Iironga 2
2
ONTOPORUA 2.
Pentekosten
1Esiku rja Pentekosten sho rje ja, ajeshe kua j’igongera peshara rimue.#2:1 Oja ri anuua mondjugo mu Jesus kua a tshita esakramente ejapuki rjokaristia puurarero ua Paska.
2Naanzija okue ja epupo rj’uvika meguru, rja f’otshikunguru tatshi ende, tsho tatshi uda ondjugo ahishe, mu kua ja kaatumba.
3Omaraka ga f’omuriro oge ja orokere, go pombanda ge neempaga. Nde keshe gumue guomokati kauo okua namberua ku rimue.
4Jo ajeshe oj’udua Ombepo Ondjapuki, taa shimbike okupopja omaraka giiri no giiri, ngashi Ombepo Ondjapuki he ja pe okupopja.
5Nde mo mua kara mua menekera mu Jerusalem aajuda, aarumentu aajuki jokiirongo ajishe jokoshi heguru.
6Eui ndika#2:6 Eui ndika orjo otshipepe tshombepo., sho rj’uvika, ongundu onene haantu oha gongara, ja rurirua, oshoka keshe gumue okue j’uvu, sho taa popi eraka rjaangandjauo.
7Ajeshe oja rurirua, nde taa ti: “Tareni ajeshe mboka taa popi, kaje shi aagalilea?
8Ongiini sho tatu j’uvu keshe gumue mokati ketu meraka rjotshirongo tshetu, mu tua vererua.
9Ss’aaparti naamedi naaelamiti, sse aantu jo mu Mesopotamia, jo mu Judea, jo mu Kappadokia, jo mu Pontus, jo mu Asia,
10jo mu Frigia, jo mu Pamfilia, jo mu Egipti, jo meemkunda doka da Libia, da gama ku Kirene, sse tua zi ku Roma,
11aajuda naaproseliti#2:11 Aaproseliti ojo aantu mba ja ri mehiteero rjaajuda, nde jo kaje shi eevarere daajuda. naakreta naarabia, ss’atu j’uvu taa huvica iironga iinene ja Karunga momaraka getu?”
12Ajeshe oja rurirua, oja puracana ja ti: “Shino otshitshee nduno?”
13Ndere jamue oja njana ja ti: “Oja korua ngiika komavinju omatoue.”
14Okuza mpoka Petrus okua cikama puamue nomurongo na gumue, neui rjomuure he t’uvica ta ti: “Jarumentu aajuda, na ne aajerusalem amushe, kareni mu tshi tshi naua, puakeneni eehapu dandje.
15Mboka inaa korua ngashi mua ti, aaue, otu nostunde ontitatu hesiku.#2:15 Ostunde ontitatu keendunge daajuda no daantu jonare oho nena ostunde ontimugoje etango rjongura. Aajuda okua j’indikua oku rja tsha nokunua tsha manka ostunde ndjino inahi pita.
16Ndere otatshi guanicua shoka tsha romborua komuprofeti Joel:
17‘Otaku ka ninga momasiku ga shugunina, — Muene ta ti, — Ngaje otandi tirire kombanda honjama ahishe ombepo hom’Ombepo handje; nojana jeni aamati nojana jeni aakadona otaa ka shunganeka, naanjasha jeni otaa ka mona omamoniko, jo aakuruntu jeni taa ka rar’eendjodi.
18Eno, no kombanda haapija jandje no haarerua jandje otandi tirire ombepo hom’Ombepo handje, jo taa ka shunganeka.
19Otandi rongo iironga iinjengandunge pombanda keguru, nomadidiriko poshi kombanda hevi: ombinzi, nomuriro niikogo joruci.
20Etango otari ka tshituka eemrema, omuedi ombinzi manka inari cika esiku ndjoka rja Muene, esiku enene, ndi rja simana.
21Otaku ningi nokutja keshe ngoka t’icana edina rja Muene, ota ka upicua.#2:21 (Joel 2:28–32).
22Jarumentu ne aaisrael, puakeneni keehapu di: Jesus omunatsaret, omurumentu tuu ngu mua okororerua ku Karunga miironga jeenkondo no miinjengandunge, no momadidiriko, nga Karunga a ronga mokati keni mu he, ngashi ne jene mu ga tshi.
23Kehuco rja Karunga, ndi itari rundururua, no kouino ue uokutshiua uo iinima jokomesho, okue mu gandjerua. Nde ne mue mu arerica komutshigakano, ne mue mu dipagica komake gaahineji.
24Karunga e mu jumuda, he te mu ditura momeehamo geso, ongashi inari vura oku mu kuatera mu rjo.
25Oshoka David ote mu popi: ‘Muene oku ri arushe motshipara tshandje. He ta cikama korurjo ruandje, kandi punduke.
26Otsho omuenjo guandje otagu njanjukua, neraka rjandje otari rigora, nonjama handje otahi ka vururukua metegerero.
27Oshoka omuenjo guandje ito gu ecere motshirongo tshaasi, nomujapuki guohe ito mu eca a mone ehoro.
28Ngueje oto urukirendje ondjira homuenjo, oto ka udicandje enjanju enene, ndi tari zi kotshipara tshohe.’#2:28 Ps 15:8–10.
29Jarumentu ne jamuameme, inandi ara okuumba omushe te popi omupatriarke David. H’okua sa, nde ta fumbikua. Ndere ombira he ohi ri ngaa nanena mokati ketu.#2:29 Ano meehapu depsalmi, David in’ipopja he muene, aaue, ota popi Jesus Kristus. David muene he a kara motshirongo tshaasi.
30Sho a ri ano omuprofeti, he a tshiua naua, nokutja Karunga e mu ganena, he ta rangeke kotshipundi tshuukuaniirua ue gumue guaaranduri je, ta zi mombuto he.
31Otsho ngaa, manka a tara iinima jokomesho, ongashi a popja ejumuko rja Kristus, nokutja ita ka cigua motshirongo tshaasi, ho onjama he itahi ka mona ehoro.
32Ohe naanaa Jesus, ngu Karunga a jumuda. Sse atushe eentari, ss’aahokorori jarjo.
33Okuza mpoka okua rengua, he ta kaatumba korurjo rua Karunga, he ta tire Ombepo Ondjapuki, ndji e hi mu rombuerua ku She, ndji mua mona no mua uva.
34Oshoka David ina ronda keguru, aaue, he muene ota ti: ‘Muene okua rombuera Muene guandje: Kaatumba korurjo ruandje,
35sigo andi ningi aatondi johe otshirjatero tsheempadi dohe.’
36Ano nduno, ondjugo ahishe ha Israel nahi tshi tshiue ng’ohapu hotshiritshiri, Jesus ngu mua arera ngaa komutshigakano, Karunga okue mu ninga Kristus, h’Omuene.”
37Sho je di uvu, oja rongora komuenjo, jo taa rombuere Petrus naapostoli jakuauo taa ti: “Jarumentu ne jakuetu, sse natu ninge ngiini?”
38Nde Petrus te ja rombuere: “Idirurureni, keshe gumue mokati keni, n’itshatshicire medina rja Jesus Kristus kediminopo rjeendjo deni. Ne tamu ka peua omagano g’Ombepo Ondjapuki.
39Oshoka ne jene mua rombuerua omarombuerero ngaka,#2:39 Ogo omarombuerero ngano gaaprofeti, nga taga shunganeke ekuriro rjaantu netumo rj’Ombepo Ondjapuki. naana jeni uo, najeshe mba je ri kokure, najeshejeshe, mba Muene Karunga ketu ta k’icana.”
40Oneehapu odindji do diiri e ja okororera, he te ja kumagida a ti: “Inamu tinda, opo mu upicue mo moruvaro nduka rua pirarara.”
41Mba ja tuumba eehapu de, oja tshatshua. Rjo esiku tuu ndika okua guederua aantu ja fa je ri omajovi gatatu.
42Ojo ja diginina merongo rjaapostoli, meguaneno rjokupambura ombroto,#2:42 Epamburo rjombroto orjo emissa ejapuki paakriste jotango. no momagarikano.
43Ajeshe oja kuatua ketiro enene. Otsho iironga iinjengandunge nomadidiriko omanene ga ningua kaapostoli mu Jerusalem. Opua ri etiro enene apeshepeshe.
44Aahiteeri ajeshe oja karacana naua puamue, rjo eriko rjauo taa ri tura mumue.
45Taa randa po iinima jauo ajishe, ja toporere ajeshe mba ja pumbua tsha.
46Keshe esiku oja kara motempeli, ja ts’ompango himue, nde jo taa pambura ombroto meendjugo. Ja rire iiparuca nenjanju no nuujuki ueemuenjo dauo.#2:46 Aakriste jotango jo mu Jerusalem okua haa hi orundji motempeli, ja ka garikane. Ndere pepamburo rjombroto, okutja pemissa ejapuki oj’igongere meendjugo dauo, ja ningi orufo, sho kaja ri neengerka. Epamburo rjombroto, okutja emissa ejapuki orja randurua kotshituci tshohore, okutja oja rja ja kuacacana nenjanju niiparuca. Aajamberera naacigona okua ja guanekua kumue mohore hokuora Kristus.
47Oja amberera Karunga, jo ja ri mohore naantu ajeshe. Nde keshe esiku Muene okua nenepeka omujaru gua mbo ja ara kuupicua.
Omission Heklesia Ekatolika, 1951. Namibian Catholic Bishops Conference.