Къанун 24
24
1Пуланав чияс лъади ячани ва, цадахъ гӀумру гьабизе лъугьиндал гьелъулъ цо рекъечӀеб жоги батун, гьей гьесие рихани, гьес ятӀа гьайиялъул кагъат хъвазе бегьула ва, гьебги гьелъухъе кьун, гьей жиндирго рокъоса нахъе йитӀизе бегьула. 2Гьесдаса ятӀалъун хадуй гьей цоги чиясе росасе ине бегьула. 3Амма кӀиабилев росасеги гьей рихани ва, ятӀа гьайиялъул кагъатги кьун, гьесги жиндирго рокъоса нахъе йитӀани яги гьелъул кӀиабилев рос хвани, 4тӀоцевесев росасул ихтияр гьечӀо цӀидасан гьей ячине, щайгурелъул гьесие гьей хӀарамай йикӀуна. Гьединаб иш БЕТӀЕРГЬАНАСЕ кутакалда рихараб буго. БЕТӀЕРГЬАН Аллагьас нужее кьураб ракь гьединал мунагьаздалъун хъублъизабуге.
5Гьанжего гьанже лъади ячарав чи рагъде витӀизе бегьуларо, ялъуни цоги батӀияб борч гьесда тӀад лъезе бегьуларо. Виччанте гьев цо лъагӀел инегӀан, жиндирго ячарай лъадиги рази гьаюн, парахат рокъов вукӀине.
6Гъоркьлъалие кверзул гьобо ва гьелъул тӀасияб рахъцин босуге, щайгурелъул гьеб бащалъула инсанасухъа гьесул чед-хинкӀ бахъиялда.
7Лъицаниги жиндирго вац гӀизраилав викъани ва лагъ хӀисабалда хӀалтӀизавуни яги гӀарцухъ вичани, гьев тӀадги ккуни, гьев чи чӀвазе ккола. Гьединаб квешлъи нужедаго гьоркьоса нахъе тӀагӀинабе!
8Барасалъул унтуда хурхун, кинабго тӀубазабе Левийил къавмалъул кашишзабаз малъухъе. Нужеца мухӀканго тӀубазабизе ккола дица гьезие амру гьабунщинаб жо. 9Нуж Мисриялдаса рачӀунелъул Дур БЕТӀЕРГЬАН Аллагьас Марямие гьабураб кӀочонге.
10Дуца лъиениги къарзалъе гӀарац кьолеб бугони, гьелъухъ гъоркьлъалие жо босизе гӀоло, гьесул рокъове жаниве лъугьунге. 11КъватӀивехунго чӀа, ва дуца къарзалъе гӀарац кьолес жинцаго къватӀибе босун бачӀине те гъоркьлъел. 12Гьев мискинав чи ватани, гъоркьлъалие гьес кьураб гӀаба къаси кьижилалде нахъе щвезабе. 13Бакъ тӀерхьиналде гьеб нахъе кье. Цинги гьесие рес букӀина жиндирго гӀабаги тӀад бан кьижизе ва гьесул ракӀги дудаса бохила. Гьебмехалъ БЕТӀЕРГЬАН Аллагьги дуда разилъила.
14Ккун вачарав мискинав пакъирав хӀалтӀухъан къварид гьавуге, гьев дур ракьцояв ватаниги яги чияр ракьалдаса вачӀарав, дур улкаялъул шагьаразул цоялда чӀарав чи ватаниги. 15Гьебго къоялъ бакъ тӀерхьиналде гьесие хӀалтӀухъ харж кье, щайгурелъул гьев мискинчи вугелъул ва гьеб харжалда бараб гӀумру бугелъул гьесул. Гурони гьев гӀарз бахъун БЕТӀЕРГЬАНАСДЕ къварилъахъдила, мунги мунагьалъукье ккела.
16Лъималазул такъсир сабаблъун умумул чӀвазе бегьуларо, умумузул такъсир сабаблъун лъималги чӀвазе бегьуларо. Щивав чи жиндирго такъсир сабаблъун хвела.
17Апарагасулги бесдаласулги ихтиярал хвезаруге, къоролалъухъа гъоркьлъалие партал босуге. 18Дуда кӀочонге мунгоги Мисриялда лагълъун вукӀаравлъи ва дур БЕТӀЕРГЬАН Аллагьас мун гьениса тархъан гьавуравлъи. Гьединлъидал гьал дир амраби тӀуразаре.
19Лъилъарулеб мехалъ дуда хуриб гул кӀочон тани, гьелда хадув тӀад вуссунге, биччанте гьеб апарагзабазеги, бесдалазеги, къоролзабазеги букӀине. Гьебмехалъ БЕТӀЕРГЬАН Аллагьас дуца гьабулебщиналда баракат лъела. 20ГъутӀбуздаса, тӀилица бухун, зайтун гъенезабулеб мехалъ, кӀиабилеб нухалъги тӀад вуссун, хутӀа-кӀучараб зайтун гъенезабуге. ГъутӀбузда тӀад хутӀараб жо апарагзабазеги, бесдалазеги, къоролзабазеги те. 21ЦӀибил бакӀарулеб мехалъ, гъабуялда жеги щибниги хутӀун бугищали хал гьабуге. Гьениб хутӀараб жо апарагзабазеги, бесдалазеги, къоролзабазеги те. 22Дуда кӀочонге мунгоги Мисриялда лагълъун вукӀаравлъи, гьединлъидал гьал Дир амраби тӀуразаре.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Къанун 24: АварАК
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Институт перевода Библии, 2005-2023