1 YOANO 5
5
1Mweswawo mafuliela ngwenyi, Yesu iye mwe Kristu, kanasemuka kuli Zambi; ni mweswe mazanga yoze wasemene, mazanga nawa yoze wasemuka kuli iye. 2Ku chino tunanyingika tunazange ana a Zambi, muze tunazange Zambi, ni muze tunafungu shimbi jenyi. 3Mumu lino lie zango lia Zambi, ngwo, Tukafunge shimbi jenyi: ni shimbi jenyi hi jikalu ko. 4Mumu mweswawo masemuka kuli Zambi, makumba hashi: ni chino che kukumba chize hichinakumbu hashi, te Ufulielo wetu. 5Iya yoze makumba ya hano hashi shina yoze mafuliela ngwenyi, Yesu iye mwe Mwana Zambi?
6Yoze wejile ku meya ni manyinga, iye Yesu Kristu; hi ku meya wika ko, aiioze ku meya ni ku manyinga. 7Yoze wakushindakenya iye mwe Spiritu, mumu Spiritu iye umwenemwene. 8Mumu waze akushindakenya atatu: mwe Spiritu, ni e meya, ni e manyinga: ni wano atatu kakulikunda muli umuwika. 9Kachi tunatambula Shindakenyo ya atu, kachi Shindakenyo ya Zambi yinene yahiana: mumu Shindakenyo ya Zambi yino, hanashindakenya ha kutwala kuli Mwanenyi. 10Yoze mafuliela kuli mwe Mwana Zambi kali ni Shindakenyo muli iye mwene: yoze keshi kufuliela Zambi hanamupwisa mukwa mahuza; mumu kafulieleleko ku Shindakenyo yize hanashindakenya Zambi ha kutwala kuli Mwanenyi. 11Ni yino ye Shindakenyo ngwo, Zambi hanatwehe mwono wa mutolo; ni mwono uno uli muli Mwanenyi. 12Yoze uli ni mwe Mwana kali ni mwono; yoze keshi ni mwe Mwana Zambi mwono keshi nawo.
13Yino yuma hinasoneka kuli yenu hanga nukanyingike mwono wa mutolo nuli nawo, yenu nwakufuliela ku jina lia mwe Mwana Zambi. 14Ni lino lie hamu tuli nalio kuli iye, kachi mutwita chuma chimwe cha kulita ni upale wenyi, kachi matwivwa. 15Nyi kachi tunanyingika matwivwa cheswacho mutwita, kachi tunanyingika hitwatambula chize hitunamwichi. 16Kachi umwe mamona ndumbwenyi kanavulumuna mulonga, hi wa kufwa ko, kachi akete, iye makamwaha mwono hali waze keshi kuvulumuna mulonga wa kufwa. Kuuli mulonga wa kufwa; chambile nukalembele uno. 17Uhenge weswe shili, aiioze kuuli mulonga hi wa kufwa ko.
18Tunanyingika ngwetu, Mweswawo wasemuka kuli Zambi keshi kuvulumiona; aiioze yoze wasemuka kuli Zambi kakulifunga mwene, ni mwe chingulungulu keshi kumukwata.
19Tunanyingika yetu tuli a kuli Zambi, ni hashi heswe lukombo kuhakupomba mu chiyulo cha mwe chingulungulu.
20Tunanyingika mwe Mwana Zambi haneza, iye hanatwehe malinjekela, hanga tukanyingike yoze wamwenemwene; te muli Mwanenyi Yesu Kristu, iye mwe Zambi wamwenemwene ni we mwono wa mutolo. 21Ana akepe, lifungenu ku mahamba. Amene.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 YOANO 5: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.