 7Kwaty ingwer irrwerl, kwaty ingwer kwaty kweneng. 8Akngeyel arrkngert renh itnewek “Alker.” Ikwer-they angkep arrpemarl ra akethirrenhey-alhek. Ingwirrek arrpemarl. Arlta 2 ikwerel, kel ingwepenh-anem irrenhek.
9Akngey angkek ahern-then kwaty alay-then amentant atherriletyek, ahern artwerretyirrey-kety. Kel ahern aremirrek. 10Akngeyel itnewek ahern-then kwaty alay-then. Akngeyel arek rarl mwerr-angkwarr arrpmernek.
11Akngey angkek atherrk-then arwerl amern-akert-then atherrk ntang-akert-rnem-then rnkernetyek. Kel alakenh-anyem. 12Arwerl ingwerek-ingwer-then ntang ingwerek-ingwer-then Akngeyel arrpmernek. Akngeyel arek ingkerrenh-angkwarr, rarl mwerr-angkwarr arrpmernek. 13Ingwirrek arrpemarl. Arlta 3 ikwerel, kel ingwepenh-anem irrenhek.
14Akngey angkek “Ingkenyel arrtyernetyek arltel, ingwel arrtyernetyek alkentel.” Arltethen ingwethen amentant-atherr ra anthek. Ratherr aherrety-then alyangkw-then ament-atherr arrpemarl ra anthek, rernem iterl-arayntetyek ilenger rernem akarrirretyek. 15-16Akngeyel arrernek atherrap-antey, ikngwer arrernek ra artewentyel arrtyerney-angker arltel. Akngeyel antyarr akngerr arrernek. 17-18Alkent ra arrernek alyeparl arrtyernetyek ingwel. Alkent-then ingkeny-then ra arrernek, ingwethen arltethen akngaketyek. Akngeyel arek ingkerrenh-angkwarr, rarl mwerr-angkwarr arrpmernek. 19Ingwirrek arrpemarl. Arlta 4 ikwerel, kel ingwepenh-anem irrenhek.
20Akngey angkek kwaty alayek, atnwenth ingwerek-ingwer ikwerel anayntetyek. Rap angkek thip ingwerek-ingwer alkerel alhayntetyek. 21Akngeyel arrpmernek kwaty-areny ingwerek-ingwer kwaty alay kwenel anayntetyek, akely-rnem-then, ilkwernem-then. Akngeyel arrpmernek thip ingwerek-ingwer alkerel alhayntetyek. Akngeyel arek ingkerrenh, rarl ingkerrenh mwerr-angkwarr arrpmernek. 22Akngeyel renh-rnem ilek, “Akngerram-akngerrirretyek, arlperrtyirremel kwaty alay-angkwarr ingwer-rneman alker-angkwarr ingwer-rneman.” 23Ingwirrek arrpemarl. Kel ingwepenh-anem irrenhek, arlta 5 ikwerel.
24Akngey angkek, “Ahern ikwer-penh atnwenth ingwerek-ingwer akngerrirretyek, ateralth-rnem-then, mwerr-rnem-then, ahernel alheyel-rnem-then.” Kel alakenh-anyem. 25Akngeyel atnwenth ingwerek-ingwer arrpmernek, atnwenth ateralth ingwerek-ingwer, atnwenth mwerr ingwerek-ingwer, ahernel alheyel ingwerek-ingwer. Akngeyel arek ingkerrenh, rarl ingkerrenh mwerr-angkwarr arrpmernek. 26Akngey angkek, “Ahern-areny arrpmernetyek rernem anetyek anwantherr-apeny, rernem Atyetyart anetyek kwaty-areny ingkerrenhek, thip ingkerrenhek, atnwenth ingkerrenhek, atnwenth mwerr-rnemek-then, atnwenth ateralth-rnemek, ahernel alheyel-rnem-then.”
27Akngeyel arrpmernek artwethen arelh-then, ratherr rapeny anetyek. 28Akngeyel ahern-areny ilek akngerrirretyek, ahern ingkerrenh-angkwarr, apmer arrpanenhel. “Arrantherr atyetyart anetyek, ahern ingkerrenhek, irrpeng ingkerrenhek, thip ingkerrenhek, atnwenth ingkerrenhek.”
29Ikwer-penh Akngeyel renh-rnem ilek, “Atha arrenhantherr anthem, amern-rnem-then arwerl ntang-akert-rnem-then, arrantherr arlkwetyek. 30Atnwenth ahern-areny-rnem-then, thip alker-areny-rnem-then, ahernel alheyel-rnem-then. Ahern-areny ingkerrenhek, atha amern-rnem-then atherrk-rnem-then anthem.” 31Akngeyel ingkerrenh arek, rarl mwerr-angkwarr arrpmernek.
© 2020, Wycliffe Bible Translators, Inc. All rights reserved.