1 A-KORINDU 3
3
1Yami, mandumbu, Chahashile kuhanjika kuli yenu ngwe kuli akwa uspiritu, alioze ngwe kuli akwa musunya, ngwe kuli anaakemba muli Kristu. 2Nanunwishine yamwa, hi kulia ko, mumu kunwahashile kuchitambula, chipwe haliapwila kanda nuchihasa kuchitambula, ka. 3Mumu nuchili akwa musunya: mumu se kuyili hakachi kenu, ni ukwa, ni vunda, ni kuhangujola, hi nuli akwa musunya ko, nyi? Kunwendele nikulita ni atu, nyi? 4Mumu muze umwe mamba ngwenyi, Ami nguli wa Paulu; ni mukwo ngwenyi, Ami nguli wa Apolu; hi nuli akwa musunya ko, nyi?
5Paulu kuchi apwa? Ni Apolu kuchi apwa? Tuvumbi waze ku liji lio nwafulielele kuli Mwene; ni eswe nikulita ngwe amuhele Mwene. 6Ami natumbile, Apolu wahinjilile; alioze Zambi watatwishile. 7Chocho, chipwe yoze wakutumba hi chimwe ko, chipwe yoze Wakuhinjila, ka; alioze Zambi yoze wakutatwisa. 8Achi, yoze wakutumba ni yoze Wakuhinjila kanapu umuwika, alioze mutu ni mutu kumakatambula fweto yenyi mwene, nikulita ni kukilikita chenyi mwene. 9Mumu tuli akwa milimo-ni-akwo ja Zambi, yenu nuli ulime wa Zambi, chitunga cha Zambi.
10Nikulita ni vumbi lia Zambi lize anguhele, ngwe chilangaji wa lutwe wa mana, yami nasele fundamentu, mukwo matungaho. Alioze mutu ni mutu akakanyame ngwe chize matungaho. 11Mumu fundamentu yikwo niumwe mahasa kusa shina yize hanase, yenayo Yesu Kristu. 12Alioze kachi umwe matunga ha fundamentu yino, oru, prata, mawe alemu, mutondo, mwambu, yiswaswa: 13kumakasolola chitanga cha mutu ni mutu mumu lie tangwa mulikachilweza, mumu makachisolola ni kahia; kahia kumukakeseka chitanga cha mutu ni mutu chize muchipwa. 14Kachi chitanga cha umwe muchisala, chize atungileho, kachi makatambula kwononona. 15Kachi chitanga cha umwe muchiwema, kachi makafulwa; alioze iye mwene makamulamwina, hindu ngwe wapalika mu kahia.
16Te kunwanyingikine, yenu nuli tembele ya Zambi, ni Spiritu ya Zambi katwama muli yenu. 17Kachi umwe malumbula tembele ya Zambi, kachi Zambi makamulumbula; mumu tembele ya Zambi yisandu, yenayo nunapu yenu.
18Niumwe kanda ahonga nichimwe. Kachi umwe malishinginyeka kupwa mukwa mana hakachi kenu ha mwakono, apwe chihepuke, hanga akapwe mukwa mana. 19Mumu mana ja hano hashi kanapu uhepuke kuli Zambi. Mumu chinasonewa ngwo, Kakukwata akwa mana ni kalimbavuli ko ene. 20Ni cheka nawa ngwo, Mwene kananyingika kutaka cha akwa mana kuchaseka. 21Kashika niumwe kanda alisamba muli atu, mumu yuma yeswe niyenu; 22chipwe Paulu, hanji Apolu, hanji Sefwa, hanji hano hashi, hanji mwono, hanji kufwa, hanji yuma ya haliapwila, hanji yuma yize muyizaho; yeswe niyenu; 23ni yenu nuli a Kristu; ni Kristu wa Zambi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 A-KORINDU 3: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.