The Colloquial Galilean Bible (CGB) is an easy Bible to understand, particularly for children and youth. It is free in audio, video, and text. For free access or to support our ministry, contact us at www.aibible.org.
الكتاب المقدس (العهد الجديد) باللهجة العامية الجليلية هو كتاب سهل الفهم خاصة للأطفال والشباب. ونصوصه متوفرة مجانا في صيغ صوتية ومرئية ونصية. للحصول على هذه النصوص أو لدعم خدمتنا، الرجاء زيارة موقعنا على العنوان التالي:
www.aibible.org

ترجمة الكتاب المقدس باللهجة العامية الجليلية

من البداي كان الكلمة، والكلمة كان عند الله، والكلمة هو الله. من البداي كان حاضر عند الله كل إشي انخلق بالكلمة وبدونو فش إشي موجود. هو مصدر الحياة والحياة هي النور للناس والنور بضوي بالعتمة والعتمة مطَفَتُش.
الله بعت إنسان إسمو يوحنا. هو أجا عشان يشهد للنور وعشان يآمنو كل الناس بكلامو. وأجا عشان يشهد للنور بس هو مش النور. والنور الحقيقي نوّر عَكُل البشر وُ-وِصل ع الدنيا.
بالكلمة انخلق الكون، والكلمة كان في الدنيا بس الناس مَتعرفوش عليه. اجا عبلدو وجماعتُه مَاستقبلوهُش بس الناس اللي استقبلوه اعطاهن السُّلطة إنهن يصيروا أولاد الله. هدول هني اللي بآمنوا فيه. وهني المولودين من الله ومش من قرابة دم ولا من رغبة جسد ولا من إرادة إنسان.
والكلمة صار إنسان وسكن بيناتنا، وهيك شفنا مجدو، مجد ابن الآب اللي ما فِش زيو، واللي ملان بالنعمة والحق. يوحنا شهدلو وقال بأعلى صوته: حكيتلكو عنو وُقلت إنو اللي اجا بعدي كان قبلي لأنو أعظم مني. وهو ملان وبفيض علينا بنعمة ورا نعمة. لأنو موسى سلّمنا التوراة ويسوع المسيح هو طريق النعمة والحق ومحداش عمرو شاف الله. الله الابن اللي مَئِلُش مثيل والموجود في حضن الآب هو اللي بخلينا نشوف.
وبعتت الرئاسة اليهودية كهنة ولاويين من أورشليم لعند يوحنا عشان يسألوه: مين إنت؟، قر يوحنا وأعلن وقال: لأ أنا مش المسيح فسألوه: طيب مين إنت؟ إنت إيليا؟ فقلهن: لأ. سألوه: إنت النبي؟ فقلهن: لأ. وُسألوه: طيب مين إنت عشان نحكي للي بعتونا؟ كيف بتعرّف حالك؟ استعمل يوحنا كلمات النبي إشعيا وقال أنا: "صوت بَصرّخ في الخلا فحضروا الطريق قدام الرب". وكان في فريسيين مع الناس اللي أجو عند يوحنا. وسألوه: طيب ليش بتعمّد إذا إنت مش المسيح ولا إيليا ولا النبي؟ جاوبهن وقلهن: أنا بعمّد بالمي بس في واحد موجود بيناتنا وإنتو مش عارفينو هو جاي بعدي وأنا بستحقش أفك ربّاط صندلو. وهادا الحكي كان في بيت عنيا جنب نهر الأردن محل ما كان يوحنا يعمّد.
وتاني يوم شاف يوحنا يسوع جاي لعندو فقال: هياه الحمل اللي من عند الله واللي رَح يقضي على الخطيّة في العالم. هو الشخص اللي وصفته بالكلمات وقلت عنُو: اللي أجا بعدي كان قبلي لأنو أعظم مني وأنا مكنتش مكتشفو بس أجيت أعمّد بالمي عشان أخلي أهل إسرائيل يكتشفوه. وشِهِد يوحنا وقال: شُفت الروح نازل عليه زي مبتنـزل الحمامة من السما وبعدين ضل الروح عليه. ومكنتش مكتشفو بس اللي بعتنـي عشان أعمّد بالمي هو اللي قالي: اللي بتشوف الروح نازل عليه وُبِضَل عليه هادا هو اللي بعمّد بالروح القدس. وأنا شفت وبشهد إنو هادا هو ابن االله.
وكمان في تاني يوم كان يوحنا واقف مع 2 من تلاميذو ولما شاف يسوع ماشي قال: هياه الحمل اللي من عند الله. فلما سمعوا تلاميذ يوحنا هالحكي لحقوا يسوع. لف يسوع وِجّو وشافهن ماشيين وراه فسألهن: شو بدكو؟ فنادوه "رابي" ومعنى الكلمة "معلم". وسألوه: وين راح تقضّي الليلة؟ فقلهن: تعالو وشوفو. فراحو وشافو وين رَح ينام. وقضّوا بقية اليوم معو وكانت السيعة تقريبا 4 بعد الظهر. وكان أندراوس أخو سمعان بطرس واحد من ال 2 اللي سمعوا كلمات يوحنا ولحقو يسوع. وأول ما شاف أندراوس أخوه بطرس قَلو: لاقينا المشيح. ومعنى الكلمة المسيح. وبعدين أخذو لعند يسوع. ولما شافو يسوع قالو: إنت بطرس ابن يوحنا، رَح نسميك كيفا. ومعنى الكلمة صخرة.
وتاني يوم لما كان يسوع بدو يطلع ع الجليل شاف فيلبس وقَلُّو: انضم لجماعتي. وكان فيلبس من بيت صيدا وهي نفس بلد اندراوس وبطرس. وبعدين شاف فيلبس نثنائيل وقالو: لاقينا الشخص اللي كتب عنو موسى في التوراة وكتبو عنو الأنبياء، يسوع ابن يوسف من الناصرة. فقالو نثنائيل: معقول يطلع من الناصرة إشي منيح؟ فقالو فيلبس: تعال وشوف. لما شاف يسوع نثنائيل جاي لعندو قال عنو: هادا الزلمة إسرائيلي مية بالمية بدون غش. فسألو نثنائيل: من وين بتعرفني؟ رد عليه يسوع وقالو: شفتك تحت التينة قبل ما يحكي معك فيلبس. جاوبُه نثنائيل وقالو: رابي، إنت ابن الله وإنت ملك إسرائيل. فقالو يسوع: آمنت عشان قلتلك إنو شفتك تحت التينة؟ رَح تشوف أشياء أعظم من هيك. وقال يسوع: عنجد بقَلُكو، رَح تشوفوا السما مفتوحة وملايكة الله طالعة ونازلة على ابن الإنسان.

듣기 يوحنا 1