1 Samwẹl 9
9
Samwẹl obyeng Saul ana k'echo
1Wa ọkhaam ujunung wạnọ kw'uyini eche, kw'ubin k'efonamma ch'Bẹnjamin, kw'okpen Kish. Ẹma ode nnwa kw'Abiyẹl. Abiyẹl ode nnwa kw'Zẹrọ, kw'ode nnwa kw'Bekorat, kw'ode nnwa kw'Aphiya kw'ubin Bẹnjamin. 2Kish ofhonu nnwa kw'okpen Saul, kw'ujibhi idikkobh, ọbạra ufu k'ifor, ebe chẹ egoru ẹyọhnga ch'anạng phyibh. Ọnạng kw'obeng abẹ k'efhonfhạr ch'Israẹl kòde.
3Wa nnyạnyaang s'Kish kw'ode otte kw'Saul ikwu idimi. Ma wọ Kish obeni nnwa kwẹ Saul bẹ́, “Tạkha ọtọhmnạng wạnọ, ata aror nnyạnyaang nnọ.” 4Ma wọ osengi k'akpedcho p'Ephraim, ọttạra k'ukhubha kw'Shalisha, okhenka, abẹ nnnyạnyaang nnọ násia. Abẹ n'afon k'ukhubha kw'Shaalim, okhenka, abẹ sẹ násia. Ma wọ abẹ n'asengi k'ukhubha kw'Bẹnjamin, okhenkha, abẹ sẹ nábạra asia.
5Masẹ abẹ akpir k'ẹkhạma ch'Zuph, Saul oben ọtọhmnạng kwẹ kw'abẹ atwạnọ bẹ́, “Tte amkpa nnạm, deja otte kwaam m'ọyaanga udik kw'nnyạnyaang ọjẹ, oponga kwamạna e.”
6Okhenkha, ọtọhmnạng nwọ ubhina bẹ́, “Kkeri, ọkhaam usi-ẹyaakha mạnna wạnọ kw'Ubinọkpaabyi ma ofhon ngwa. Ẹma ode ọnạng kw'anạng n'anạng ikpukpobha sididen, ọttạra bẹ, udik kwidede kw'ọkpaakhẹ n'ọkhaama ẹyaakha. Tte amạna amfona kha, nudusi, m'ọkpaak mạna eden ch'm'ansenga.”
7Ma wọ Saul ubhin ọtọhmnạng kwẹ bẹ́, “Ode amfon ma, bạng ọttọhk vọ m'annạng ujunung nwọ s'ode bẹ́, uchiattọhk f'antim kk'ọsa o? Ọttọhk kànkhaam f'm'anta annạng usi-ẹyaakha nwọ kw'Ubinọkpaabyi. Mbạng vọ ankhaam o?”
8Ọtọhmnạng ọbạra ubhin-ẹ bẹ́, “Kker e, amma nkhaam shẹkẹl ibhaakha sa silva ma, p'm'nnạng ọtọhmnạng kw'Ubinọkpaabyi, ọfha ọkpaak mạna eden ch'm'ansenga.” 9Wa k'Israẹl, de ọnạng ofon bẹ́ ọta ọdwạn udik kw'ọphyang-ẹ ẹmma k'Ubinọkpaabyi, m'oben bẹ́, “Tte amfona kha ose-iyaan e,” ukwuru bẹ, usi-ẹyaakha kw'chemma wọ kw'uwa abẹ n'ayeri ose-iyaan.
10Ma wọ, Saul ubhin ọtọhmnạng kwẹ bẹ́, “Ujibhi ma, kwu amfona.” Ma wọ, abẹ abin osenga afona k'ofhon ngwọ kw'usi-ẹyaakha kw'Ubinọkpaabyi uning.
11Masẹ abẹ n'avura okpecho afona k'ofhon ngwọ, abẹ akhebha aminava bạnọ p'akwu bẹ, akwu atwạr asi k'isipe, abẹ abạbh bẹ bẹ́, “Ose-iyaan uning ma o?”
12Aminava mbọ abhina bẹ́, “Uwee, ẹma uning k'ororo e, abạnga awa mfhok; kkeri chemma wọ ukwu kamạna k'ofhon, ukwuru bẹ, anạng mba akhaam ẹja ch'abẹ m'afọhnọ k'ijabyi. 13Ode abạnga anwa k'ofhon bẹẹ abạnga m'ase-ẹ ose brasẹ ọta uchi ọttọhk k'ijabyi. Anạng ọttọhk máchi tạrr ukpira, ukwuru bẹ́, oyonga m'ose njọhm ma ẹja njọ, de ọsa, brasẹ anạng p'abẹ abheri n'achi ọttọhk. Abạnga afona kha mantọmma khiri abạnga m'akhebh-ẹ okhebha ma okpe demakwẹ ngwa.”
14Ma wọ abẹ abin afona k'ofhon ibir-ibira, masẹ abẹ n'anwa k'ofhon, abẹ ase Samwẹl, n'osenga ọgbaara bẹ k'ifor bẹ́, ofona k'ijabyi.
15Iwu ch'echobh njọ ch'Saul ukwu k'ofhon, Ọvaar Ubinọkpaabyi kk'ẹyaakha ch'udik ngwọ usia ọnạng Samwẹl bẹ́, 16“Uphyini k'okpe demakwẹ ngwa, amma m'ntọhm ujunung wạnọ kw'ubin k'ẹnạmma ch'Bẹnjamin nkken-ọ. M'abyeng-ẹ ana k'echo, ọfha ode ọdạbhẹ kw'anạng paam p'Israẹl; ẹma wọ m'orengi anạng paam k'irem s'aPhilistiya n'anạng. Amma kk'irem s'anạng paam n'adọhbh nsia, kk'ẹmmạng ch'abẹ agạm mbạra mmaanga.”
17Masẹ Samwẹl ose Saul, Ọvaar Ubinọkpaabyi oben-ẹ bẹ́, “Ujunung nwọ kw'mkpaakh-ọ udik nkwuru wọ ma; ẹma wọ m'ọdạbh anạng paam.”
18Ma wọ Saul osenga okhebha Samwẹl k'ẹbaakhama ọbạbh-ẹ bẹ́, “Totokhạn kpaakh-m, ọchọhm kw'ose-iyaan uning mạn yeri?”
19Samwẹl ubhina Saul bẹ́, “Amma wọ nde ose-iyaan nwọ e. Ọma chi-m eden vura fona k'ijabyi, khiri chemma, m'achi uchiattọhk abamẹ, ode iwu echobh ma, m'mkpaakh-ọ udik kwidede kw'ọphyaang-ọ ẹmma kha k'ettem, brasẹ n'nte-ọ ọbọhk afona. 20De n'ode nnyạnyaang s'idim-ọ k'iwu ittaan s'kk'isenga, tte ettem nạng-ọ ẹmma ẹphyaangẹ, khiri abẹ kk'sẹ asia. Efhonfhạr ch'Israẹl bẹ́ phyibh eroru anẹ o, de nạn ọma ọttạra efonamma chọ phyibh núdia?”
21Ma wọ, Saul ubhin bẹ́, “Amma mbin k'ẹkhạma ch'Bẹnjamin, ch'ẹsạk ọtạm k'Israẹl, efonamma chaam sạng ẹsạk ọtam k'nkhạma s'Bẹnjamin o? N'oseng yạn kw'akpaakh-m udik demakwẹ ngwama o?”
22Ma wọ, Samwẹl utim Saul, ọttạra ọtọhmnạng kwẹ abẹ anwa k'ọchọhm, ọnạng bẹ iningabyi k'ibyi s'ibạrẹ ọtạm iyonga s'anạng p'abẹ abheri. Wa anạng p'aning ma akpir anạng ẹrạbh ukuma jobh. 23Samwẹl oben ọnạng kw'ọwọhnọ uchiattọhk f'ininga njọ bẹ́, “Tima etenkhuma njọ ch'wạra nnạng-ọ kwu, njọ ch'wạra mben-ọ bẹ, akhạmọ achok.”
24Ma wọ, ọwọhn-uchiattọhk nwọ ọta ọtạkha ọtaak kw'eten njọ, ọttạra ekpo p'ẹtạr ma, obera Saul ma ititikha. Samwẹl oben bẹ́, “Ma wọ ode ọttọhk pf'abẹ achokh-ọ. Chi, ukwuru bẹ́, abẹ aseng ọmabẹ achok pfẹ, tạma m'ogbe ngwọ kw'mbeni bẹ́, ‘Amma kk'anạng erobha m'mera.’” Mạna wọ ma iwu njọma, Saul uchi ọttọhk Samwẹl abẹ.
25Masẹ abẹ abin k'ijabyi asạkha k'ofhon, Samwẹl ọttạra Saul akpaak ayok abẹ idik k'ẹrạng kw'ọchọhm, k'ibyi s'Saul uyim. 26Masẹ abẹ aphyạbh k'ekpebha, Samwẹl oyeri Saul k'ọchọhm ẹrạng oben-ẹ bẹ́, “Do ifor oche kw'm'ntọhm-ọ akpa nnạm abhạna.” Saul odo ifor bẹ phyibh, ẹma ọttạra Samwẹl atwạn ayin k'iyaan. 27Masẹ abẹ n'asenga abaanga erem ch'ofhon, Samwẹl obeni Saul bẹ́, “Ben ọtọhmnạng kwọ uchi mạna eden.” Ọtọhmnạng o, oseng. Samwẹl oben adạkhẹ Saul bẹ́, “Ọma m'akhenka aninga ma k'okpe nwa, ọfha mkpaakh-ọ ẹkkaabha ch'ibin k'Ubinọkpaabyi.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 Samwẹl 9: mfn-x-os
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©️2025 West Africa Christian Mission