1 Samwẹl 1
1
Ẹmmaana ch'Samwẹl
1Wa ọkhaam ujunung mạnna wạnọ kw'okpen Ẹlkana, kw'ubin Rama, k'ukhubha kw'Zuph, k'okpecho kw'Ephraim. Ẹma wa ode nnwa kw'Jeroham. Jeroham wa ode nnwa kw'Elihu, Elihu ode nnwa kw'Tohu, kw'Zuph kw'ubin Ephraim ofhonu. 2Ẹlkana wa ọtạk ipanạng afa p'akpen Hana ọttạra Pẹnina. Wa Pẹnina ọmaanẹ iva, okhenka, Hana nnwa nọ́maana.
3Wa cho kwidede, Ẹlkana n'ubina kakhẹ k'ofhon ofona k'Shilo bẹ, ọta okpobha Ọvaar Ubinọkpaabyi kw'Ẹfa phyibh, ọbạra ọfọhnọ ẹja ọnạng-ẹ. Wa iva afa p'Ẹli p'ade Hophini ọttạra Phinẹhas ade afọhnẹja p'Ọvaar Ubinọkpaabyi k'Shilo. 4De ukpir k'okpe kw'Ẹlkana m'ọta ọfọhnọ ẹja, m'okhebh nten ọnạng Pẹnina, ọttạra iva pẹ phyibh, ajunung ọttạra ipanạng. 5Okhenkha, wa n'ọnạng Hana okhebh f'ode ibyi ifa oche kw'ọnạngẹ oyok, ukwuru idạdaakha s'ọkhaam Hana abẹ, ọttạra bẹ́, Ọvaar Ubinọkpaabyi Hana ọmaan nọ́nạnga. 6Wa ọfhạbha kw'Hana n'unnukh-ẹ ọfha osenga ma, ettem ipyibh-ẹ, ukwuru s'uwa Ọvaar Ubinọkpaabyi nạn Hana ọmaan nọ́nạnga. 7Wa innukhu njọ efon ororo k'icho kwidede. K'okpe kwidede kw'Hana ofon k'ọchọhm kw'Ọvaar Ubinọkpaabyi, oyok-ọfhạbha m'unnukh-ẹ tạrr Hana bạra ọgạma, ọbạra ufhum uchiattọhk. 8Ẹlkana kw'ode udim kwẹ bạra ọbạbh-ẹ bẹ́, “Hana, n'agạma mbạng o? Asi yạn afhum uchiattọhk chichi o? Imạmạna sọ ide yạn? Tọttọ amma oyeni khọ udik nạ́mbạra nyọhnga ajunungva jobh?”
9Wa iwu jạnẹ k'Shilo ma sabẹ kk'uchiattọhk achia phyibh, abẹ akkera atwuk agwo, Hana ubina obe. Ma okpe ngwọ, Ẹli kw'ode ọfọhnẹja uning ẹyạr k'ogbera kw'n'uninga k'ẹkpọmmachi ch'ọchọhm kw'Ọvaar Ubinọkpaabyi. 10K'imạmạna s'ining-ẹ k'ẹttem, Hana ọgạm, ose njọhm ọnạng Ọvaar Ubinọkpaabyi. 11N'ọtạk echekha bẹ́, “O Ọvaar Ubinọkpaabyi kw'Ẹfa phyibh, ode nạngka ase imạmạna s'amma ọtọhmnạng kwọ, abạra ajim-m, akhenka anạng-m ujunungnwa, amma m'ntạkh-ẹ nnạng-ọ k'akpen pẹ phyibh, ẹgọbha jạnẹ-jạnẹ isisira sẹ mítwu mesese.”
12Oche ngwọ kw'Hana ofon ororo n'ose njọhm ọnạng Ọvaar Ubinọkpaabyi, Ẹli n'ogẹ-ẹ utum k'ẹmma. 13Wa Hana n'ose njọhm k'ettem ẹtaanga, mmakpa sẹ rọ n'iyebh, okhenka, ọtọhnga k'iyaan núyina. Ma wọ, Ẹli n'ọkkẹ bẹ, Hana kk'atwuk ubuma. 14N'oben-ẹ bẹ́, “Okpe m'ubhir ukpira yạn kw'm'aninga k'itwuk-buma o? Kuma itwuk-gwua khadẹ.”
15Ma wọ, Hana n'ubhin-ẹ bẹ́, “Attitte kwaam, oche ngwọ núdia e. Amma nde ikwanạng kw'imạmạna ifu-ẹ k'ettem. Atwuk nạ́ngwua a, amma n'mkpaak Ọvaar Ubinọkpaabyi imạmạna s'ining-m k'ettem. 16Amma ọtọhmnạng kwọ masẹ ikwạnạng-tạma kátạkha. Amma n'nse njọhm ukwuru ọmmaphyaangẹ kwididen ọttạra ottempyibh kw'uning-m maa e.”
17Ma wọ, Ẹli ubhin-ẹ bẹ́, “Sọhng k'idira. Tte Ubinọkpaabyi kw'anạng p'Israẹl n'akpobha, ọnạng-ọ fidede f'kk-ẹ aphyema.”
18Hana ubhin-ẹ bẹ́, “Tte amma ọtọhmnạng kwọ nkhaama ọphyaam k'akhọ k'ititikha.” Ma wọ n'ofon ọta uchi uchiattọhk, ititikha ikpira.
19Pạmpạmạm k'ekpebha, abẹ abina ata akpobha Ọvaar Ubinọkpaabyi, brasẹ abẹ n'akpa nnạm k'abẹ k'ofhon k'Rama. Ma o, Ẹlkana uyima Hana abẹ, Ọvaar Ubinọkpaabyi ọbhaanga njọhm s'Hana. 20Ukwu ukpir k'okpe ma, Hana utima ifhạr ọmaan ujunungnwa, ukpuẹ-ẹ Samwẹl#1.20 Samwẹl, k'eHibru iyini oche kw'wạra ọnạng m'oben bẹ́, “Eche chẹ ede Ubinọkpaabyi.” Hana ọnạngẹ nnwa kwẹ eche njọ ọfha utima ọnạng Ọvaar Ubinọkpaabyi, kw'ode Ubinọkpaabyi kw'Israẹl ikpukpobha, s'ọbhaang njọhm sẹ, ọnạng-ẹ f'ororu ọbạbh-ẹ., oben bẹ́, “Mphyem-ẹ k'Ọvaar Ubinọkpaabyi.”
Hana otte Samwẹl ọbọhk ọnạng Ubinọkpaabyi
21Masẹ Ẹlkana utim ẹchọhmfhạr chẹ phyibh ofona k'ọchọhm kw'Ọvaar Ubinọkpaabyi, ọfha ọta ọfọhnọ ẹja ch'cho, ọbạra utwuk echekha chẹ, 22Hana nọ́ta. Obeni udim bẹ́, “Ode kk'nnwa ẹba nkuma, m'ntạkh-ẹ nkkena Ọvaar Ubinọkpaabyi k'ọchọhm kwẹ, m'uruk ma k'akpen pẹ phyibh.”
23Ma wọ Ẹlkana ubhin-ẹ bẹ́, “Si oche kw'abeni, ninga ma tạrr akum-ẹ ẹba. Tte Ọvaar Ubinọkpaabyi okhenka ochok echekha ch'atim pọ.” Ma wọ, ikwanạng nwọ uning ọrạk nnwa kwẹ tạrr ukum-ẹ ẹba.
24Masẹ kk'nnwa ẹba ukuma, ọtạkh-ẹ s'utim ọsạkh-ọsạkha, ọttạra ọbhaam-nwa kw'icho ittaan, ọttạra ẹgbangbang-dim ch'agwu-akhokh'apẹ, ọttạra itwuk-gbạre utima ofona k'ọchọhm kw'Ọvaar Ubinọkpaabyi k'Shilo. 25Masẹ abẹ kk'ọbhaam-nwa nwọ afha atima afọhnọ ẹja, abẹ atạkha nnwa nwọ akkena Ẹli. 26Hana n'obeni Ẹli bẹ́, “O attitte kwaam, totokhạn, k'oche kw'aruk akpen afona ororo, amma nchekhi k'akpen pọ bẹ́, amma wọ nde ikwanạng nwọ kw'uwa obe ma ose njọhm ọnạng Ọvaar Ubinọkpaabyi e. 27Amma wa nse njọhm mphyẹm Ọvaar Ubinọkpaabyi nnwa nwa, ma o, kk'ephyema chaam ọbhaanga e. 28Ma wọ, amma n'ntạk nnwa nwa nnạng Ọvaar Ubinọkpaabyi e. Ẹma n'ode kw'Ọvaar Ubinọkpaabyi k'akpen pẹ phyibh.” Abẹ atwunga anạng Ọvaar Ubinọkpaabyi ikpukpobha ma.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 Samwẹl 1: mfn-x-os
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©️2025 West Africa Christian Mission