لاوئلی‌لر 11
11
اَتی یِیئلَن و یِیئلمه‌ین حیوانلار
(تثنئیه ۱۴:۳-۲۱)
1رب موسا ائله هارونا گئنه دانیشیب، بله ددی: 2«ائسرایئل اؤولادلارینا بله دیئن: ”قورودا یاشایان حیوانلاردان بِله‌لرئن اَتئنی یئیه بئلرسئنئز. 3هر هانسی کامئل قوشا دیرناقلی قؤوشه‌ین حیوانین اَتئنی یئیه بئلرسئنئز، 4لاکئن قؤوشه‌ین و یا قوشا دیرناقلی حیوانلار ائچئنده بونلاری یِمه‌یئن: دَوه، چونکی او قؤوشه‌سه ده، قوشا دیرناقلی دیئل. بونا گؤره ده سئزئن اوچون حارامدیر؛ 5قایا دووشانی، چونکی او قؤوشه‌سه ده، قوشا دیرناقلی دیئل. بونا گؤره ده سئزئن اوچون حارامدیر؛ 6دووشان، چونکی او قؤوشه‌سه ده، قوشا دیرناقلی دیئل. بونا گؤره ده سئزئن اوچون حارامدیر؛ 7دونگوز، چونکی او کامئل قوشا دیرناقلی اولسا دا، قؤوشه‌مئر. بونا گؤره ده سئزئن اوچون حارامدیر. 8اونلارین نه اَتئنی ییئن، نه ده لِشئنه توخونون. اونلار سئزئن اوچون حارامدیر.
9سولاردا اولانلاردان بونلاری یئیه بئلرسئنئز؛ سولاردا، دهنزلرده، و یا چایلاردا یاشایان حیوانلاردان اوزمَک باله‌لری و پولجوقلاری اولانلارین هامیسینی یئیه بئلرسئنئز. 10آمّا دهنزلرده، و یا چایلاردا قایناشان حیوانلاردان اوزمَک باله‌لری و پولجوقلاری اولمایان سولاردا یاشایان هر مخلوق، سئزئن اوچون ائیرنج اولسون. 11اونلار سئزئن اوچون ائیرنج اولاجاق، اونلارین اَتئنی یِمه‌یئن و لِشئندن ده ائیره‌نئن. 12سولاردا اوزمَک باله‌لری و پولجوقلاری اولمایانلارین هامیسی سئزئن اوچون ائیرنج اولسون.
13ائیرنج اولدوغونا گؤره قوشلاردان بونلاری یِمه‌یئن: قارتال، کِچَله‌کرکس، قارا کرکس، 14چالاغان، شاهئن جئنسئندن اولانلار، 15بوتون قارغا جئنسئندن اولانلار، 16بایقوش، قارتال بایقوشو، دهنز قوشو، قیرغی جئنسئندن اولانلار، 17بالا بایقوش، قاراباتداق، بؤیوک بایقوش، 18آغ بایقوش، چؤل بایقوشو، لِش کرکسی، 19لِیلَک، بالیق‌اودان جئنسئندن اولانلار، شاناپئپئک، خوفّاش.
20دؤرد آیاقلا گزن، قانادلی حشره‌لرئن هامیسی دا سئزئن اوچون ائیرنج اولسون. 21لاکئن دؤرد آیاقلا گزن، قانادلی حشره‌لردن اونلاری کی، یرده سیچراماق اوچون اویناقلی آیاقلاری وار، یئیه بئلرسئنئز؛ 22اونلاردان چَیئرتکه جئنسئندن اولانلاری، کِچَله چَیئرتکه جئنسئندن اولانلاری، سوساری جئنسئندن اولانلاری، جیرجیراما جئنسئندن اولانلاری یمک اولار. 23لاکئن بوتون او بئری دؤرد آیاقلی قانادلی حشره‌لر سئزئن اوچون ائیرنج اولسون.
24بو حیوانلاردان سئز نجئس اولا بئلرسئنئز. اونلارین لِشئنه توخونان دا آخشاما قدر نجئس ساییلیر. 25اونلارین لِشئندن بئر حئصّه‌سئنی داشییان هر کس پالتارلارینی یوسون و آخشاما قدر نجئس ساییلسین. 26کامئل قوشا دیرناغی اولمایان، و یا قؤوشمه‌ین هر حیوان سئزئن اوچون نجئس اولسون. اونلارا توخونان هر کس نجئس ساییلسین. 27پنجه‌لری اوستونده یرئین دؤرد آیاقلی هر حیوان سئزئن اوچون نجئس اولسون؛ اونلارین لِشئنه توخونان هر کس آخشاما قدر نجئس ساییلسین. 28اونلارین لِشئنی داشییان، پالتارلارینی یوسون و آخشاما قدر نجئس ساییلسین. بو حیوانلار سئزئن اوچون نجئس ساییلسین.
29یرده قایناشان حیوانلار آراسیندا سئزئن اوچون نجئس اولان بونلاردیر: کور سئچان، سئچان، هر جور کَرتَنکَله، 30گِکّون، واران، دووار کَرتَنکَله‌سی، کَلر، بالا سوسمار. 31بونلار بوتون قایناشان حیوانلار آراسیندا سئزئن اوچون نجئس اولسون. اونلارین لِشئنه توخونان هر کس آخشاماجاق نجئس ساییلسین. 32اونلاردان بئرئسئنئن لِشی، اوستونه دوشَن هر شیی نجئس ادئر. هر تاختا، پارچا، دَری، و یا کئسه، هر نه ائش اوچون ائشله‌نن شی سویا سالینسین. آخشاما قدر نجئس ساییلسین، آخشامدان سونرا تمئز ساییلسین. 33اونلاردان بئری گئل قابین ائچئنه دوشسه، اونون ائچئنده‌کی هر شی نجئس ساییلاجاق و قابی گرک سیندیراسینیز. 34بله بئر قابدان، خوره‌یئن ائچئنه سو تؤکولسه، او خورک نجئسله‌نئر. بو جور قابین ائچئنده هر ائچکی نجئسله‌نئر. 35او حیوانلاردان بئرئنئن لِشی، اوستونه دوشَن هر بئر شیی نجئس ادئر. ائستر تندئر، ائستر اوجاق، سؤکولسون، چونکی نجئسله‌نئب؛ اونلار سئزئن اوچون نجئس اولسون. 36آنجاق سو بولاغی و یا سو آنباری پاک ساییلسین. بو حیوانلارین لِشئنه توخونان هر کس نجئس ساییلسین. 37بونلاردان بئرئنئن لِشی اَکئن اوچون آیریلمیش توخومون اوستونه دوشسه، او توخوم تمئز ساییلسین. 38آمّا لِش، سویا سالینمیش توخومون اوستونه دوشسه، توخوم سئزئن اوچون نجئس اولسون.
39اگر اَتی سئزئن اوچون یِمه‌لی حیوانلاردان بئری اؤلسه، لِشئنه توخونان آدام آخشاما قدر نجئس ساییلسین. 40او حیوانین لِشئندن یئین آدام پالتارینی یوسون و آخشاما قدر نجئس ساییلسین. لِشئنی داشییان آدام دا پالتارینی یوسون و آخشاما قدر نجئس ساییلسین.
41یر اوزونده سورونن هر قایناشان حیوان سئزئن اوچون ائیرنج اولسون؛ اونو یمه‌یئن. 42ائستر قارنی اوستونده، ائستر دؤرد آیاغی ائله سورونن، یا دا یر اوزونده‌کی چوخ آیاقلی اولان قایناشان حیوانلاردان یمه‌یئن، چونکی اونلار ائیرنجدئر. 43قایناشان حیوانلارین هچ بئری ائله اؤزونوزو ائیرنج ادئب نجئسلَمه‌یئن، اله کی، نجئس اولاسینیز.
44تارینیز رب منم. اؤزونوزو تقدئس ادئن و موقدّس اولون، چونکی من موقدّسم؛ اؤزونوزو یرده سورونن هچ بئر قایناشان حیوانلا نجئس اتمه‌یئن. 45چونکی تارینیز اولماق اوچون سئزی مئصئر تورپاغیندان چیخاردان رب، منم. بونا گؤره، موقدّس اولون، چونکی من موقدّسم.
46حیوان، قوش، سولاردا اوزَن هر جور جانلی مخلوق، یر اوزونده قایناشان هر جور حیوان حاقّیندا قانون بودور. 47بونونلا پاکلا نجئس شیلر آراسیندا، یِیئلَن و یِیئلمه‌یَن حیوانلار آراسیندا فرق قویولور.“»
© Elam Ministries 2013. All rights reserved.
