© 1994 Wycliffe Bible Translators, Inc.
℗ 2008 Hosanna

Mumuye - 1994 WBT (Drama - NT)

Nɔng naa gãntɛ tɔ, a zang bang bang zang ɓɔɔ ri dɔɔ vuu ka Gãa Laa nɛɛ zang bang bang zang Yahudi ri tɔ̀ng zɔɔ kaa naa ɓɔɔ ri naa nyɔ Yeesɔ ɓɛɛ. A ri mã wu, ri daa nɛɛ wu ka bii gɔmna Bilatu.


Ɓu doo ɓɔɔ Yahuda ɓɔɔ malɛ Yeesɔ zirɛ, zang jɛ̃ɛ Yeesɔ ruu tɔ, nɛɛ zang nyɔ wu vɔrɔ kaa tɔ, naa kɔ̃sɔ yeti ɓiɓɛ. A see saka azurufa bmati tu kopi ɓɔɔ zang a wu ka ruu Yeesɔ, daa sɔɔrɔ zang bang bang zang ɓɔɔ ri dɔɔ vuu ka Gãa Laa nɛɛ zang bang bang zang Yahudi. A kɔɔ ri tɔɔ, “N pálɛ́ vuu shi kpang tɔ, ka ruu ɓɔɔ n nyɔ nɔɔ yuu shɔnzang tɔ̃ɔ ɓɔɔ tãa zang ruu kpang, nɛɛ nɔɔ nyɔ wu vɔrɔ ɓɛɛ.”
A ri kasɛ wu nyaa tɔɔ, “Ruu ɓuru hãa ɓi tɔɔgn kpang, ɓi kaa ruu ɓaaɓɛ.”
A Yahuda vang ri saka kaɓa ka Gãa Laa, a daayi daa bɔ̃ɔ vɔ̃ɔrɔ ɓiɓɛ, a vɔ kati. Zang bang bang zang ɓɔɔ ri dɔɔ vuu ka Gãa Laa, ri see saka azurufa kaɓa kati. Ri tɔɔ, “Naa ruu tɛ̃ɛ saka keɓe ka nɔng ɓɔɔ ruu tɛ̃ɛ saka kagn ka Gãa Laa tɔkn, ruu ɓa nyaa labeenang Laa ɓɔɔ Musa bee tɔ, ka ruu ɓɔɔ, saka ɓɔɔ zang hoo shɔnzang nɛɛ mani ɓi saka zĩi ɓɛɛ.” A ri mã zɔɔ naa nɛɛ ri see saka keɓe ri daa hoo tipi yɔɔ ɓɔɔ mãa ɓari ɓɛɛ nɛɛ mani. Tɔ̀ɔ wu nwang ka nɔng ɓɔɔ zang gbãa vɔrɔ zang zanti kagn ɓɛɛ. Ka ruu nɔngkɔ, zang ɓaa tipi kaɓa doo naa nɛɛ, “Tipi zĩi shɔnzang.” Vuu kɔ zang palɛ ɓee, ɓee ɓi ka nyaa vuu ɓɔɔ Irimiya zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Irimiya kɔɔyi tɔɔ, “Ri see saka azurufa bmati tu kopi kaɓa, ɓɔɔ zang Isirela ri mã zɔɔ naa nɛɛ ri shu ka yuu ɓiɓɛ, ri hoo tipi yɔɔ ɓɔɔ mãa ɓari nɛɛ mani, naa ɓɔɔ Kpanti Laa tusu m ɓɛɛ.”


Zang a tɔ nɛɛ Yeesɔ ka tĩng gɔmna, a gɔmna hɛ̃ɛ wu tɔɔ, “Mɔkɔ kpanti zang Yahudi ya?”
Yeesɔ kasɛ wu nyaa tɔɔ, “Nn, nkɔ.”
A zang bang bang zang ɓɔɔ ri dɔɔ vuu ka Gãa Laa nɛɛ zang bang bang zang Yahudi, ri zɛ̃ɛ wu nyaa, a ãa nyaa ɓi kagn kpang. Bilatu ti hɛ̃ɛ wu tɔkn tɔɔ, “Mɔɔ tãa vuu piti kɔ zang kɔɔrɔ ka yuu ɓaaɓɛ ɓɛɛ kpang ya?” Yeesɔ ti ã̀a wu nyaa ɓi ka bii kpang. Ti kasɛ nyaa ɓi ka yuu vuu gbete ɓɔɔ zang kɔɔrɔ ka yuu ɓiɓɛ kpang. Gɔmna Bilatu mã naa ka danggn, ka ruu ɓɔɔ Yeesɔ kasɛ ri nyaa kpang ɓɛɛ.
Diki vuu shaanang nyaalaa Pasika nɛɛ a tɔ, gɔmna yaarɛ zang, zang gbete ɓɔɔ zang mã ka sãa, ɓɔɔ ri kasɛ ɓɛɛ naa katɔ. Ka diki kaɓa, zang ɓɔɔ zang ɓaa nɛɛ Baraba, ɓɔɔ zang zi wu nung tɔ nandon, ka ruu vuu shi kpang ɓɔɔ wu palɛ ɓɛɛ, kagn yeti sãa. Zang kpalɛ zɔɔ tɔ nandon, a Bilatu hɛ̃ɛ ri tɔɔ, “N yaa nɔɔ ɓu wi naa wiya? Baraba ya, kɔ Yeesɔ ɓɔɔ zang ɓaa nɛɛ Kirisi ɓɛɛ?”
Bilatu hɛ̃ɛ ri ruu keɓe, ka ruu ɓɔɔ zi ɓi tɔ ka yeti ɓiɓɛ nɛɛ zang ɓɔɔ ri dɔɔ vuu ka Gãa Laa, ri atɛ wu Yeesɔ ɓi ka ruu sũnyaa kaanang ɓarɛ ɓɛɛ.
Bilatu nwang doo ka nɔng ruu jɛ̃ɛnang ɓiɓɛ, a ɓeeso shong wu nyaa tɔɔ, “Mɔɔ yi naa ka bii shɔnzang tɔ̃ɔ kiɓi kpang. N dang jĩng ka yeti rɔ̃kɔnang nɛɛ zĩi lɛɛkɔ ka ruu ɓiɓɛ dɔɔli.”
A zang bang bang zang ɓɔɔ ri dɔɔ vuu ka Gãa Laa, nɛɛ zang bang bang zang Yahudi ri dɔ̃lɔ zang dɔɔli nyaa nɛɛ ri kɔɔ Bilatu nɛɛ wu yaa Baraba kɔ naa, wu nyɔ Yeesɔ. Gɔmna Bilatu hɛ̃ɛ ri tɔɔ, “Ka teteng zang ziti keɓe, n yaa nɔɔ ɓu wi naa wiya?”
Ri tɔɔ, “Baraba.”
A Bilatu hɛ̃ɛ ri nɛɛ, “Ń palɛ vi nɛɛ Yeesɔ ɓɔɔ zang ɓaa wu nɛɛ Kirisi, viya?”
Ri goo nyaa nandon tɔɔ, “Yaa wu, zang ɓaa wu naa ka laa.”
Bilatu ti hɛ̃ɛ ri tɔkn, nɛɛ, “Ka ruu viya? Vuu shi kpang ɓɔɔ wu palɛ ɓu viya?”
Ri ti goo nyaa tɔkn nabm ka lapa nandon nɛɛ, “Yaa wu, zang ɓaa wu naa ka laa.”
Ɓu doo ɓɔɔ Bilatu zirɛ, nɛɛ zang kaɓa ri ɓa wu yuu katɔ, ri ti shii varɛ tɔ, tuu mii sɔɔ naa ɓiɓɛ nɔng ka jĩng ɓarɛ nandon. A kɔɔyi tɔɔ, “Naa mɛɛ ɓi kagn ruu zĩi yɔɔ keɓe kpang. Ɓi kaa ruu manɛ.”
A ri goo nyaa nandon nɛɛ, “Rúu zĩi yɔɔ keɓe wu naa nwang ka yuu ɓuru nɛɛ wujɛ ɓuru gbã̀ágbãa.”
A Bilatu yàa ri Baraba naa kati. A kɔɔ zang, nɛɛ zang nyɔ Yeesɔ nɛɛ gbãa, a tuu Yeesɔ a zang kati, nɛɛ zang daa ɓaa wu naa ka laa.


A rɛɛ sɔɔja gɔmna tuu Yeesɔ daa nɛɛ wu ka yeti gãa gɔmna. Ri kpalɛ rɛɛ sɔɔja ɓɔɔ nimbang nandon, ri kiiri Yeesɔ nyaa kaa teteng. Ri tu fɔ̃ɔrɔ ɓiɓɛ, a ri lu wu fɔ̃ɔrɔ nyaa pɛɛrɛ ɓɔɔ nwɛ̃ɛri, naa ɓɔɔ rɛɛ kpanti ri lu ɓɛɛ. Ri ti, ti kɔkɔ naa lapoo yuu kãnang kpanti, ri hãa wu ka yuu. A ri tuu labalang naa ɓɔ̀ɔ́ kpanti, ri a wu ka naa nakn. Ri ti tang ka tĩng ɓiɓɛ, ri kpaa wu. Ri tɔɔ, “Ruu jee mɔɔ nyaa kpanti zang Yahudi.”
Ri ti tùlù wu sisãa ka bii. Ri tuu labalang ɓɔɔ ka naa ɓiɓɛ, ri nyɔkɔ wu nɔng ka yuu. Ri kpaa wu tɔ sasak, a ri zɔ̃ng fɔ̃ɔrɔ nyaa pɛɛrɛ ɓɔɔ nwɛ̃ɛri kaɓa, ri hãa wu fɔ̃ɔrɔ ɓiɓɛ kati. A ri daa kaa nɛɛ wu, nɛɛ ri daa ɓaa wu naa ka laa.


Ri nwang tɔ, ri daa kana ka gbalang, a ri naa ɓee yuu nɛɛ yɔɔ gari Kiranɛ ɓɔɔ zang ɓaa nɛɛ Siman. A ri yi wu nɛɛ gbãng gbãng ning, nɛɛ wu tuu laa ɓɔɔ zang daa ɓaa Yeesɔ naa kagn ɓɛɛ. Ri naa a tɔ ka nɔng ɓɔɔ zang ɓaa nɛɛ Golgota, (dĩiri nung keɓe ɓi, nɔng ɓɔɔ nwáng yuu zɔ̃ɔpi ɓɛɛ.) Ri tuu sàa ɓɔɔ zang nwɛ̃ɛtɛ nɛɛ gãnang, ɓɔɔ palɛ zang, zang tãa kɔnang kpang ɓɛɛ. Ri a Yeesɔ nɛɛ wu ɓooyi. Yeesɔ tãa ka nyaa, a bɛ̃ɛ ɓoonang. Ri ɓaa Yeesɔ naa tɔ ka laa. A ri naa shaa laa, ri basɛ fɔ̃ɔrɔ ɓiɓɛ nɛɛ mani ka naa ɓarɛ. Ri nwang ka nɔngkɔ, ri gãng jĩng ka wu. A ri bee vuu shi kpang ɓɔɔ ri tɔɔ Yeesɔ palɛ ɓɛɛ, ri ɓang ka yuu paa laa ɓɔɔ ri ɓaa wu naa kagn ɓɛɛ. Ri beeyi tɔɔ, “Wee Yeesɔ Kpanti zang Yahudi kɔ.”
Zang ti ɓaa zang ɓɔɔ ri ta zang vuu nɛɛ ɓangge naa jong ka laa, ka kagn Yeesɔ. Ɓɔɔ gbete ka naa nakn a ɓɔɔ gbete ka naa nagang. Zang ɓɔɔ ri tɛɛ gbalang, ri rang wu nyaa gɛ̃gɛ̃ɛ, ri ti waa yuu ɓarɛ kpɔkpɔk, ri kɔɔ wu tɔɔ, “Mɔɔ tɔɔ mɔɔ zunung ɓɔɔ mɔɔ jili Gãa Laa, mɔɔ mãa ɓɔɔgn ka diki taati katɔ, ta yuu ɓaaɓɛ ta. Mɔkɔ nɛɛ Jaa Laa, shooro ta ka tipi, nɛɛ láa kɔ zang ɓaa mɔɔ naa kagn ɓi.”
Zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, nɛɛ zang bang bang zang Yahudi, ri ti kpaa wu doo nɔngkɔ. Ri tɔɔ, “Ta yuu zang ɓɔɔgn, a zunung ɓɔɔ wu ta yuu ɓiɓɛ kpang. Wu mɔkɔ Kpanti Isirela kpang ya? Náa shóorò nɛɛ laa kɔ zang ɓaa wu naa kagn ɓee, ruu shing danggn katɔ ka bii ɓiɓɛ. Shing danggn ka bii Laa, Laa nɛɛ kasɛ ruu ɓiɓɛ katɔ, wu ta wu ta. Ka ruu ɓɔɔ, kɔɔyi tɔɔ, wukɔ Jaa Laa ɓɛɛ.”
Zang ɓɔɔ ri ta zang vuu nɛɛ ɓangge ɓɔɔ zang ɓaa ri naa ka laa ka kagn Yeesɔ, ri rang wu nyaa gɛ̃gɛ̃ɛ doo nɔngkɔ.


Nɔng tɔ̀ɔ ka tipi kaɓa nandon nɛɛ laagɛ̃ sasak, laa naa kpɛ̃ɛ nɛɛ mani. Laa naa kpɛ̃ɛ tɔ, Yeesɔ mɛɛ nyaa ka lapa nɛɛ, “Eloyi, Eloyi, lama Sabatani.” Dĩiri yee keɓe, ɓi “Laa mɛɛ, Laa mɛɛ, mɔɔ yaa m ka ruu viya?”
Zang ɓɔɔ ka teteng rɛɛ zang ɓɔɔ ri shiiri kaɓa, ri tãa vuu ɓɔɔ Yeesɔ kɔɔyi, ri tɔɔ, “Yɔɔ keɓe ɓaa nyaa kana Iliya.”
A zang gbete ɓarɛ tantɛ yunang daa tuu sɔ̀ɔsɔ, hãa ka mii ɓɔɔ zang tɛ̃ɛ sàa kagn ɓɛɛ, a màa ka laa, á Yeesɔ nɛɛ wu ɓoo ta. A zang ɓɔɔ yaa knti ri kɔɔ wu tɔɔ, “Yaa wu ka nɔngkɔ, Iliya wu arɛ, wu ta wu, ruu zirɛ.”
A Yeesɔ mɛɛ nyaa kaa tɔkn ka lapa, a vɔ kati.
Fɔ̃ɔrɔ ɓɔɔ zang ku nɔng tɔ̃ɔ ɓɔɔ ka Gãa Laa nɛɛ mani, lɔɔsɔ ka làá kaɓa. Gaayu lɔɔsɔnang nɛɛ paa daa nɔng ka dii. Tipi ruutu, a pɛngkɛ ti puusu. Nyaa sàa ɓɔɔ zang gbã́alɛ́ vɔrɔ kagn ti pulu, zang Laa ɓɔɔ ri vɔlɔ ka tĩng tɛ̃ɛ tɛ̃ɛ, ri seepaa kati. Ri naa nwangkɛ nɛɛ sàa, ka knti ɓɔɔ zang wisi Yeesɔ paa tɔ nɛɛ saa, ri daa ka Urushalima. Ri daa nwang nyaa ka bii zang dɔɔli.
Yɔɔ zang bang sɔɔja, nɛɛ sɔɔja ɓɔɔ ri gãng jĩng ka Yeesɔ, ri zi naa ɓɔɔ tipi ruutu, nɛɛ vuu piti ɓɔɔ palɛ, bii kàa ri vɔrɔ. Ri tɔɔ, “Bɛ̀ɛ́ yɔɔ keɓe, Jaa Laa kɔ niizang.”
Zang soro ɓɔɔ ri yìkí Yeesɔ naa ka bii, ka diki kaɓa, ɓɔɔ ri dũuru wu nɛɛ Galili, ri kagn ka nɔngkɔ gaagaa. Ri shii nɛɛ nɔng beebang ri pɛ̃ɛrɛ vuu ɓɔɔ zang palɛ ɓɛɛ. Ka teteng zang soro kaɓa, Marayamu Magadaliya nɛɛ Marayamu nàá rɛɛ Yakub nɛɛ Yusufu, a ɓɔɔ nàá rɛɛ wujɛ Zebedi ri kagn.


Ka diki kaɓa nɛɛ laarang, yɔɔ gari Arimataya ɓɔɔ zang ɓaa nɛɛ Yusufu, ɓɔɔ vuu naa ɓiɓɛ dɔɔli naa a kati. Yusufu ɓi doo zang ɓɔɔ dũng knti Yeesɔ kɔ. Yusufu dàa gaa bii vɔrɔ Yeesɔ ka naa Bilatu. A Bilatu kɔɔ zang nɛɛ, zang wu daa a wu bii vɔrɔ Yeesɔ ta. A Yusufu tuu bii vɔrɔ Yeesɔ, kãng nɛɛ fɔ̃ɔrɔ nyaa pɛɛrɛ puru ɓɔɔ tɔ̃ɔ ɓɛɛ. A daa wɔɔ ka yeti sàa shɔɔ ɓiɓɛ, ɓɔɔ wu shu ka tari bang ɓɔɔ naa yeng puru ɓɛɛ. A jĩiri tari bang, ku nyaa sàa ka nɛɛ mani, a daa kati. Marayamu Magadaliya, nɛɛ Marayamu ɓɔɔ gbete, ri nwang ɓarɛ kaa nɛɛ naa dang.

Ka Diki Ɔ̃sɔnang zang Yahudi ɓɔɔ zang shaa nyaalaa Pasika kagn ɓɛɛ. Zang bang bang zang ɓɔɔ ri dɔɔ vuu ka Gãa Laa, nɛɛ zang Farisi ri kpalɛ zɔɔ ka bii Bilatu. Ri kɔɔ wu tɔɔ, “Kpanti, ruu kpaa danggn ruu ɓɔɔ yɔɔ sèé kaɓa kɔɔ ka diki ɓɔɔ wu doo ningkãari tɔ. Kɔɔyi tɔɔ, wu naa seepaa ditɔ nɛɛ saa, ka lee ɓɔɔ diki naa daa taati ɓɛɛ. Ka ruu nɔngkɔ, kɔɔ zang ta, zang daa gãng jĩng ka yuu saa tɔ̃ɔ tɔ̃ɔ, diki taati wu ɓa katɔ, ka ruu ɓɔɔ zang ɓɔɔ ri mantɛ vuu ka bii ɓiɓɛ, ri nɛ̀ɛ́ naa ɓɔ̀ɔ́ bii vɔrɔ ɓiɓɛ, ri kɔɔ zang nɛɛ, Seepaa tɔ nɛɛ sàa ɓɛɛ. Sèé ɓɔɔ knti, naa ɓa ɓɔɔ tĩng shɔɔnang kaa tɔ.”
A Bilatu kɔɔ ri tɔɔ, “Nɔɔ see sɔɔja ta, nɔɔ daa gã yuu sàa tɔ̃ɔ tɔ̃ɔ.” A ri daayi, ri daa rangsɛ nyaa sàa, a ri ɓang vuu kpanti ɓɔɔ tusu zang nɛɛ, Bilatu dang nyaa nɛɛ zang ɓɔɔ wu puu nyaa sàa kpang ɓɛɛ, ka yuu sàa. A ri shing zang sɔɔja ɓɔɔ gã yuu saa ka nɔngkɔ.

ಆಲಿಸಿ Matiyu 27