Rimljanenđe 12 - 인기 성경 구절

공유

Ma prilagodinen tumen akale svetose, nego muken e Devlese te menjini tumen ađahar so ka del tumen nevo razmisliba, te šaj džanen soi lesiri volja, soi šukar, ugodno hem savršeno.

Adalese molinava tumen, phraljalen, palo milosrđe savo mothovđa amenđe o Devel, te anen tumare telija sar dživdi žrtva, sveto hem ugodno e Devlese. Adavai pravo način sar te služini pe e Devlese.

Zbog i nada savi isi tumen, oven radosna, kad injen ano nevolje, oven strpljiva, a ani molitva oven istrajna.

Ma muk o bišukaripe te pobedini tut, nego tu pobedin o bišukaripe šukaripnaja.

Volinen jekh avere sar phraljen, poštujinen jekh avere više nego tumen.

O mangipe nek ovel čačikano, a na dujemujengoro. Mrzinen o bišukaripe, zorale ićeren tumen ko okova soi šukar.

Te šaj – kobori đi tumende – živinen ano mir sa e manušencar.

Ma osvetinen tumen korkore, mle manglalen, nego ačhaven than e Devlesere holjaće. Adalese so ano Sveto lil pisini: “I osvetai mli, me ka irinav lenđe” – vaćeri o Gospod.

Ma oven lenja, nego revno hem gorljivo služinen e Gospodese.

Pali milost savi o Devel dinđa man, vaćerava svakonese tumendar: Ma mislinen tumendar bolje nego so valjani te mislinen, nego mislinen tumendar trezveno, pali mera oti vera savi o Devel odredinđa svakonese tumendar.

Nikase ma irinen bišukaripe zako bišukaripe. Dikhen te ćeren okova soi šukar anglo jaćha sa e manušenđe.

Oven složna maškara tumende; ma oven barikane, nego družinen tumen okolencar kolen avera dikhena da hari vredinena. Ma mislinen da sa džanen!

Umesto adava: “Tei to neprijatelji bokhalo, de le te hal, hem tei žedno, de le te pijel. Adalese so, te ćerđan ađahar, ka čhore lese jagalo žaro upro šero – ka lađare le.”

Blagoslovinen okolen kola progoninena tumen, blagoslovinen, a ma den armanja. Radujinen tumen okolencar kola radujinena pe, roven okolencar kola rovena.

Delinen okova so isi tumen e Devlesere manušencar kolai ani potreba, hem oven gostoljubiva.

Adalese so, sar so isi amen but udovija ano jekh telo, a sa o udovija nane len isto uloga, ađahar hem amen, iako injam but, injam jekh telo ano Hrist, hem sare pripadinaja jekh averese.