Rò̌mǎphû̌ 1 - 인기 성경 구절

공유

Ta̤sò̌le̤sò̌lò̤ awi̤akè̌ htǒo akhû̌akhî, he sòwò̤tò̤, ma̤tè̤hî̌dě, kòyò lǒ̤꤮ bò htě a yṳǎ ta̤sò̌le̤sò̌lò̤ awi̤akè̌ htǒotoǒnu, Cǒmara ma̤lû̌htò̌gebò asî ta a ta̤po̤ta̤phǎ hǒ. A ma̤lû̌htò̌ge wǐgutṳ̌ Yṳ̌daphû̌ toǒ, htodě a ma̤lû̌htò̌gepo̤ Yṳ̌daphû̌ mè̤tò̤ toǒ.

Cǒmara bè̌cǒbè̌tè̤ kòyò toǒ ta ana̤ hî̌tènu ta̤sò̌le̤sò̌lò̤ awi̤akè̌ htǒo dǔlṳhtò̌ hǒ. Ta̤cǒta̤tè̤ htǒonumî̌ a tèhtò̌ ta ta̤yṳ dě a gutṳ ta ta̤yṳ. Lî̤cahtǐ hî̌, “Kòyò htě Cǒmara bè̌cǒbè̌tè̤ yǎta ata̤yṳ toǒnu, asî nî̤bǎ mè̤mè̤̌ ta̤ǒhtûpwa̤ asa pě.”

Ma̤tè̤hî̌dě tèhtò̌ bǎ Cǒmara bǒlò̤wǐ hǎkhû̌ akhanu, kòyò toǒ sî̌yaphlo wǒdǎ ta Cǒmara ǒ ta a bwǐsîrîpo̤phǎ tûjûpwa̤, htohǒtò̤ asî sî̌yaphlo ta a mî̌ Cǒmara mè̤mè̤̌ tapwa̤hǒ. Cǒmara a sîrîpo̤phǎ tûjûpwa̤ htǒotoǒnu ta a mî̌ Cǒmara mè̤mè̤̌ tapwa̤ htǒonu, asî kè̌shǐjò tò̤ pwǎ̤tadě asî sî̌yajò pwǎ. Asî kè̌shǐ Cǒmara bǒlò̤ ta̤htǒotoǒ akhû̌akhî, asî sî̌yajòpwǎ lǒkho Cǒmara awi̤akè̌ htǒotoǒ. Hǐnu akhû̌akhî, ta̤ lǒ̤꤮ bò htě asî ma̤hto toǒnu, asî hî̌htohî̌lò̤jòpe tò̤.

Asî sî̌ya Cǒmara hǐnudě asî bè̌dubè̌na̤ nû̌û pwǐ Cǒmara tapwa̤nu tò̤. A hî̌bwǐhî̌sîrî nû̌û tò̤tò̤. Hǐnudě asî ta̤gènè̤ toǒnu, a htûhtò̌bò ta̤ǒlû̌ǒkhlo. Htohǒtò̤ asî ta̤gènè̤ ǒlû̌ǒkhlo htǒotoǒnu, ta̤khǐta̤lo̤ ma̤bǐkè asî hǒ.

A to yṳǎ Cǒmara a ta̤te̤ta̤mǎ pwǎ̤ta a htû̌lè̌ tèplè̌kè dě a cû̌ yṳǎtû̌ ta̤lòhǎlòho. A to saba pwǎpǒ̤ Cǒmara dě a to ma̤ pwǎpǒ̤ pwa̤ htě a bǒlò̤ ta̤ htǒotapwa̤ ata̤ma̤ pwǎ pò̤̌ta a cû̌ saba ma̤tǒ̤ ta̤ htě Cǒmara bǒlò̤ nû̌û toǒ ata̤ma̤. Běcǎ htǒotapwa̤nu kò htû̌sò̌ǐ tû̌ta nû̌û tûjûpwa̤ nî̌꤮. Amè̤.

Cǒmara ta̤sò̌dû̌ ǒlṳhtò̌ dě mǒkhû̌. Dě a ǒlṳhtò̌ bǎ kòyò lǒ̤꤮ bò htě a ma̤ ta̤sǔta̤plěnu toǒ ta kòyò htě a ma̤ ta̤phû̌mò̤shî̌htonu toǒ. Dě asî ma̤ ta̤phû̌mò̤shî̌hto toǒ akhû̌akhî, a nosî̌ya kò ta ta̤te̤ta̤mǎ htǒonu tò̤ hǒ.

Dě asî ma̤hǐnu akhû̌akhî, Cǒmara ǐlò̤kè asî dě sǐshi a ta̤sò̌yṳ htě a ma̤sòwò̤ phû̌mò̤ asî htǒo a cǔdekû. Mamǔ toǒ bǎbǎ, a wîkè ala̤klo bǒsû̌ hǎmoǒhtu ta makhû dě asî ta asî cû̌ bǒsû̌ hǎmoǒhtu kè̌khî tû̌ nû̌û. Makhû toǒnu bǎbǎ ma̤sǒsǒta hǐnuhǒ. Asî wîkè ala̤klo hǎmoǒhtu ta mamǔ toǒ dě asǐshi a ta̤sò̌yṳnu a sò̌yṳcû̌ hǎmoǒhtu kè̌khî tû̌ nû̌û. Makhû toǒnu a ma̤ sòwò̤ kè̌khîtû̌ nû̌û tapwa̤ ta tapwa̤. Dě asî ma̤ta̤sǔta̤plě hǐnu akhû̌akhî, Cǒmara cèrò asî pwǐ a gwata asînu hǒ. Htohǒtò̤ asî sî̌yahto Cǒmara awi̤akè̌ pwǎ̤tadě, a phî̌shǔ lǒkho tò̤, a bè̌ ta̤dǐcǎ꤮ tò̤ akhû̌akhî, Cǒmara nopǒǐkè asî ta asî ta̤gènè̤ phû̌mò̤shî̌htonu toǒ dě a noma̤ lǒkho asî ta ta̤ htě a gwa ma̤tò̤nu toǒ hǒ.

Asî hî̌lò̤ lǒkho ana̤ ta a ta̤sî̌ta̤jò ǒ, hǐnudě a htû lǒkhopwǎ ta kòyò ǒò̌. Asî to sabahtò̌ Cǒmara htě a ǒ ta a sîrîdû̌htû dě a sijòtò̤ htǒotapwa̤, mî̌tadě a cû̌ saba tû̌ pwa̤yo̤pwa̤gî htě kò bǒ yǎta cǔde toǒ. Asî saba tǒ̤kètû̌ pwa̤yo̤pwa̤gî sǒsǒta kòyò htě a sijò htǒotoǒ, mè̤tò̤mî̌ asǒsǒta htû̌phû̌yṳphû̌ toǒ, mè̤tò̤mî̌ asǒsǒta ta̤phû̌ta̤li̤ toǒ, tò̤mî̌ asǒsǒta wṳ̂shǐhtǎ toǒ.