Akpaar-aponga 14
14
Ọbada kw'Samson
1Wa Samson ọta kha Timna, ọta ose uminanwa wạnọ kw'ubin Philistiya. 2Masẹ ukwun o, n'ọta ọkpaak otte ọttạra ọkka bẹ́, “Amma k'oPhilistiya-kwanạng nsia kha Timna; abạnga atạkh-ẹ anạng-m ode ikwanạng kwaam.”
3Otte ọttạra ọkka abhin bẹ́, “N'ode bẹ́ aminava akkapẹ nawor-owor k'ichimma chọ tạrr, oseng ẹkhạma ch'anạng pamạna, kw'ọma n'afon k'anạng p'Philistiya, p'nạn ọkpọkkrọkkọ násia bẹ́, ata atạkha ikwanạng o?”
Tạrr oseng ma, Samson obeni otte bẹ́, “Ẹma nwọ wọ ọdaakhẹ amma. Atạkh-ẹ anạng-m, mba.” 4(Wa otte ọttạra ọkka kásong bẹ́ akwẹ ubin k'Ọvaar Ubinọkpaabyi, kw'n'oben bẹ́ osenga ma, ọnạng aPhilistiya irem; ukwuru bẹ́ wa anạng p'Israẹl aning k'isekhisek kw'abẹ.)
5Ma wọ Samson utim otte ọttạra ọkka ofona kha Timna. Masẹ sabẹ akpir k'iwonu s'agrep k'ofhon kw'Timna, ekke iyin mạma n'isi ẹmạng, n'esenga efora Samson. 6Iguguma s'Ọvaar Ubinọkpaabyi s'ẹfa inwa Samson inạng-ẹ ẹfa ch'utim mbọhk-mbọhk ọvạkha ekke ọyaakhẹ, aben bẹ́ ọyaakhẹ uvu-nwa. Okhenkha, ẹma wa otte ọttạra ọkka udik kw'kk'usia nọ́kpaakha. 7Osenga ọsạkha okhebha ikwanạng nwọ, abẹ akpaak idik, ukwu ọkhaama ikwanạng nwọ abẹ idạdaakha.
8Masẹ ọkpa nnạm k'okpe ọdwạkh-ọdwạk bẹ́ ọta usi ọbada k'ọkwanạng-nwa nwọ, n'ọbhạkhẹ ichen okkeri k'ibyi s'okke-bukhu iyim, n'ose s'akhọhn-kpa ọttạra ọkhọhn kha okke-bukhu ẹtaanga. 9Ukwu onemi ọbọhk ọgwọhngọ ọkhọhn mvọ, n'ọttaakhẹ otor eden. Masẹ ofon ọta okhebha ọkka ọttạra otte, ọtạkha ọkhọhn mvọ ọnạng bẹ, abẹ attaakhẹ attạra, okhenka, wa bẹ nọ́kpaakha bẹ́, ọtạk pfẹ k'okke-bukhu.
10Wa otte otte ọtwạnọ abẹ, abẹ ata k'uminanwa nwọ. Samson usi erobha ch'ọbada ma otor k'ẹmmaana ch'adikkobh-va. 11Masẹ anạng p'Philistiya asiẹ-ẹ, abẹ atekha adikkobh anạng ẹrạbh ukuma jobh anạng-ẹ, masẹ ayokh-ikhaana pẹ.
12Wa samson obeni bẹ bẹ́, “Tte ntta bạnga oche. Ode abạnga m'akke anạng-m ẹyaakha ch'oche ngwa k'iwu nna isenọfa s'erobha nja, amma m'nnạng bạnga anọhma-baba ẹrạbh ukuma jobh p'abẹ atim ndikhi ọkkakka ayok, ọttạra ọvạra-cho ẹrạbh ukuma jobh. 13De abạnga nạn khaam ẹyaakha nákkia anạng, oyonga abạnga m'anạng-m anọhma-baba ẹrạbh ukuma jobh p'abẹ atim ndikhi ọkkọkka ayok, ọttạra ọvạra-cho ẹrạbh ukuma jobh.”
Adikkobh-va mba abhina bẹ́, “Tte mạna oche ngwọ ammaanga kh'anse.”
14Samson ọbẹ́:
Uchiattọhk ubin k'ọnạng kw'uchi ọttọhk;
Orebh ubin k'ọnạng kw'ọkhaam ẹfa.”
K'iwu ittaan, abẹ ẹyaakha ch'oche ngwọ nákkia anạng.
15Ottong iwu innebung, abẹ ata aben ikwanạng kw'Samson aben-ẹ bẹ́, “Bọhra udim ọkpaak mạna oche kw'oche kwẹ uyini, deja, m'ankkạmọ ọma ọttạra ẹchọhmfhạr ch'atte phyibh e. Abạnga abheri mạna bẹ́ abạnga akwu afu mạna ekpo?”
16Ma wọ ikwanạng kw'Samson otto ọbạnga udim ma k'ifor, n'ọgạma oben bẹ́, “Amma khọ nạ́ndaakha! Idạdaakha rạnẹ-rạnẹ kákhaam abamẹ! Kk'anạng paam oche atta, okhenka, khaam ẹyaakha ch'oche ngwọ tạm nánạnga.”
Samson ọpọhn bẹ́, “Amma otte ọttạra ọkka kwaam tạm nạ́ntekha k'oche kw'akwẹ uyini, m'nsi yạn ntek ọma o?” 17Wa ọgạm ẹmạng njọ k'iwu nnọ isenọfa phyibh s'erobha. Ottong iwu isenọfa nnọ, Samson n'otekh-ẹ oche kw'oche ngwọ uyini, ukwuru s'ofon ororo ọkpạn-ẹ. Mạnna wọ ikwanạng nwọ ọbhạkhẹ usi ẹyaakha ch'oche ngwọ, ọnạng anạng pẹ.
18Bạrasẹ n'ukpir k'ẹchọhkha ch'iwu njọ ch'ettong iwu isenọfa, ajunung p'ofhon ngwọ abeni Samson bẹ́,
“Mbạng vọ f'orebhi oyọhnga ọkhọhn o?
Mbạng vọ f'ọkhaam ẹfa ọyọhnga ekke o?”
Samson n'obeni bẹ bẹ́,
“Ode wạra abạnga nạn ikwanạng kwaam k'ẹfa návạkha,
wạra ọnạng kw'm'utin oche kwaam kòde.”
19Ma wọ ọkpaakpa s'Ọvaar Ubinọkpaabyi ch'ẹfa inwa Samson. Osenga ọsạkha kha Ashkẹlọn, ọta ọfhọ anạng ẹrạbh ukuma jobh k'ajunung pabẹ. Ọwạra bẹ ekpo phyibh, ọtạkha pyẹ ọta ọnạng anạng ajunung mbọ ma p'atini oche kwẹ. Utima idwạdwạkhọ ọkpa nnạm, ọbhạna k'otte k'ọchọhm. 20Wa abẹ atạk ikwanạng kw'Samson, anạng udikkobh wạnọ ma k'ikhaana nnọ s'uwa isi erobha ch'ọbada kw'Samson.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Akpaar-aponga 14: mfn-x-os
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©️2025 West Africa Christian Mission