Sɛɡla 9
9
Wejema ne ɡɛnewa
1Wejema do kɛ haah waa ma o dem,
asɛ dɛ ɛ pilare anuanɛ
do o ta.
2O kpo ol dɛ kpɔ ɛ
kondikonjena,
dɛ kpɔ konsɔɔhsoma ane
koo sen ta,
dɛ pa chɔŋre teebur ta.
3O tomɛ o toli ŋɔ bá la bwɛɛ la
bela aa dawɛ deŋɡare ta
ka yerɛ nɛra.
4Dɛ ŋɔ, “Hé banɔ la he sie
aa wola pile la ba,”
dɛ berɛ ŋɔ ɡɛna ɡe be ŋɔ,
5“Hé ba di kwaa
dɛ́ nyɔ sen maa koo kwaa
a ta nɔ ane.
6Hé le he sie bɛ pila la ta,
dɛ́ dɔ he nyu.
Hé teŋɛ wejema ŋwɛnɛ ta.
7He dɛ ja nɛn waa dɛ ɛ
sisawa aa,
chɛɡaa hɛɛ dɔ.
He dɛ di wechɔɡ-ɛɛ ɡe
kasinteŋ aa, waa hɛɛ dɔ.
8Bɛ nɛn waa dɛ ɛ nɛra sisawaa
kasinteŋ di o ba haeh,
di wejereme kasinteŋ,
ásɛ o nyini.
9Hé dɛ ja wejereme aa,
a ɡelɔ wɛɛ jemɛ waa
kohona.
Anɔ la bɛlbwa haa bol nɛn
o wa aa toɡra be la,
a dɛ ja o wejema ta.
10Wejema mumparee
Korowii ɔma,
waa mun noe ɡe cheɡɛ
Korowii Waa Do Goroŋ
jema ta.#Job 28:28; Sɛɡ 1:7
11Menee Wejema, he teŋɛ
n nɛ aa,
hɛɛ dɔ mkpajaŋee.
12He jemɛ wa aa,
aa do werii tɛɛ,
he vɛah ɡe aa,
hɛɛ na waa.”
13Gɛna do kɛŋɔ haah
waa ɛ wobobala te,
waa wola sihiih jemɛ.
14O dem doonyoa
kɛɛ bwɛɛ la deŋɡare taa
o kara che wɛɛ so o ta,
15dɛɛ yerɛ nɛra baa ba dɛ kaa,
banɔ la baa teŋa baa kaa
ba liire do ba waa ta.
16Dɛ ŋɔ ɡɛna be ŋɔ,
“Nɛra he sie aa wola pile,
hé ba n be bonɔ.”
17Dɛ berɛ ŋɔ, “Nee haa ŋwɛ
nyɔ la som taeh,
kondikwaa haa sɔh
di la som.”
18Nɛra waa dɛ lɛɛ ba la aa jemɛ
kɛŋɔ ba la o dem aa,
ba dɛ sewɛ.
Banɔ la baa tɔ sie
jo bela la,
ba bwa serewɔ kaa
lalabwɛ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Sɛɡla 9: mzw
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.