እንዝ ግረ እየሱስ ኣይዅዳንድ ጝት ቁጥጘ ደምዝጛ ዊንጛንስቅ ይዅዳ ኻግርድ በር ገሊለ ኻግሪል ጅልዋ ዊኑ። ኣይንድ ኣይዅዳንድ ደዘል ኣቕጝ ኪብርዝጘው በልድ ችጝ ዊኑ። እየሱስት ፅንም ጝጐ ኣልትጝ፦ «ክክንደጥድ ክት ፃቭረውድየንት ቓልጛንስ ማጥን እኒስ ጕር ይዅዳ ኻግሪል ፊጥ። ግልፅዝ ኣርቕሽትጠ በነው እጅር ጝሰቭድ ስውርዝ ሰራሻውም፤ ክትም እንዛትቅ ፃቭረር ኣረውዝየ፣ ክቕምት ኣልሚዝ ጋልፅተ ጥውሸኵ» ይ። በገዘ ጝፅንድ እኳ ኣምኒየቍ ዊንጛንስቅ እነይጝ ዊግት።
እየሱስም፦ «ይግርየድ ገነ ችጚየውም፤ ክታጭስ ግን ግርየድ ዊትርቅ ሚቸው የጝ። ኣልም ክታት ሽክትጠ ቸላውም፤ ይት ግን ጝሰቭድ ጭቓ ኣቐጘ ሚዝርጠር ኣቓንስቅ ሽክተኵ። ክትን በሊል ፊጥን፤ ያን ግን ይግርየድ ገነ ችጚየው ኣቓንስቅ ፊጠቅም» ዩ። እኒንትም ዊግት ገሊለ እዳቑ።

ዊገድ ግን እየሱስት ፅን በሊል ፊርጘት ግረ ጘጝ ቈሽ ግልፅዝ እትላ ኣዪጝቀ ስውርዝ በሊል ፊሩ። ኣይዅዳንድም በሊዝ፦ «እድ እጅርድ ኣውል እኩ?» ይጛ ጝት ደምዝጛ ዊን። ኽዝቭድም ጝማጥን ሽዅሽዅተዝ ዊግታ ላው ላውድ፦ «ደግ እጅር የጝ» ግቨርድ ቈሽ፦ «ኣየውም ኽዝቭድ ቀሰው የጝ» ያ ዊኑ። ኣነጚ ኣይዅዳንድዛት ጐውተነውዝ ኣውማውቅ ግልፅዝ ዊግተውም ዊኒየው።
በልድ ግቨርዳንድም፣ እየሱስ መቅደስ ጝኒል ፍ ክንስጠ ኪርሙ። ኣይዅዳንድም፦ «እን እጅርድ ክንዲጝቀ ኣወሽ መፃፋንድ ኣርቕጠ ቸሉ?» ይጛ ዲንቅሽጛ ዊን። እየሱስም፦ «ያን ክንሰው ክንድጝድ ይት እፃቐዊስ ችጝሸውጚ፣ ይቕምቲስ ችጝሸውም ኣየው። እደረት ፍቃድድ ፃቭጠ በነው ኣውማውቅ ፅብሽ እኒን ክንድጝድ እደረቲስ ችጝሸው፣ ዊንም ይጊስ ችጝሸው ኣቐጘ ቲዝ ኣርቕጡ። ጝቕምቲስ ችጝሸውድየንት ዊግተው እጅር፣ ጝቕምስ ክቭር በነኵ፤ ጝት እፃቐውድየን ኪብርጠ በነው እጅር ግን፣ ጘጝ እማንተው የጝ፤ ኻሽትም ጝግል እጀውም። ሙሴ ክታጭስ ኽግ ነዪየውመ? ኣነጚ ክታጊስ ወሪትት ኽግድ ፋፅመው ላው እጅርም እጀው። ውር ቃጥ የጝ ይት ቁትርነ በንርነውድ?» ዩ።
ኽዝቭድም፦ «እፈ ጋኒናም ክተ! ኣው የጝ ቈሽ ክት ቁጡ በነውድ?» ይ። ጘጝም፦ «ያን ላው ጊርምሰው ሰቭ ሰራጩን፤ ክትንም ጝዝ ጊርምሽርኑ። ሙሴ ጊርዝሽተነዊዙ ስረት ነዩ፤ እን ስረትድም ኣቅሊስ ችጝሸውጚ ሙሴ ነየውም ኣየው፤ ክትንም ቅዳምሲንቭትዝ እጅር ጊርዝርነኵ። ነስየ ወሪትት ኽግድ ሸርሻየጘ እጅር ቅዳምሲንቭትዝ ጊርዝሽተው ኣቐውዝየ፣ እደስለ ያን እጅርዙ ዅለመነድቅ ቅዳምሲንቭትዝ ቓዛንድ ውር ቃጥ የጝ ኻልክሽርነውድ? ጭቅ የው ፍርድ ፊርድጥንጚ እቀ በው ቓለነውዝ ፊርድትርነ» ዩ።

እየሩሳልየምትቍ እቂስም ላው ላውድ፦ «ቁጥጘ ደምዝጘው እጅርድ እኒን ኣየውቀ? እንወ ጘጝ ኣደቫቫይዝ ዊግተኵ፤ ጛይ ግን ውረውረም ያቍ፤ ኻልቅጥድ ጘጝ ክርስቶስ ኣቐጘ ለምርጝመ ኣጢ? ዊገድ ግን እን እጅርድ ኣዊስ ተረጘ ይን ኣርቕነኵን፤ ክርስቶስ ተራንድ ግን ኣዊስ ተረጘ ኣርቐው እጅርም እጀው» ይ። እንዝ ማጥን እየሱስ መቅደስ ጝኒል ኣቕ ክንሳንድ ጝድመድ ኣጕስ ሸው፦ «የይ! ይት ኣርቕርነኵ፤ ኣዊስ ተጠጘም ኣርቕርነኵ፤ ዊገድ ግን ያን በገዘ ይስልጣንዝም ተጢቀር፤ ይት እፃቐውድ ጘጝ እማንተው የጝ፤ ክትንም ኣርቓይርነቅም። ያን ግን ጝጊስ ተጣንስቅ ይት እፃቐውድም ጘጝ ኣቓንስቅ ጝት ኣርቐኵን» የው ዊግቱ።
ጛይም ኣይንድ ፃይጥጘ በን፤ ዊገድ ግን ጝግርየድ ገነ ችጚየው ኣቓንስቅ ኣውማውቅ ጝናኒዝ ዳቒየውም። ኣነጚ ኽዝቪስ ንቕፀቍ እቅ፦ «ክርስቶስ ተራንድ እኒን እጅርድ ፃቨቍ ምልክታኒዝቍ ታምራኒስ ዲቈውመ ፃቨወ?» ይጝ ጝት ኣምን።

ፈሪሳንድም ኽዝቭድ እየሱስትቍዝ ሽዅሽዅተዝ ዊግታንድ ወሽ፤ ካኽነጣነ ኻልቅጢጅቅም ኣቕጝ ጝት ፃይጛንስ ማጥን መቅደስ ጝኒዝቍ ዊተድርድዛት እፃቕ። ኣይንድ እየሱስ፦ «ክታጅቅ ዊነውድ ዊቱ ግርየ የጝ፤ ጝዝለ ይት እፃቐዊዝጐ ፊጭር። ክትን ይት ደምዝትርንቅ፤ ዊገድ ግን ችጛይርነቅም፤ ያን ፅበዊዝጐም ተርትርነ ቸላይርነቅም» ዩ። ኣይዅዳንድም ጛስ ጛይ፦ «እን እጅርድ ይን ችጛይነው ስፍረ ኣውል ፊርጠ በን የጝ? ምናልቫች ግሪካነ ማኽሊል ቢትንሽጝ ፅበቍ ይናዊግኒል ፊር ግሪካንድዛት ክንስጠ በንመ ኣጢ? ‹ይት ደምዝትርንቅ፤ ዊገድ ግን ችጛይርነቅም፤ ያን ፊጠዊልም ተርትርነ ቸላይርነቅም› የውድ ወረጘ የነት የጝ?» ይ።

በሊዙ ኻትሸነ ኣቐው ኽየው ግርየይዝ እየሱስ ችብር ጝድመድ ኣጕስ ሸው፦ «ኣውማው ዝቛንደው ፅብሽ ይግል ተር ዝይነ። ይት ኣምነውድቅ መፃፍ ዊግተጘ ርዅየዙ ኣቘ ምኝጭ ጝጊዝዊስ ፍልቅጡ» ዩ። እኒንት የውድ ጝት ኣምነቍድ ለምርጥጙ መንፈስ ቅዱስት ማጥን የጝ፤ እየሱስ ገነ ኪብሪየው ኣቓንስቅ መንፈስ ቅዱስ ገነ ጊሚየውም ዊኑ።
እንዝ ማጥን ኽዝቪስ ላው ላውድ እኒንት ወሽጝ፦ «እርግጥ እኒን እጅርድ ኣልሚል ተረው ነቭይድ የጝ» ይ። ላጥድም፦ «እኒን ክርስቶስ የጝ» ይ፤ ላጥድ ቈሽ፦ «ክርስቶስ ተረውድ ገሊለስመ ውረ? መፃፍ ክርስቶስ ዳዊትት ዚረይስ፣ ዳዊት ፅበይ ኻትመ በተልኺምስ ተርጠጘ ዊግተኵ ኣየውቀ?» ይ። እንዝ ኣይንትዝ እየሱስትቍዝ ኽዝቭድ ጝስመ ጝስ ቲተቲቱ። ላው ላውድም ጝት ፃይጥጘ በን፤ ዊገድ ግን ጝናኒዝ ዳቐው እጅርም ዊኒየው።

እንዝ ግረ ዊተድርድ ካኽነጣነ ኻልቅጢዝመ ፈሪሳኒዝጐ ፊር፤ ጛይም፦ «ውረ ጝት ነሲርነቅ?» ይ። ዊተድርድም፦ «እን እጅርድ ዊግተዊዝጘ ኣውማው እጅርም ዊግት ኣርቓው» ይጝ ዊስ። ፈሪሳንድም፦ «ክትንም ቀትርኑ የነትመ? ኣየውጚ? ካኽነጣነ ኻልቅጢስመ ፈሪሳኒስ ጝት ኣምነው እጅር እኩመ? ዊገድ ግን ወሪትት ኽግድየንት ኣርቓው እኒን ኽዝቭድ እፂተው የጝ» ይ። ጝታማኽሊስም ላውድ እንዝ ሚቅ ኻርዝ እየሱስትል ተር ዊነው ኒቈዲመስ፦ «ይናኽግድመ በዊል ላው እጅር ኪስሽተው ዊገድ ጝቕምቲስ ወይሽቲጝቀ፣ ወረጘ ፃቨጘም ኣርቒጝቀ ዝም የው ፊርደወ?» ዩ። ጛይም ዊስጝ፦ «ክትምመ ገሊለትወ? ነቭይ ገሊለስ ጓው ኣቐጘ ሚርምርድር ኣርቕ» ይ።
እንዝ ግረ እጝቅቅ ጝታይታጝን ፊር።

ಆಲಿಸಿ ይዃንስት ወንጌል 7