Mongondow - Today's Mongondow Version, 2006 (Drama NT)

Alkitab Singog In Mongondow Masa In Tanaa © Indonesian Bible Society, 2016.

Nongkon pinomangkoianpamai, wakutu in dunia naa diápa pinomia, Pirman i Allah tatua in koyongan bidon oyúon.
Pirman i Allah tatua in koyotaki-takin i Allah,
bo Sia-Siakabí in ki Allah.
Nongkon pinomangkoianpabímai Sia in noyotakin i Allah.
Bayongan in yagi-yagi pinomia pinodoyon kon i-Nia,
bo nongkon bayongan inta oyúon,
diábí in tobatúmai in pinomia diá pinodoyon kon i-Nia.
Pirman tatua in pangkoi in kobiagan,
bo kobiagan tatua inta monimbayag kon intau.
Bayag tatua in nonindar kon sindip,
bo Sia in diábí kokawasaan in sindip tatua.
Namangoidon in tobatú intau inta pinotabá i Allah,
ki Yohanes in tangoinea.
Sia in namangoi nopotaau kon soaḷ bayag tatua,
sinbá mopirisayadon in bayongan intau.
Sia tontaní in deemanbí bayag tatua,
sia in tongábí nopotaau.
Bayag totokanea inta monimbayag kon bayongan in intau,
mamangoi in dunia.
Pirman tatua in naadon kon dunia,
Siabí tua in nomia kon dunia naa,
táe dunia in diábí nonotaau kon i-Nia.
Sia in namangoi in dunia inta pinomia-Nea tontaní
táe intau mita kapunyaan-Nea tatua in doí motarima kon i-Nia.
Tongá oyúon doman in notarima kon i-Nia
bo nopirisaya kon i-Nia;
mosia tua in inogoian hak mobaḻí ki adí i Allah,
inta pinononggadí deeman nongkon intau,
sin kobiagan mobagu tua in nongkon i Allahbí in pangkoinea.
Pirman ain nobaḻí intau,
Sia in nogutun kon sigad naton,
bo kita ain nokoontong kon kamuliaan-Nea.
Kamuliaan inta sinarima-Nea
saḷaku Adí tuḷong i Amá.
Pinongin i-Nia tua kita mokoontong kon i Allah
bo tabi-Nea kon i naton.
Ki Yohanes in namangoi saḷaku sakusi-Nea,
sia in nopohabar:
“Naadon in Sia inta pinogumanku:
Moiduduimai kon inakó,
moiangoi in Sia inta mokawa-kawasa nongkon inakó,
sin Sia in oyúondon kon wakutu in akuoi diápa.”
Moḷoben totok in tabi-Nea;
diá in gogainea
Sia in momarakat kon i naton.
Hukum i Tuhan sinarima naton nongkon i Musa.
Táe tabi bo kososatia i Allah in pinoniatadon kon i Yesus Kristus.
Diábí in nokoimontanmai in nokoontong kon i Allah, koḻikudbí in ki Adí tuḷong i Amá,
inta notongkai i Amá bo modagin totok kon i-Nia.
Kon i-Nia tuata moniata kon i naton in ki Amá.


Pongawasa mita in Yahudi kon Yerusalem nopotabá kon imang mita bo intau mita in Lewi minayá kon i Yohanes bo noḻibó nanaa, “Ki ine iko naa?”
Taran-tarangandon in ki Yohanes in noguman, “Akuoi in deemanbí Datu Mopoposaḷamat.”
Dá bui iḻibó monia, “Aka natua, yo ki ine iko? Ki Elia degá iko?”
Tubagnea: “Deeman”.
“Tobatú nabi degá?” iḻibó bui monia.
Táe ki Yohanes in notubag doman: “Deeman”.
“Aka natua, dá pogumandon kon inami mongo ki ine in iko naa? Sinbá kotaauan nami in potubag kon i monia inta nopotabá mangoi kon inami. Aka podudui in raianmu yo ki ine in iko nion?”
Ki Yohanes in notubag: “Akuoibí naa inta imakusud in singog i Nabi Yesaya nanaa:
‘Intau inta nobaḷú kon padang gurun:
Tondodaidon daḷan kon i Tuhan.’ ”
Intau mita inta pinotabá in intau in Parisi noḻibó kon i Yohanes nanaa: “Aka iko deeman Datu Mopoposaḷamat, deeman ki Elia, bo deeman doman tobatú nabi, yo nongonu sin iko i mobaptisbí?”
Ki Yohanes in notubag, “Akuoi in mopobaptis in tubig. Táe kon yua-yuak monimu, oyúon in tobatú intau inta diá kinotaauan monimu. Sia inta namangoi noiduduimai kon inakó, táe umpaka tongá mobuka kon togot in sapatu-Nea, yo diá patus in akuoi.”
Tua komintan in nobaḻí kon Betania inta kon ḷoḷanmai in Ongkag in Yordan inta pobaptisanmai i Yohanes.

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia. Sia tuata inta imakusud in singogku, moiduduimai kon inakó mamangoi in Sia inta mokawa-kawasa nongkon inakó, sin kon wakutu in akuoi diápa pinolahir, Sia koyongandon oyúon. Akuoi tontaní, diábí nonotaau kon i-Nia in koḻipod. Bokaka akuoi namangoi nobaptis in tubig sinbá intau mita in Israel monotaau kon i-Nia.”
Ki Yohanes in noguman doman nanaa, “Akuoi in nokoontong kon Roho i Allah in noponag nongkon ḷangit naonda bo ḷagapan paḷoma dinumompá bo nogutun kon i-Nia. Tungkuḷ intua diápabí kinotaauanku mongo ki ine in Sia. Táe ki Allah inta nopotabá kon inakó mopobaptis in tubig nogumandon kon inakó nanaa, ‘Aka mokoontong in iko kon Roho i Allah moponag bo mogutun kon intau tobatú, yo intaubí tatuata inta mopobaptis in Roho i Allah.’ Bo inontongkudon tontaní intua,” guman i Yohanes, “Bo potaaukudon kon i monimu kon Siabí tua in ki Adí i Allah.”

Nopoikoḷomai kon singgai, ki Yohanes kon tampat bui tatua takin murínea doyowa. Naonda inontongnea in ki Yesus noitaḻib, Sia in noguman: “Indoiai! Tuata in Adí Domba i Allah.”
Dinongog in murínea doyowa tatua in singognea tatua, dá minayá in taya dua dinumudui kon i Yesus. Ki Yesus in nobobui kon i monia inta dumuduianmai kon i-Nia bo poḷat noḻibó, “Onu in tayakon monimu?”
Tubag monia, “Rabi, kon onda in pinogutunan i Rabi?” (Rabi mangaḻenea guru.)
Dá kai Yesus doman, “Koḻigai! Indoiaidon monimu tontaní.” Mosia in namangoi domandon bo noindoi kon pinogutunan-Nea. Dodai intua jam opatdon moḷoḷabung. Singgai intua mosia in nogutunpa noyotakin i Yesus.
Tobatú kon sigad nayadua tua inta ain nokodongog kon onu inta pinoguman i Yohanes bo inta minayá dinumudui kon i Yesus, tangoinea in ki Andreas ki utat i Simon Petrus. Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.) Ki Simon dinia i Andreas minayá kon i Yesus.
Ki Yesus inimindoi kon i Simon, bo noguman: “Iko ki Simon, ki adí i Yohanes. Iko in tangoiondon ki Kepas.” (Kepas notongkai in Petrus, mangaḻenea buḷud batu.)

Nopoikoḷomai kon singgai ki Yesus in nonantúdon kon mayá in Galilea. Sia in noyodungkuḷ i Pilipus. Ki Yesus in noguman kon i Pilipus, “Koḻigai duduidon kon i-Nakó!” Ki Pilipus naa intau in Betsaida, kotá inta pinogutunan i Andreas bo i Petrus. Bo ki Pilipus in noyodungkuḷ i Natanael bo poḷat noguman kon inia, “Nouḻídon nami in intau inta sinangoi i Musa kon bonu in buk hukum i Allah, bo inta ain pinotaau muna in nabi mita. Sia tua in ki Yesus, intau in Nazaret, ki adí i Yusup.”
Táe ki Natanael in noguman, “Eta oyúon degá in mopia in mamangoi nongkon Nazaret?”
Dá kai Pilipus doman, “Koḻigai, indoianmudon tontaní!”
Inontong i Yesus in ki Natanael namangoi, dá ki Yesus in noguman nanaa soaḷ ki Natanael tua, “Indoiai, tua in intau in Israel motuḻid, diábí in uboḷ kon ginanea!”
Dá ki Natanael in noḻibó kon i Yesus: “Naonda in kinototaau i Amá kon inakó?”
Tubag i Yesus, “Wakutu in diápa inoiní i Pilipus in iko, inontong-Kudon iko kon ḻimonag in pangkoi ara tatua.”
“Pak Guru, guman i Natanael, ki Amá in ki Adí i Allah!”
Ki Yesus in noguman kon i Natanael, “Iko in nopirisaya kon i-Nakó tongá popisí degá in Akuoi noguman kon inimu kon iko inontong-Kudon kon siungonmai in pangkoi in ara tatua? Soaḷ mita inta moḷobe-ḷoben nongkon tua koontonganmubí!” Ki Yesus noguman doman, “Totuu, popirisayadon! Iko mokoontongbí kon ḷangit mobukat bo malaekat mita i Allah moponik-moponag mamangoi kon i Adí Intau.”

ಆಲಿಸಿ YOHANES 1