A-HEPREU 2
2
1Kashika chatutamba kupanjika kuhiana chikolo ku yuma yize twevwile, kuchina hanji mutusesumukako. 2Mumu kachi liji alihanjikile mu makanwa ja angelo liakolele, ni Utanguko weswe ni uhulia weswe watambwile fweto ya kulita; 3ngwe kuchi mutupuluka, nyi mutulengulula ulamwino upwa haha? Uze se aputukile kuwambujola ku kanwa lia Mwene, mba hanaukolesa ni makanwa ja waze evwile; 4Zambi nikushindakenya nawa hamwe no, ni yilayi ni yipekesa, ni yipupu yeka ni yeka, ni kwanyina cha Spiritu Musandu, nilulita ni kupala chenyi mwene.
5Mumu hi kuli angelo ko wazeyesele yifuchi ya hashi, yize muyizaho, yize tunambe. 6Alioze umwe hanashindakenya chikolo muma mumwe ngwenyi,
Mutu kuchi apwa umwiwuluke?
Hanji mwana mutu, utale hali iye?
7Hiunamupwisa ha shimbu likepe kushi lia angelo;
hiunamuse chipangula cha uhenya ni ulemu,
hiunamuse helu lia yitanga ya moko je:
8hiunazeyesa yuma yeswe kushi lia yiliato yenyi.
Mba se hazeyesa yuma yeswe kuli iye, kahichikile chuma nichimwe chize kuchishi kuzeya kuli iye. Alioze haliapwila kanda tuchimona yuma yeswe ya kuzeya kuli iye. 9Alioze tunamono Yesu, yoze amupwishile ha shimbu likepe kushi lia angelo, mumu ha lamba lia kufwa, hanamuse chipangula cha uhenya ni ulemu, hanga ku vumbi lia Zambi akamone kufwa hali atu eswe.
10Mumu yoze, hali iye yuma yeswe kuyili, ni kuli iye yuma yeswe yakatuka, ha kuneha ana anji ku uhenya, chatamba kaputu ka ulamwino wo akamupwise mungunu ha kumona lamba. 11Mumu eswe aali, ni yoze wakusela ku usandu, ni waze hanaasela ku usandu, kanapu eswe a kuli umuwika: ha chikuma chino keshi kwivwa sonyi kwavuluka ngwenyi, Mandumbu. 12Ngwenyi,
Mungukambujola jina lie kuli mandumbu jami,
mukachi ka chikungulwila mungukemba uhaliso we.
13Cheka nawa kanambe ngwenyi,
Mungumufuliela. Cheka nawa kanambe ngwenyi,
Talenu, yami ni ana aze hanangwehe Zambi.
14Kashika se ana anapu akwa kulianyina ni musunya ni manyinga, iye nawa chizechene i walianyinyine ni chisemewa chimuwika; hanga ku kutwa, akapupe yoze uli ni ndundo ja kutwa, iye Ndiapu; 15hanga akatusule waze eswe, ku woma wa kutwa ndusu mu mwono wo weswe akwachikile mu undungo. 16Mumu chamwenemwene hi kuli angelo ko kanakwata, aiioze kanakwata ku munyachi wa Apalahama. 17Kashika chamutamba ku yuma yeswe akamupwise wa kulifwa ni mandumbu jenyi, hanga akapwe sasendote mukwa lutwe wa keke, wamwenemwene ni yuma ya kutwala kuli Zambi, hanga akakukile milonga ya atu. 18Mumu se iye mwene hanevu lamba, ha kumweseka, kanahase kukwasa waze anaeseka.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
A-HEPREU 2: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.