Loma 12 - 인기 성경 구절

공유

Badi kaliva hida babi ana nuwanuwa amine hihuluhuluva-ma adi ita amine omi keke wananuwanuwa. Au wanahawahegemi be Yaubada nuwami ginakive'ivaguni-yo ami ita tulina amine wanavenuya. Ada Yaubada nuwami ginakive'ivaguni-yo amifaiweya yana nuwanuwa wanahalamanena, higa gavadi gilubodani kadu gavadi nuwana gina'ivedivedigagini kadu gavadi hagihagi-mo'ena Bana matane ma wanahalamanena.

Siule tobohiyakweyao, Yaubada ginuwadogeda lakahina be giseda yegayegadeyao Bana matane ma ana nuwanuwa a galukahihiyena. Hidede amine gihinekalikaliyeda fa'ina, gagahegahevagadonemi be wowomi kadu nuwami Yaubada againe wanahawahegena. Kaliva yomuyomu yadi abahawahega fa'ina Yaubada againe hi'aliyena amine, meda omi wayawaimi ivaguna wamimiyami-ma kalivai-mina taumiyao Yaubada againe wanahawahawahegemi ada Bana fa'ine sevesevehailamiyao wanamiyami be Bana nuwana wanakivedivedigagina. Omi kaliva vevine wanuwamiyao ma gilubodami be hidede amine Yaubada wanahawadavadavana.

Aimo Yaubada omi fa'imiya gavaimi ginaga-ma fa'ina walulauboda. Mene yami walulauboda wamimiyami fa'ina, wanavemwamwala. Vita tulina tulina kaliva nimadiya wananuhagana againe, wana'atuvefa'ila. Yami ve'ove'o'ola againe wana'idibumuhiga.

Keke tokivekoyo yadi koyona ginavehimeyemi higa vaita wanafatani. Au taumiyao yadi koyona wanavehimeyena be nuwakabubu againe wanaluvekwe'una.

Omi Keliso yana yo'o agaidiya wavetobohiyana. Au buye wanave'ahawahawahega vaita tobohiyami velemo'ena amine. Tobohiyamiyao adi egana wanamadukilakahina vaita hidakaiwabuhegemi.

Siule tobohiyakweyao, mali kaliva fa'idiya wanahawahawahegemi tu keke wanave'uma'ala. Nuwanuwa koyona wanavenikohiyena tu nuwanuwa hagihagina wanakidonena.

Hami amifaiweya kukuya againe kaliva moya'aidi buye wanamiyami, au medede amine wanamiya.

Omi tobohiyakweyao, kaliva yadi koyona keke wanalaufata. Au wanamiya tu ka'i Yaubada nuwanuwana amine o Bana ginalaufata. Meda tuwaina Yaubada Veyao Tuwaina ana bukiya gigahe gigayo, Laufata yaku abavehimeya. Iya kaliva yadi koyona ganafatana. Au hidedemi Kaiwabu gigahe.

Yami dibumuhiga againe keke wanawowologilogi. Au nuwami yana wagakahikahi Kaiwabu fa'ine wanafifaisewa.

Yaubada aku vehimeya giveleku fa'ina, omi sa'eyana sa'eyana agaimiya ganagahe. Keke o tauni nuwahinageniya unakilakahi vaita o tauni ya wafaiwala yo Yaubada fa'ine ufifaisewa. Au tauni fa'iniya unanuwanuwahagihagi, ya vetumagana hami ana tubuga Yaubada gifolakena amine yo Yaubada yana faisewa u'abina.

Kadu'e, ka'i tamo hakwadi ginakivekoyomi, keke koyona againe yana koyona wanafatani. Gavaimi gilubodana moya'aidi matadiya, medemi wanahuluva.

Veyao againe wanamiyami yami nuwanuwa sa'eyana. Keke wananuwalaka au agetoga yana faisewa againe wanahawahegemi. Keke taumiyao nuwamiya wanakilakahimi vaita omi halamanimiyao.

E, keke omi wanalaufata tu Veyao Tuwaina ana buki gigahe amine wanahuluva. Gigayo, Ka'i ami tokivekoyo mafu gilauna, au wanave'ana. Ka'i agona gitaina, bwai wanaveyuna. Ka'i hidede amine wananuwakabubuyena, au vaita wadalukufuwani be yana wowomumu ginayemu.

Kadu'e kaliva hinakivekoyomi againe, Yaubada wanave'o'olena be ginanuwakabubuyedi. Adi nuwakabubu fa'ina wanave'o'ola, keke adi hawave'avina. Gaveyao hivemwavemwamwala, medema wanavemwamwalavaisedi. Gaveyao hitagitagi, medema wanatagivaisedi.

Hai Yaubada yana kaliva o yana vevine tamo gavadi againe hikali'uho, medema agaidiya wanafolakena. Wakawaka yami manuweya wanamaduvega'auledi.

Wa'ita, ide sa'eyana sa'eyana wowoda talaina moya'aina gidadauda, ada talaida tulina tulina yana faisewa tulina tulina. Meda anafaiweya ide Keliso yana kaliva yana vevine ma vaita Keliso wowona talaina. Ide au moya'aida tu Keliso buye kave'atutamo'aida fa'ina, ide Bana wowona sa'eyana kamimiyami. Ada kaliva wowona talaina tulina tulina buye give'ahavihavi amine ide Keliso wowona talaina buye kave'ahavihavi.