Mpiin 3
3
Unibɔn aah yii Uwumbɔr aamɔb ki tun titunwanbir pu na
1Uwumbɔr aah nan naan ipeel imɔk na, uwaa le nan kpa nlan ki jer i mɔmɔk. Le u baa upii ngbaan ke, “Uwumbɔr sil bui ke ni taa ji kisaak ngbaan ni aasub bubaa aasubil aa?”
2Le upii ngbaan bui u, “Ti ga ŋmaa ji ŋisubil ngbaan mɔk, 3see busub bu si kaasisik ni na, le Uwumbɔr bui ke ti taa ji bu aasubil, hali ti yaa meeh ŋi kan, ti ga kpo.”
4Le uwaa bui ke, “Naa ye mbamɔn, naan kpo. 5Uwumbɔr nyi ke ni yaa jin ŋi kan, ninimbil le ga woln, le ni ga bee ni ŋan na, ni ni kaa ŋan na, ki ga li bi ke waah bi pu na.”#3.5: “ni ŋan na, ni ni kaa ŋan na” bee “tiwan mɔmɔk”.
6Le upii lik ŋisubil ngbaan, ki kan ŋaah ŋan pu na, ki dakl ke unimbil yaa woln kan, ni ga li ŋan sakpen, le ki neen ŋi, le ki ker ŋi ki moo, le ki di ŋiken tii uchal mu, le u mu moo. 7Baah moo ŋi doo na, le binimbil daa woln, le bi bee ke bi chuun biŋmeen la, nima pu na, le bi bar tifar ki di doŋ binimbiin ni.
8Kijook ngbaan le bi ŋun Tidindaan Uwumbɔr chuun kisaak ni, le bi san ti bɔr isui aakaasisik ni. 9Le Tidindaan Uwumbɔr yin uja ngbaan ke, “Aa bi la?”
10Le uja bui u ke, “M ŋun saah chuun kisaak ni pu na; le maah chuun ŋŋmeen na, ijawaan chuu mi, le m bɔr.”
11Le Uwumbɔr baa u ke, “Ŋma tuk si ke aa chuun aaŋmeen? Maah bui si ke aa taa ji ŋisubil ŋi na, le aa jin aa?”
12Le uja bui u ke, “Saah di upii u tii mi ke u li bi m chee na, uma le tii mi ŋisubil ngbaan, le m moo.”
13Le Uwumbɔr baa upii ngbaan ke, “Ba ŋa aa ŋa kina?” Le upii bui u ke, “Uwaa le ŋmann mi, le m moo.”
Uwumbɔr aah daa uwaa, ni upii, ni uja aatafal pu na
14Le Uwumbɔr bui uwaa, “Saah ŋa kina na, ipeel mɔmɔk ni, m puun lii sin baanja le pu. Din ki joo cha, aa ga li baar titan ni, ki li ji titan, saamɔfal mɔmɔk ni. 15Aa ni upii ngbaan ga li ye tɔb aadim la. Saabim ni waabim mu ga li ye tɔb aadim la. Uyaabil ga faa wii aayil, le aa mu ga gaa utaagbeln.”
16Le Uwumbɔr bui upii ke, “Aa ga kan falaa pam timal ponn ni. Ni ki kpee na, aa ga li ban ke aachal li gee si, le u ga li ye saayidaan.”
17Le Uwumbɔr bui uja ngbaan ke, “Saah ŋun tii aapuu ki yii maamɔb ki jin ŋisubil ngbaan na, m puun lii kitiŋ pu. Aa ga tun ki kan falaa le ki nin kan tijikaar ji. 18Kitiŋ ga pa ikokon ni ichakpeejagar; le aa ga li ji timoor ni aasufar. 19Aa ga ko le kitotoŋ naa si waahr, le aa nin kan tijikaar ki ji, ki ti saa saakundaal. Le aa ga ki gir koo titan ni; ba pu? aa nyan titan ni la. M nan di titan le naan si, le aa ga ki kpaln titan.”
20Adam nan yin upii ke Iif; ba pu? uma le ye binib mɔmɔk aana.#3.20: Adam aatataa le ye ke “unibɔn.” Iif aatataa le ye ke “limɔfal.” 21Le Uwumbɔr di tiwakor aagban ki di jab, ki ŋa tiwanpeenkaan ki di peen bi.
Uwumbɔr aah nan jenn nyan Adam ni upuu kisaak ngbaan ni pu na
22Tidindaan Uwumbɔr nan bui ke, “Dandana, uja ngbaan ŋa ke timi aah bi pu na, ki bee ni ŋan na, ni ni kaa ŋan na. Taan ki cha u ji limɔfal aasub aasubil mu, aan ki li bi cha n‑yoonn mu kaa kpa ndoon na.” 23Le Uwumbɔr jenn nyan u Edenn aasaak ngbaan ni, le ki cha u ko waah nyan ni titan ti ponn ni na, 24le ki di tiwanfuurkaan ni kpa ifeen na, ki di siin kisaak ngbaan aawipuul wɔb, le ki di mmiigaal mu naahn kijuk ki fenni ŋipepel mɔmɔk na, ki kiir kisaak ngbaan. Nima kan, unii ubaa aan ki pii limɔfal aasub chee.
©1998, 2014 Wycliffe Bible Translators, Inc. All rights reserved.