لاوئلی‌لر 15
15
ناخوشلوغا گؤره بدن آخینتیلاری
1رب موسایا و هارونا ددی: 2«ائسرایئل اؤولادلارینا دانیشیب دیئن: ”بئر نفرئن کئشئلئک عوضوونده آخینتی اولسا، آخینتیسی نجئس ساییلسین. 3آخینتیسینا گؤره بو اونون نجئسلئیی‌دئر: کئشئلئک عوضوونون آخینتیسی ائستر آزاد آخسین، ائستر قاتیلمیش، او شخص نجئس ساییلیر. 4اوستونده یاتدیغی هر یاتاق و اوتوردوغو هر شی نجئس ساییلسین. 5کئم اونون یاتاغینا توخونسا، پالتارینی یوسون، سو ائله یویونسون؛ و آخشاما قدر نجئس ساییلسین. 6هر کس کی، بدن آخینتیسی اولان شخصئن اوستونده اوتوردوغو اشیانین اوستونده اوتورور، پالتارلارینی یوسون، سو ائله یویونسون، و آخشاما قدر نجئس ساییلسین. 7هر کس کی، بدن آخینتیسی اولان شخصئن بدنئنه توخونور، پالتارینی یوسون و سو ائله یویونسون، و آخشاما قدر نجئس ساییلسین. 8اگر بدن آخینتیسی اولان شخص تمئز آداما توپورسه، او آدام پالتارینی یوسون، سو ائله یویونسون، و آخشاما قدر نجئس ساییلسین. 9بدن آخینتیسی اولان شخصئن مئندئیی هر یَهر نجئس ساییلسین. 10اونون آلتیندا اولموش هر شیه توخونان هر کس آخشاما قدر نجئس ساییلسین. اونلاری داشییان دا پالتارلارینی یوسون، سو ائله یویونسون، و آخشاما قدر نجئس ساییلسین. 11بدن آخینتیسی اولان شخص اللرئنی یومامیش کئمه توخونسا، او آدام پالتارلارینی یوسون و سو ائله یویونسون، و آخشاما قدر نجئس ساییلسین. 12بدن آخینتیسی اولان شخصئن توخوندوغو هر ساخسی قاب سیندیریلسین، آمّا هر تاختا قاب سو ائله یویولسون.
13بو آدام، اؤز آخینتیسی کسئلدئیی حالدا، تمئزلنمک اوچون یدّی گون گؤزله‌سئن، سونرا پالتارینی یوسون، بدنئنی آخار سو ائله یوسون و تمئز ساییلسین. 14سکّئزئنجی گون ائکی قومرو قوشو و یا ائکی گؤیرچئن گؤتوروب ربّئن حوضور چادیرینین گئرئشئنده ربّئن حوضورونا گلسئن و بونلاری کاهئنه ورسئن. 15و کاهئن اونلاری تقدئم اتسئن، بئرئنی گوناه قوربانی، او بئرئنی ده یاندیرما قوربانی. بونلارلا کاهئن او شخص اوچون آخینتیسینا گؤره ربّئن حوضوروندا کفّاره اتسئن.
جئنسی آخینتی
16توخومو تؤکولن هر کئشی بوتون بدنئنی سو ائله یوسون و آخشاما قدر نجئس ساییلسین. 17اوستونه توخوم تؤکولولن هر پالتار و یا دَری اشیا سو ائله یویولسون و آخشاما قدر نجئس ساییلسین. 18کئشی آروادلا یاخینلیق ادئب توخومو تؤکولسه، ائکئسی ده سو ائله یویونسونلار و آخشاما قدر نجئس ساییلسینلار.
آروادلارین قان آخماسی
19آیباشی واختی قان آخماسی اولان هر آرواد یدّی گون نجئس ساییلسین، اونا توخونان هر کس ده آخشاما قدر نجئس ساییلسین. 20آیباشی مودّتی آرواد نه‌یئن اوستونده اوزانیب و یا اوتورسا، نجئس ساییلسین. 21او آروادین یاتاغینا توخونان هر کس اؤز پالتارینی یوسون، سو ائله یویونسون و آخشاما قدر نجئس ساییلسین. 22او آروادین اوتوردوغو هر شیه توخونان هر کس ده پالتارلارینی یوسون، سو ائله یویونسون، و آخشاما قدر نجئس ساییلسین. 23اگر بئر آدام او آروادین یاتاغینا، یا دا اوستونده اوتوردوغو شیه توخونسا، او آدام آخشاما قدر نجئس ساییلسین. 24اگر کئشی او آروادلا یاخینلیق اتسه، قان آخما نجئسلئیی اونا دا بولاشار. کئشی ده گرک یدّی گون نجئس ساییلسین؛ کئشئنئن یاتدیغی هر یاتاق دا نجئس ساییلسین.
25او آرواد کی، آیباشی واختیندان کنار یا دا آیباشی واختیندان سونرا قان آخماسی نچه گون داوام ادئر، آرواد بوتون بو آخینتی مودّتی آیباشی نجئسلئیی دؤورونده‌کی کئمی نجئس ساییلسین. 26بوتون آخینتی واختی، آیباشی نجئسلئیی واختی کئمی، اوستونده یاتدیغی هر یاتاق و اوتوردوغو هر شی نجئس ساییلسین. 27اونلارا توخونان هر کس ده نجئس ساییلسین. قوی او، پالتارینی یوسون، سو ائله یویونسون و آخشاما قدر نجئس ساییلسین. 28اگر آخینتیسی کسئلسه، او آرواد یدّی گون گؤزله‌سئن، سونرا تمئز ساییلسین. 29سکّئزئنجی گون همئن آرواد ائکی قومرو قوشو، یا دا ائکی گؤیرچئن گؤتوروب حوضور چادیرینین گئرئشئنده، کاهئنئن یانینا گتئرسئن. 30کاهئن قوشلارین بئرئنی گوناه قوربانی، او بئرئسئنی ده یاندیرما قوربانی اولاراق تقدئم اتسئن. بونلارلا کاهئن بو آرواد اوچون آخینتیسینین نجئسلئیئنی ربّئن حوضوروندا کفّاره اتسئن.
31بله‌جه ائسرایئل اؤولادلارینی اؤز نجئسلئیئندن آییرین کی، آرالاریندا اولان خیمه‌می، نجئسلئکلری ائله نجئس ادئب اؤلمه‌سئنلر.
32بو قانون بدن آخینتیسی اولان آداملار اوچون و توخومو تؤکولمکله نجئسلَنَن هر کئشی اوچون، 33آیباشی اولوب نجئسلَنَن هر آرواد اوچون، آیری بئر آخینتییا دوچار اولان هر کئشی و هر آرواد اوچون، نجئس آروادلا یاخینلیق ادن هر کئشی اوچوندور.“»
© Elam Ministries 2013. All rights reserved.
