1 A-KORINDU 9
9
1Yami hi nguli postolo ko, nyi? Hi nguli mukwa kutusuka ko, nyi? Chamwene Yesu Mwene wetu, nyi? Yenu hi nuli chitanga chami muli Mwene ko, nyi? 2Kachi kuli akwo hi nguli postolo ko, hindu nguli chocho kuli yenu; mumu yenu nuli muli Mwene, nuli Chijikilo cha upostolo wami.
3Kulisambisa chami kuli waze akungusopesa, chino ngwami, 4Yetu kutushi chiyulo cha kulia ni cha kunwa, nyi? 5Kutushi chiyulo cha kutwala hamwe ni yetu, umwe pangi muli Mwene, mukwetu-pwo, chizechene ngwe apostolo akwo ni anaakwo ja Mwene, ni Sefwa, nyi? 6Shina yami wika ni Mbarnavwe kutushi chiyulo cha kulitwamina milimo, nyi? 7Swalale muka malingila ha kulifweta mwene? Iya matumba munda mba kechi kalia mihuko yawo? Hanji iya mafunga chendo cha yimuna mba keshi kunwa yamwa ya chendo?
8Ngunahanjika yuma ngwe nikulita ni atu, nyi? Shina ye shimbi nawa kuyishi kwamba chimuwika, nyi? 9Mumu chinasonewa mu shimbi ya Mose ngwo, Kanda ukasa kata ku kanwa lia ngombe yoze mazungula mbuto. Shina Zambi kanafungu ngombe, nyi? 10Shina kanachambe mumu hali yetu? Ewa, mumu hali yetu chasonewene: mumu yoze machipa chamutamba kuchipa nikutalatala, ni yoze meta mbuto, meta nikutalatala kutambula chihanda chayo. 11Kachi twakuwile kuli yenu yuma ya uspiritu, chuma chinene kachi mutukacha yuma yenu ya kutwala ku mujimba, nyi? 12Kachi akwo matambula chihanda cha chiyulo chino hali yenu, Shinaho yetu, nyi?
Hindu kutwalingile ni chiyulo chino; alioze twakunyongonona ha yuma yeswe, hanga kutuchi kasa chilinda nichimwe mu jila ya sango lipema lia Kristu. 13Kunwanyingikine, nyi? Waze akulingila yuma yisandu kakulia yuma ya ku tembele, ni waze akulingila ku chilumbilo, kakupwa ni chihanda cha ku chilumbilo? 14Chizechene Mwene hanasela hali waze akwambujola sango lipema akalie ya ku sango lipema.
15Alioze chalingile ni yino yuma niyimwe: chasonekene yino yuma hanga akachilinge chocho kuli yami; mumu chinanguwahila kufwa shina umwe mapwisa chamokomoko kulisambisa chami. 16Mumu kachi mungwambujola sango lipema, kachi chishi nacho nichimwe cha kulisamba nacho; mumu hanase chiteli hali yami; mumu lamba kuli yami, kachi chishi kwambujola sango lipema. 17Mumu kachi mungulinga chino ku upale wa yami mwene, kachi mungupwa ni fweto: alioze kachi hi ku upale wa yami mwene ko, kanangukunjika uselo. 18Fweto yami kevwe yika? Yino, muze mungwambujola sango lipema, mungupwisa sango lipema Hawana, hanga chichi kalinga ni chiyulo chami cheswe mu sango lipema.
19Mumu chipwe natusukile kuli atu eswe, nalipwishile ndungo kuli eswe, hanga ngukazuke anji ahiana. 20Kuli A-Yunda, nalipwishile ngwe Ka-Yunda, hanga ngukazuke A-Yunda; kuli waze atwama kushi lia shimbi, nalipwishile ngwe kushi lia shimbi, hi nikupwa yami mwene kushi lia shimbi ko, hanga ngukazuke waze ali kushi lia shimbi. 21Kuli waze keshi shimbi nalipwishile ngwe chishi shimbi, kuchapwile ngwe chishi shimbi kuli Zambi, alioze mu shimbi kuli Kristu, hanga ngukazuke waze keshi shimbi. 22Kuli alelu, nalipwishile mulelu, hanga ngukazuke alelu; nalipwishile yuma yeswe kuli atu eswe, hanga ni yuma yeswe ngukalamwine amwe. 23Nakulinga yuma yeswe mumu ha sango lipema, hanga nalio ngukapwe mukwa kuliangana-ni-mukwo.
24Kunwanyingikine, nyi? Ngwo, Waze mazomboka muma mwa kuzomboka, mazomboka eswe, alioze umuwika matambula kwononona? Chocho zombokenu, hanga nukazuke. 25Waze malitachika ha kuheha, masúla ku yuma yeswe. Achi, o machilinga mukutambula chipangula cha kupola, alioze yetu chize kuchishi kupola. 26Kashika ni yami, chocho nakuzomboka, hi ngwe mu ujilijili ko; chocho nakulimbufula, hi kufufula ko mu tetela; 27alioze nakumbwezula mujimba wami, nakuutwala ku undungo: kuchina hanji, muze te hinambujola sango lipema kuli akwo, yami mwene mungwalumuka chisashili.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 A-KORINDU 9: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.