Mahte 24 - 인기 성경 구절

공유

Agè ashop é hkyô myô jàt lo é yánmai, byù myo myô é chyitdàp myìt gi, kân ló byùq râ nghut lhê; nghut kôlhang, jihtûm jé shoq wó hkam jân nyi é sû gi, hkyi yu é hui râ nghut lhê.

Byù myû bànshoq má sàksé dùt râ matú, haû mîngdán eq sêng é gabú danglù lé, mingkan gón má hko kyo râ nghut lhê. Hau htâng má shèq, ló htûm buìnyì jé râ nghut lhê.

Núngmòq gi, majan dùt nyi é hkyô eq majan eq sêng é danglám pé lé, wó gyo kôrâ nghut lhê; nghut kôlhang, hkâgyùq dàn kó. Haú hkyô pé gi, dùt lò râ za nghut lhê; nghut kôlhang, ló htâng é buìnyì gi, a nghut shi.

Byù ra-myû eq ra-myû, mîngdán ralhum eq ralhum majan zân lhûm lò kôrâ nghut lhê. Jowò myo myo má, mùtmó gyó é pé eq layàng nún é pé dùt lò râ nghut lhê. Haú pé gi, wuîhke jamjau hkyo é a-pûn awang za ru nghut ashî.

Mauhkûng eq myigùng gi, a jòq lo dùt byùq râ nghut lhê; nghut kôlhang, Ngá é dang gi, ru joq nyî râ nghut lhê.

Hkâsu mù gâ le, ‘Ngò gi, haû Hkrisidùq nghut lhê.’ ga, Ngá myîng lé lâng é byù myo myo nyi htoq lô mù, byù myo myo lé hkyô shuî nghoq kôrâ nghut lhê.

Haú hkûn, núngmòq gi, zing-rî é eq sat pyâm é hui zo râ matú, àp pyâm é hui kôrâ nghut lhê. Byù myû lhúnglhâng bang gi, Ngá é yánmai, núngmòq lé a nguì kut kôrâ nghut lhê. Haú u lé, byù myo myo gi, lùmjíng myìt lé tô pyám kômù, rayùq eq rayùq a ngui lhum dùt é htoq agó, rayùq eq rayùq àp pyâm lhum kôrâ nghut lhê. Hau htoq agó, myìqhtoi pyoq pé myo myo nyi htoq lô kômù, byù myo myo lé hkyô shuî nghoq kôrâ nghut lhê.

Haú hkûn, Yesuq, yhángmòq lé tû taî é gi, “Núngmòq lé, ó yùq èq le a wó shuî nghoq sháng gàq, sidìq nyì keq.

Haû mù, núngmòq le rì rì nghut nyî keq; hkâsu mù gâ le, haû Byu Yhangzo gi, a bûn nùng má jé lé lô râ nghut lhê.

Haû su mù, haû núngmòq é Yhûmsîng gi, hká nyí jé lé lô râ lé, núngmòq a sé kô é yánmai, sidìq machyâ nyì keq.

Buìnyì eq ahkyíng haú lé gi, ó yùq le a sé; mauhkûng htoq mâ é maumang lagyô pé lháng a sé; haû Zo le a sé; haû Îwa za ru sê lhê.

Hkâsu mù gâ le, Hkrisidùq pyoq pé eq myìqhtoi a-pyoq pé nyi htoq lô mù, wó dùt é nghut jáng, hkyin yù hui bang lé lháng, wó lhoqnghoq shoq ga, alhô agàn mó pé eq làklaí alhô agàn pé lé kut shit kôrâ nghut lhê.

No-aq é tsîn pyàt má dùt é su, haû Byu Yhangzo lé lo é hkûn le, dùt râ nghut lhê. Hkâsu mù gâ le, dowuî a díng shî é buìnyì pé má, byu pé gi, No-aq, wuìsanghpo mó hkaû má wang é hkûn jé shoq, zo zo shuq shuq, myi byi myi yû, kut nyi bum akô nghut ri; yhángmòq gi, dowuî díng lô mù, yhángmòq bànshoq lé ûm sat pyâm é hkûn jé shoq, haî dùt lò râ lé, a sé kó dùt bùm é su, haû Byu Yhangzo lé lo é hkûn le, dùt râ nghut lhê.