Kaba for CAR - ACATBA; 2020  Drama (NT)

Parijinyɛje ooje nan Jeju aw dda dəwje nya to njê-njaje goe tə̂ ngaâ naw dda dəwje batɛm nya nuta Jan. A kə̂ tɔkɔrɔ tə̂, Jeju njaa dda dəw batɛm ang. Njê-njaje goe tə̂ â aw ddaje dəwje batɛm. Jeju oo tar nəənn le a, nin Jude, n̂-təl Galile. A, ta kaw Galile le, nâ nday kə ddəw kə̂ Samari.
N̂-tee ngɔsi kə marə tɔkə bbe kə̂ Samari kə̂ daw bbar nan Sikar. Tɔkə bbe le to ngɔsi kə ndɔɔ kə̂ Jakobbo arə ngonnɛ̂ Jojɛpə. Buwa-maann lə Jakobbo to lo tə̂ənn le. Rɔ Jeju nyɛɛ̂ go nja tə̂ le ngaâ isi mbɔr buwa-maann tə̂ le kə kar kə̂ ar dannâ.
Marə dɛnɛ̂n kə̂ Samari ddee ta to maann a, Jeju pa arɛ̂ nan: «Arəm maann may.» Kar tə̂ənn le, njê-njaje goe tə̂ awje mə bbe tə̂ ta ndoko nɛ̂n-kusa. Dɛnɛ̂n kə̂ Samari le pa arə Jeju nan: «Əi, ə-to Jiipi, a əman, m-to dəw kə̂ Samari, a â dujum maann-kay tokə baânn wa?» Mba marə nɛ̂n kâra aw mbɔn Jiipije kə dəwje kə̂ Samari naan tə̂ ang.
Jeju ilɛ̂ tə̂ nan: «Bbo ə-gərə nɛ̂n kə̂ Lubba aw arə dəw ngaâ bbo ə-gərə dəw kə̂ aw duji maann-kay nəənn a, əi â, â duje maann-kay, ta nâ kari maann kə̂ aw arə təbbə.» Dɛnɛ̂n le pa arɛ̂ nan: «Əbbəmje, ee kə marə nɛ̂n kâra ta to nɛ̂n maann ang ddəm ngaâ buwa-maann le uru nya, a â kinga maann kə̂ aw arə təbbə le dda wa? Əi, uta kajeje Jakobbo wa? Ne â narəje buwa-maann nəənn. Ne njaa kə ngannɛ̂ kə daje laa kara dayje maann nəənn tɔ.» Jeju ilɛ̂ tə̂ nan: «Dəw ay maann nəənn a, kunda a kɔɛ̂n bbay. A dəw kə̂ a kay maann kə̂ mâ karɛ̂, kunda a kɔɛ̂n ndɔ kâra ang ngaa. Maann kə̂ mâ karɛ̂ le a təl to kəy-maann kə̂ aw arə təbbə kə̂ to kə ndɔ kə ndɔ.» Dɛnɛ̂n le pa arɛ̂ nan: «Əbbəmje, arəm maann le arə kunda ɔnʼm ang ngaa ddəm karə m-ddee m-to maann nəənn ang ngaa ddəm.» Jeju pa arɛ̂ nan: «Aw ə-bbar ngawije ta ə-təl ə-ddee nəənn.» Dɛnɛ̂n le ilɛ̂ tə̂ nan: «Ngamje goto.» Jeju pa arɛ̂ nan: «Tar kə̂ ə-pa nan: ‹Ngamje goto› le to kə dɔgɔlɛ̂. Mba ə-taa ngaw gɔl min ngaa. Dingaw kə̂ isi saa bbasinɛn nəənn le to ngawije ang. To tar kə̂ tɔkɔrɔ â ə-pa.» Yeenn ngaâ dɛnɛ̂n le pa arɛ̂ nan: «Əbbə-dəwje, moo a, ə-to nje-kila mbər tar lə Lubba. Kajeje jee dəwje kə̂ Samari poloje Lubba dɔ ddingiri tə̂ toonn. A see Jiipije, ə-paje nan, lo kə̂ maji polo Lubba tə̂ â to Jerujalɛm.» Jeju ilɛ̂ tə̂ nan: «Dɛnɛ̂n, ə-ndiki tar tə̂ ləm: Kar aw ddee kə̂ â kawje dɔ ddingiri tə̂ toonn ang ddəm a kawje Jerujalɛm bba ta polo Bɔy ang ddəm. See dəwje kə̂ Samari, aw poloje nɛ̂n kə̂ ə-gərəje ang. A jee Jiipije, jaw polo nɛ̂n kə̂ jeje n-gərə. Mba kaji in bbe lə Jiipije bba ddee. A marə kar aw ddee, kar le njaa nəənn, kə̂ dəwje kə̂ aw poloje Lubba tokə tɔkɔrɔ a poloje Bɔy ddəw Ndil tə̂ kə ddəw tar tə̂ kə̂ tɔkɔrɔ. Mba dəwje kə̂ aw poloje Lubba tokə baann â Bɔy aw sangəde. Lubba to ndil arə maji karə dəwje kə̂ aw poloje Lubba poleje kə ndil ddəm kə tar kə̂ tɔkɔrɔ ddəm.» Dɛnɛ̂n le pa arə Jeju nan: «M-gərə to Mesi a ddee, ne kə̂ daw bbarɛ̂ nan Kristə le. Bbo n̂-ddee a, nâ kɔru gəl nɛ̂nje tɔyn karəje.» Jeju ilɛ̂ tə̂ nan: «Əman kə̂ maw pa səi tar nəənn, m-to Mesi le.»
Kar tə̂ənn, njê-njaje goe tə̂ təlje ddeeje. A Jeju aw pa tar kə marə dɛnɛ̂n. To nɛ̂n kə̂ dum dɔde. A dəw kâra duje se ddi bba naw duju wase mba ddi bba naw pa saa tar wa ang.
Yeenn ngaâ dɛnɛ̂n le inya jo-maann laa a təl aw mə tɔkə bbe tə̂ ngaâ pa arə dəwje nan: «Ə-ddeeje ooje dingaw kə̂ pa tar nɛ̂nje tɔyn kə̂ m-dda arəm nəənn. A du ang, ne â n̂-to Mesi le!» Dəwje inje mə bbe tə̂ le teeje ngaâ ddeeje kə rɔ Jeju tə̂.
Karɛ̂ tə̂ənn, njê-njaje go Jeju tə̂ aw dujeje nan: «Nje-nɛ̂n-tɔju, usa nɛ̂n bba.» A nilade tə̂ nan: «Nɛ̂n-kusa kə̂ ə-gərəje ang to ta karə musa.» Yeenn ngaâ njê-njaje go Jeju tə̂ aw dujuje naan nan: «Marə dəw ddee kə nɛ̂n-kusa arɛ̂ wa?»
Jeju pa arəde nan: «Nɛ̂n-kusa ləm to ənga dda nɛ̂n kə̂ mə Lubba kə̂ ulam ndiki, ta dda kula kə̂ narəm le tunga. Sese, aw paje nan: ‹Nɛyn nayn sɔ karə juja ko-ndɔɔ.› A əman, m-pa marəse: Aaje ndɔɔje nəənn ooje. Kandə-koje le sangəje asə ta kuja ngaa. Nje-kuja kandə-ko inga kuka laa mban. Naw mbɔn kandə-ko le mba kisi nɛ̂n kə təbbə kə̂ to kə ndɔ kə ndɔ. Yeenn bba karə nje-dubbu ko kə nje-kuja ko, dede joo kəm rɔde nəəlde. Mba dəwje aw paje nan: ‹Marə dəw dubbu ko, a marɛ̂ uja ko le.› Tar le to tar kə̂ tɔkɔrɔ. Mulase marə aw ujaje ko mə ndɔ tə̂ kə̂ ə-ddaje kulɛ̂ ang. Marə dəwje ddaje kula, a sese â ingaje nɛ̂n go kula tə̂ ləde le.»
Dəwje nya kə̂ Sikar nangə Samari tə̂ ooje məde tə̂ kə̂ Jeju mba tar lə dɛnɛ̂n kə̂ Samari le. Mba n̂-pa narəde nan: «Dingaw le pa nɛ̂nje kə̂ m-dda tɔyn arəm.» Mba yeenn bba, dəwje kə̂ Samari ddee teeje rɔ Jeju tə̂ le a, dujeje nan: «Ə-nayn kə je.» Ngaâ Jeju le nayn kə̂ de ndɔ joo. Yeenn bba, dəwje kə̂ ooje məde tə̂ saa mba tarje kə̂ ne njaa n̂-pa banyaje nya bbay. Ngaâ, n̂-paje darəje dɛnɛ̂n le nan: «Bbasinɛn, joo məje tə̂ saa mba tarje ləi kə̂ ə-pa le njaa ang ngaa. Joo məje tə̂ mba jeje njaa joo tarje kə̂ tɛɛ̂ tə̂ ngaâ n-gərə to, ne njaa n̂-to Nje-kaji-dəwje kə̂ duninya tə̂.»

Go ndɔ tə̂ kə̂ joo le a, Jeju in lo tə̂ənn aw aw kə Galile. Mba ne njaa n̂-pa nan: «Dəwje aw walje nje-kila mbər tar lə Lubba bbeê laa ang.» A n̂-tee Galile a, dəwje kə̂ Galile tɛɛ̂je kə rɔde tə̂ kə majɛ̂ mba dede njaa kara dawje Jerujalɛm kusu Pakə tə̂ arə dooje nɛ̂nje tɔyn kə̂ n̂-dda.
Jeju təl ddee Kana, nangə tə̂ kə̂ Galile, lo tə̂ kə̂ n̂-dda narə maann təl ddee to bɛn tə̂ le. Marə nje-kula kə̂ bo kə̂ kəy lə tɔkə mbay, rɔ ngonnɛ̂ kə̂ dingaw toe Kapɛrnawum. Nje-kula le oo nan Jeju in Jude ddee Galile a, naw ningɛ̂ ngaâ n̂-pa narɛ̂ nan: «M-wali nya, ngonnəm a ta koy, ə-ddee Kapɛrnawum ajɛ̂.» Jeju pa arɛ̂ nan: «Bbo m-dda nɛ̂n-mɔrije kə nɛ̂nje kə̂ dum dɔ koo ang a, â kasəje ta koo məse tə̂ ang.» Nje-kula lə tɔkə mbay le ilɛ̂ tə̂ nan: «Əbbə-dəwje, aw bba nan ngonnəm a koy.» Jeju pa arɛ̂ nan: «Aw, ngonni nayn kəm baa.»
Dingaw le ndiki tə̂ kə tar lə Jeju le ngaâ ɔtu. Kar tə̂ kə̂ n̂-nayn ddəw-boô bbay a, njê-kulaje laa tilaje kəmɛ̂ ngaâ paje arɛ̂je nan: «Ngonni nayn kəm baa.» N̂-dujude nan: «Kar kə̂ baânn â nisi nɛ̂n kə majɛ̂ wa?» Dilɛ̂je tə̂ nan: «Takənɛn kə gɔl kar kâra kə̂ lo-kul tə̂ a rɔɛ̂ wul nɛ̂n.» Mə bɔɛ̂je le ole to kar tə̂ənn njaa â Jeju pa arɛ̂ nan: «Ngonni nayn kəm baa.» Yeenn ngaâ ne kə nje kə̂ laa tɔyn dooje məde tə̂ kə Jeju.
Joo lə nɛ̂n-mɔri kə̂ Jeju dda â nəənn. N̂-dda nɛ̂ɛnn le kar tə̂ kə̂ nin Jude n̂-ddee Galile.

ಆಲಿಸಿ Jan 4