If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

फेर हुन ड़ोंगा थाने चेगुन भाती हुनपाट गेलो, आउर आपलो नंगर कफरनहूम ने ईलो। आउर दका, कितलो लोग लकवा चो गोटक रोगी के खटिया थाने सुआऊन भाती हुनचो लगे आनला। ईशु हुनमन चो बिश्वास दकुन भाती, हुन लकवा चो रोगी ले बल्लो, “हे बेटा, हिम्मत बांद; तुचो पाप छमा होली।” असन बोलतोर के सुनुन कितलो शास्तरीमन बिचारला, “ऐ तो माहापुरू चो निन्दा करेसे।” ईशु हुनमन चो मन चो गोठमन जानुन भाती बल्लो, “तुमीमन आपलो-आपलो मन ने खराप बिचार केंव करेसास? सरल काय आय? ऐ बोलतोर, ‘तुचो पाप छमा होली’, नाहले ऐ बोलतोर, ‘उठ आउर हिन्ड़ा बुला हो।’ मान्तर ऐईकाजे कि तुमी जाना कि माने चो बेटा के धरतनी थाने पाप छमा करतोर अधिकार आसे।” तेबे ईशु लकवा चो रोग ने पड़लो माने ले बल्लो, “उठ, आपलो खटिया उठाव, आउर आपलो घरे जा।” हुन उठून भाती आपलो घरे गेलो। लोग ऐ दकुन भाती भक्याला आउर माहापुरू चो महिमा करूक मुरयाला जोन मानेमन के असन अधिकार दिलोसे।

हुता ले पुरे जाऊन भाती ईशु मत्ती नाव चो गोटक माने के कर धरतोर नाका थाने बसलोर दकलो, आउर हुनचो ले बल्लो, “मोचो पाट-पाट आव।” हुन उठून भाती हुनचो पाट-पाट गेलो। जिदलदाय हुन घर ने भात खातो काजे बसलो तेबे खुबे असन कर धरू बितामन आउर पापी ऐऊन भाती ईशु आउर हुनचो चेलामन चो संगे खाऊक लाय बसला। ऐ दकुन भाती फरीसीमन हुनचो चेलामन ले बल्ला, “तुमचो गुरू कर धरू बितामन आउर पापीमन चो संगे केंव खायसे?” ऐ सुनुन भाती ईशु हुनमन ले बल्लो, “बयद अच्छा चेंगामन काजे नाई मान्तर बेमारीमन काजे जरूरत आय। ऐईकाजे तुमी जाऊन भाती ऐचो अरत सिका, ‘मय बलिदान नाई मान्तर दया मन करूं आय।’ कसनबल्लोने मय धरमीमन के नाई, मान्तर पापीमन के हाग देऊक ईलेसे।”

तेबे यूहन्ना चो चेलामन ईशु लगे ऐऊन भाती बल्ला, “काय कारन आय कि आमी आउर फरीसी ईतलो उपास करू आंव, मान्तर तुचो चेलामन उपास नी करोत?” ईशु हुनमन ले बल्लो, “काय बराती, जिदलदाय ले दुला हुनमन चो संगे आसे, दुख करूक सकोत? मान्तर हुन दिन ऐयदे जिदलदाय दुला हुनमन ले अलग करा जायदे, हुन समया हुनमन उपास करदे। नवा फटीई चो काप जुना फटीई थाने कोनी नी लगा ओत, कसनबल्लोने हुन काप हुन फटीई ले खिन्डिक आउर झिकु आय, आउर हुन खुबे फाटू आय। आउर लोग नवा दाखरस जुना चामड़ा चो थयलामन ने नी भरोत, कसनबल्लोने असन करलो ने थयलामन फाटू आय, आउर दाखरस बोहडू आय आउर थयलामन नष्ट होऊ आय; मान्तर नवा दाखरस नवा थयलामन ने भरू आत आउर हुनमन दुनो बाचु आत।”

ईशु हुनमन ले ऐ गोठमन बोलते ची रये, कि दका, गोटक सरदार ऐऊन भाती हुनके पाँय पड़लो आउर बल्लो, “मोचो बेटी ऐबे मरली से, मान्तर जाऊन भाती आपलो हाथ हुनचो उपरे संगाव, तेबे हुन जीव पड़ेदे।” ईशु उठून भाती आपलो चेलामन संगे हुनचो पाट-पाट गेलो। आउर दका, गोटक बायले लेकी जेके बारा बरक ले लऊ जातोर बेमार रये, पाटकुती ले ऐऊन भाती हुनचो फटीई चो आंचर के छिंवली। कसनबल्लोने हुन आपलो मन ने बोलते रली, “अगर मय हुनचो फटीई के ची छिंयेन्दे तेबे चेंगा होयेदे।” ईशु उलटुन भाती हुनके दकलो आउर बल्लो, “बेटी हिम्मत बांद; तुचो बिश्वास तुके चेंगा करली से।” आउर हुन बायले लेकी हुनी समया चेंगा होली। जिदलदाय ईशु हुन सरदार चो घर ने अमरलो आउर बांवसी बजातो बिता आउर भीड़ के कोलार होतोर दकलो। तेबे बल्लो, “गुचा, लेकी नी मरली से, मान्तर सोयेसे।” ऐ थाने हुनमन हुनचो मजाक उड़ाला। मान्तर जिदलदाय भीड़ के निकराऊन दिला, तेबे हुन भीतरे जाऊन भाती लेकी चो हाथ धरलो, आउर हुन जीव पड़ली। आउर ऐ गोठ चो चरचा हुन सपाय देश ने फयलुन गेली।

जिदलदाय ईशु हुन थानले पुरे गेलो, तेबे दुय झान कानामन हुनचो पाटकुती ले ऐ हाग देते गेला, “हे दाऊद चो पिला, आमचो उपरे दया कर!” जिदलदाय हुन घर ने अमरलो, तेबे हुन कानामन हुनचो लगे ईला, आउर ईशु हुनमन ले बल्लो, “काय तुमके बिश्वास आसे कि मय ऐ करूक सकें?” हुनमन हुनचो ले बल्ला, “हव, परबु!” तेबे हुन हुनमन चो आँईकमन के छिंऊन भाती बल्लो, “तुमचो बिश्वास चो अनुसार तुमचो काजे होओ।” आउर हुनमन चो आँईकमन खुलली। ईशु हुनमन के धमकाऊन भाती जनालो आउर बल्लो, “खबड़दार, कोनी ऐ गोठ के नी जानोत।” मान्तर हुनमन निकरून भाती सपाय देश ने हुनचो किरती फयलाऊन दिला।

जिदलदाय हुनमन आउर हुनचो चेला बाहरे जाते रवत, तेबे दका, लोग गोटक कोंदा के जेचो थाने दुष्टआत्मा रली, हुनचो लगे आनला; आउर जिदलदाय दुष्टआत्मा निकराऊन दिलो, तेबे कोंदा बोलुक मुरयालो। ऐ थाने भीड़ अकचकित होऊन बल्ला, “इस्राएल ने असन केबीई नी दकलु।” मान्तर फरीसीमन बल्ला, “ऐ तो दुष्टआत्मामन चो सरदार चो सायता ले दुष्टआत्मा के निकराऊ आय।”

ईशु गलील चो सपाय नंगरमन आउर गाँवमन ने बुलते रये आउर हुनमन चो आराधना घरमन ने उपदेश करते, आउर राज चो नगतखबर परचार करते, आउर सपाय परकार चो बेमार आउर कमजोरी के दूर करते रलो। जिदलदाय हुन भीड़ के दकलो तेबे हुनके लोगमन उपरे जीव दुकली, कसनबल्लोने हुनमन हुन मेंडामन चो असन जेचो कोनी राका करू बिता नी रवत, बाय बिकाल आउर भुलकलो असन रवत। तेबे हुन आपलो चेलामन ले बल्लो, “पाकलो बेड़ा तो खुबे आसे मान्तर भुतीयार खिन्डिक असन आसोत। ऐईकाजे बेड़ा चो मालिक ले गुहार करा कि हुन आपलो फसल काटतो काजे भुतीयार पटाऊन देओ।”

ಆಲಿಸಿ मत्ती 9