Tourat 3: Lebian 25
25
Zomi-zomar ziraibar bosor
1Ar Mabude Tur faṛor ufre Musa nobire ḳoila, 2“Tumi Boni Israilre zanai deo, ami ze deshḳan tumrare diar, hou desho gia harle tumra kial rakio, honor zomi-maṭie zanu Mabudor name aram ḳorar shomoy fae. 3Tumra soy bosor zomino ḳet-ḳamar ḳorio, angur gasor ḍal-fala saṭia foy-foshol baṛit anio. 4Oile shat nombor bosor zomi-zomare ziranir shuzug dio. Iṭa oilo Mabudor niote aramor bosor. Ou bosor tumra zomino ḳet ḳorio na, angur gasor ḍal-fala saṭio na. 5Ar zominor maze emne-u zeta folibo, ita nia tumrar ugaro toio na. Bina zotone angur gaso zeta fol dorbo, ita faṛia nia zomaio na. Hoḳol zomi-zomare fura eḳ bosor ziranir shomoy dio. 6Ziranir bosor zomino emne zeta folibo, ita to tumra nizor, tumrar gulam-bandir, tumrar deshor bin-deshi musafir, tumrar shomazor menoti kamla, hoḳol zator manshor, 7tumrar fala heman, ar deshor zongli zanuaror ḳani-kuraḳ oibo. Ou bosor zomino emne zeta folibo, ita tumra hoḳole ḳaio.
Zominor doḳoldari firot faia kushi-bashi
8“Ar huno, shat bosor ḳori kori shatḳan ziranir bosorre tumra gonio, gonile shatbar shat bosore unufoinchash bosor oibo. 9Er bador bosor, mani foinchash nombor bosor, ou bosoror shat nombor sandor dosh nombor din, ita to gunar kofora adae ḳorar din, hou din tumra asta deshor hoḳol zagat shinga bazaio. 10Ou foinchash nombor bosorre tumra fak-fobitro manio, deshor hoḳol manshore azadir ḳota zanaio. I bosor oilo tumrar zomi-mirash Firot Faoar Bosor. Ou bosor tumra zarzir foribar ar ḳandanor zomi-zomar doḳoldari firot faibae. 11Forteḳ foinchash nombor bosor oibo, tumrar doḳoldari Firot Faoar Bosor. Ou bosor tumra zomino kunu bisi bain ḳorio na, zomino emne-u zeta zonmibo ita tumra nio na. Ar bina zotone angur gaso zeta fol dorbo, ita-o tumra goro anio na. 12Ou bosor oilo Firot Faibar Bosor. Tumra ou bosorre fak-fobitro hishabe manio. Zomino zeta foshol faibae, ota-u tumra ḳaio.
13“Firot Faoar Bosoro tumra forteḳe zarzir foribaror zomi-mirasho firia zaio. 14Nizor zomi-zoma ḳorid-bikir shomoy tumra afon ba for ḳeuror ufre zur-zobordosti korio na. 15Zomi korid ḳorar shomoy ḳorid-biki korra duio zone kial raḳbae, firot aoar hou foinchash bosor bade ḳotodin gesegi, ar samnor foinchash bosor furte ḳotodin baki ase, oḳan hishab ḳoria zominor dordam ṭik korbae. 16Zudi beshi bosor foshol faoar shomoy taḳe te dam-o beshi oibo, ar ḳom oile dam-o ḳombo. Ashole foshol faoar bosoror ufre-u ḳorid-bikir dam ṭik oibo. 17Tumra nizor shomazor ḳeuror ufre zur-zulum ḳorio na. Forteḳ zon-u Allar ḍor-ḳofe solio. Mono rakio, ami Alla-u tumrar Mabud.
18“Tumra amar shoriot ar hoḳol hukum-ahkam hamesha manio. Teu tumrar desh oibo nirafod boshot ḳana. 19Ar tumrar ḳetor zomin taki shullo-ana foshol faibae, faia feṭ bori kaia daia hono nirafode boshot ḳorbae. 20Tumra mone mone ḳoitae faro, shat nombor bosoro zudi kunu ḳet na ḳori ar foshol na ḳaṭi, te amra ḳaimu kita? 21Er zuaf oilo, soy nombor bosoro ami tumrar zomino ola rohom-borkot dimu, zomino tin bosoror homan foshol faia ḳaia-findia basbae. 22Erlagi aṭ nombor bosoro ḳet ḳorar bis bain deoar shomoy-o ou furana foshol ḳaibae, ar noy nombor bosoror foshol daibar ag forzonto ou foshole-u tumrar ḳani-kuraki solbo.
23“Mono rakio, siroḳalor lagi keuror zomi-zoma ḳorid-biki solto nae. Ashole hoḳol zominor malik to ami Alla, tumra amar samne hono ḳali bin-deshi musafir. 24Tumra forteḳ zonor ḳorida zomi-mirash bikidarre hirbar firot nibar shuzug dio. 25Tumrar zatir kunu bai obabo foṛia zudi tar foribaror zominor kisu ongsho besilae, te tar hoḳol taki afon zone aia ou besa zomi saṛaia nite oibo. 26Ḳeuror zudi saṛaia nibar manush na taḳe, te he nize don-samana zomaia hari nize-u zudi saṛaia nito sae, 27te tar bikir bosor taki saṛani forzonto shomoy hishab ḳoria, malikor faona ṭeḳa dia tar zomi firot nibo. 28Oile zomi firot nibar samana he zomaite na farle, tar besa zomin Firot Faoar hou foinchash bosor furar ag forzonto ḳoriddare ḳaiba, ar foinchash bosoror ḳalo tare firot diba, he tar zomin emne-u bina foyshae firot faibo.
29“Ar baunḍori kora nirafod ṭaunor kunu basha-baṛi zudi keu besilae, te besar bade fura eḳ bosoror maze he ou baṛi firot nito farbo. Fura eḳ bosoror maze he firot nibar shuzug faibo. 30Eḳ bosoror maze iṭa firot na nile, siroḳalor lagi ou baṛi koriddar ar tar oarishor oibo. Firot Faoar Bosoro iṭa firot faito nae. 31Oile zeta gau-geramo kunu baunḍori nae, ou zagar baṛi-gorre ḳetor zominor laḳan mono ḳorbae. Ita saṛaia ana zaibo, ar Firot Faoar Bosoro firot dite oibo.
32“Ḳali Lebi kandanor ṭaunor baṛi-gor oḳol hamesha firot ana zaibo. 33Tarar ṭaunor kunu baṛi-gor besile, Firot Faoar Bosoro iṭa firot faiba. Tumrar to zana ase, ḳali ṭaunor baṛi-gor-u oilo Lebi kandanor shompotti, Boni Israilor maze tara ou shompotti-u faise. 34Oile tarar ṭaunor daro foshu raḳar bondor zaga tara ḳorid-biki korta farta nae, ita to tarar siroḳalin shompotti.
35“Tumrar nizor shomazor kunu bai zudi goribi halotor lagi tar nizor ḳaoa-finda zugaito na fare, te bin-deshi musafiror laḳan tare-o shaijjo ḳorio, zate he tumrar loge boshot ḳorto fare. 36Tumra tar ges taki kunu nomunar shud ḳaio na. Borong he zate hamesha tumrar gese roibar shuzug fae, ou niote tumra nizor Mabud Allar ḍor-ḳof bitre rakio. 37Tumra shud ḳaibar niote tare ṭeḳa-foysha ḳorzo dio na. Tar gese ḳani-kurakir mal besle itar lab loio na. 38Mono rakio, ami Alla-u tumrar Mabud. Asta Kenan desh dan ḳorar kiale, ar tumrar afon Mabud oar kiale, ami-u tumrare Mishor desh taki bar ḳori anchi.
39“Boni Israili shomazor kunu bai zudi goribi haloto foṛia nize nize tumrar ḳeuror gese biki kailae, te tare ḳorida gulamor laḳan ḳaṭaio na. 40Tumrar musafir ar ruzi kamlar loge zela bebohar ḳoro, tar loge-o ola ḳorio. He hou Firot Faoar Bosor forzonto tumar ḳam-ḳaz ḳorbo. 41Bade tare ar tar fua-fuṛire azad ḳori dio. Teu he tar nizor ḳandanor moy-murobbir zomino firot zaibo. 42Huno, Boni Israil to ḳali amar gulam. Ami tarare Mishor desh taki azad ḳori anchi, erlagi dusra ḳeuror gulamir lagi tarare besar eḳtiar nai. 43Tumra nizor Mabudor ḍor-ḳofe solio, eḳe-oinne fashan-nisṭur bebohar ḳorio na.
44“Tumrar ari-fori zoto zati asoin, otar maz taki tumrar gulam-bandi nitae farbae. 45Tumrar maze boshot ḳorra bin zatir manush taki, ar tarar zeta aolad tumrar desho zonmisoin, otar maz taki-o tumra nizor lagi gulam-bandi nitae farbae. 46Ou laḳan gulam-bandire nizor samana hishabe tumrar fua-fuṛinre-o dia zaitae farbae. Itare hara zindegi tumrar gulami koraitae farbae, oile tumrar nizor zati Boni Israilor ufre fashan malikana ḳaṭaio na.
47“Tumrar maze boshot ḳorra bin-deshi kunu manush zudi doni bonizae, ar tumrar kunu bai zudi obabo foṛia tar gese ba tar kunu aolador gese nizore besilae, 48te he nizore azad ḳorar shuzug faibo. Tar nizor kunu baie tare azad ḳorto farbo. 49Tar sasa ba sasar goror baie, ba tar ḳandanor afon zekunu zone tare azad ḳoraita farba. Nizor halot bodlailite farle, he nizore nize azad ḳorto farbo. 50Ze bosor nizore besisil ou bosor taki hishab ḳoria firot aoar bosor forzonto zoto bosor baki taḳe ou shomoykur ḳamor betonor hishab-nikash mafik tar azadir dam ṭik kora oibo. 51Firot Faoar Bosor zudi beshi duroi oy, te ze dame he nizore besisil, ou damor boṛo eḳ ongsho tar azadir bodla hishabe dite oibo. 52Ar Firot Faoar Bosor aite zudi kom shomoy baki roy, te ou shomoy hishabe ṭeḳa dia he nizore azad ḳorto farbo. 53Tare bosor chukti kamlar laḳan dekio, ar kial rakio, malike zanu tar loge fashan bebohar na ḳore. 54Ola kunu laḳan ufaye zudi he azad oito na fare, te tare ar tar fua-fuṛire Firot Faoa Bosoror shomoy emne-u azad ḳori dilaite oibo. 55Mono rakio, Boni Israil to ḳali amar gulam. Ami tarare Mishor desh taki azad ḳori anchi, tara ḳali amar. Ami Alla-u tumrar Mabud.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Tourat 3: Lebian 25: sylL
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Ahle Kitab Society. All rights reserved.