Къанун 21
21
ТӀатичӀел такъсирал
1Дуе БЕТӀЕРГЬАН Аллагьас кьолеб бугеб ракьалда кибгӀаги гӀалахалда инсанасул жаназа батани ва гьев чи лъица чӀваравали лъазе рес гьечӀони, 2биччанте нужер кӀудиял чагӀазги диванчагӀазги гьеб бакӀалдаса сверухъ ругел шагьаразде бугеб манзил борцине 3ва бищун гӀагардегӀанасеб шагьар тӀаса бищизе. Биччанте гьеб шагьаралъул кӀудиял чагӀаз бачине жеги гарбида рукьги бачӀеб, хӀалтӀизабичӀеб гӀачӀар. 4Хадуб гьез гьеб лъарал рагӀалда бугеб авлахъалде, жеги кидаго хьонги хьачӀеб, хурги бекьичӀеб бакӀалде бачина ва гьениб гьеб гӀачӀаралъул габур бекила. 5Левийил наслуялъул кашишзабиги рукӀине ккола гьенир. Гьеллъидал БЕТӀЕРГЬАН Аллагьас тӀаса рищарал Гьесие хъулухъалъе чӀезе ва нужее дугӀаги гьабизе. Гьезул рагӀудалъун лъугӀизе ккола бокьараб дагӀба-къец ва кьал. 6Хадуб гьеб жаназа батараб бакӀалдаса бищун гӀагарда бугеб шагьаралъул кӀудиял чагӀаз, лъарахъ габур бекараб доб гӀачӀаралда тӀадги ккун, кверал чуризе ккола. 7Биччанте гьез абизе: ‘Нижер квераз гьев чиясул би гӀодобе тӀечӀо, нижер беразда гьебги бихьичӀо. 8Я БетӀергьан, тӀасалъугьа, Дуцаго хвасар гьабураб Дурго халкъ ГӀизраилил агьлуялдаса. ГӀайиб гьечӀого гӀодобе тӀураб биялъухъ Дурго халкъ гӀизраилал жавабалде ахӀуге’. Гьебмехалъ гьеб биялъул гӀайиб нужеде ккеларо. 9Гьедин БЕТӀЕРГЬАНАСУЛ амру тӀубазабиялдалъун, нуж чияр биялъул гӀайибалдаса рацӀцӀадаллъун рукӀина.
Асирай лъадилъун ячин
10Рагъ ккараб мехалъ, БЕТӀЕРГЬАН Аллагьас тушбаби нужер кверде кьедал ва дуца гьел асирлъуде рачиндал, 11нагагь асиразда гьоркьой берцинай чӀужугӀадан йихьани, гьелъухъ рокьи ккани ва гьей дуего ячине бокьани, 12гьей дурго рокъое яче. Биччанте гьелъ бетӀерги кӀкӀвазе, малъалги къунцӀизе, 13асирлъиялъул ретӀелги хисизе#21:13 Гьеб киналъулго магӀна ккола гьелъ жиндирго халкъалъулгун бухьен къотӀизабулеб бугин ва ГӀизраилил халкъгун цолъулей йигин абураб. ва, жиндирго эбел-инсухъги гӀодулаго, цо моцӀалъ дур рокъоб гӀумру гьабизе. Гьелдаса хадуб мун гьелда аскӀове ине ва гьелъул рослъун вахъине бегьула – гьейги дур лъадилъун лъугьина. 14Нагагь гьей дуе рекӀее гӀолей гьечӀони, дуца гьей жиндиего бокьаралъуе ине йиччанте. Дур ихтияр гьечӀо гьей йичизе ялъуни лагълъун гьайизе, щайгурелъул дуца гьелъулгун бусен гӀахьал гьабидал.
Бищун кӀудияв васасул ихтиярал
15Пуланав чиясул кӀиго лъади йигони: цо йокьулей, цогидай йокьуларей, кӀиязулго васалги ругони, амма бищун кӀудияв вас йокьуларей лъадуца гьавурав вугони, 16лъималазда гьоркьоб ирс бикьулелъул, бищун кӀудияв васасе букӀине кколеб бутӀа, йокьуларей лъадул васги махӀрум гьавун, йокьулей лъадул васасе кьезе бегьуларо. 17Йокьуларей лъадул вас тӀоцеве гьавурав вукӀиналда разилъизе ккола гьев ва гьесие кьезе ккола кинабго жиндирго мал-мулкалдаса кӀиго нухалъ цӀикӀкӀараб бутӀа, щайгурелъул гьев вуго гьесул бихьинаб къуваталъул тӀоцебесеб чӀил, тӀоцевесев васасул ихтияралги гьесухъ рукӀуна.
МукӀурлъуларев васасул хӀакъалъулъ
18Лъилниги вугони къосараб гӀамалги бугев, малъарабги гьабуларев, кигӀан тамихӀ гьабуниги эбел-инсухъги гӀенеккуларев вас, 19биччанте инсуцаги эбелалъги гьев вачине шагьаралъул кавабахъе#21:19 Шагьаралъул кавабахъ букӀунаан цебе заманалда годекӀан. ГӀемерисеб жамгӀияб суал гьенибе босулаан ва гьениб диванги къотӀулаан. кӀудиял чагӀазда цеве. 20Гьез кӀудиял чагӀазда абизе ккола: ‘Нижер васасул мекъаб гӀамал буго, малъарабги гьабулеб гьечӀо, нижехъ гӀенеккулевги гьечӀо. ГӀицӀго кваназеги гьекъолдизеги лъала гьесда’, – ян. 21Гьебмехалъ шагьаралъул тӀолалго бихьиназ ганчӀица чӀвазе ккола гьев. Гьединаб хӀалихьалъи нужеда гьоркьоб тоге; ккараб жо киналго гӀизраилазда рагӀидал, гьел хӀинкъила гьединаб жоялдаса.
БатӀи-батӀиял къанунал
22ЧӀвазе мустахӀикъаб такъсиралъухъ тамихӀги гьабун, лъил букӀаниги жаназа гъотӀода дализабун бугони, 23сордо бан гьеб гьениб тезе бегьуларо. Гьебго къоялъ гьев вукъизе ккола, щайгурелъул гъотӀода варав чи Аллагьасул нагӀана щварав чи ккола. БЕТӀЕРГЬАН Аллагьас нужее ирсалъе кьураб ракь хъублъизабуге.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Къанун 21: АварАК
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Институт перевода Библии, 2005-2023