Levitico 6
6
1Itinao nin Kagurangnan ki Moises an minasunod na pagsusundon. 2Kaipuhan magdolot an siisay man na magkasala tumang sa Kagurangnan huli sa pagsayumang ibalik an iwinalat saiya kan kapwa niya Israelita, maghabon o magdaya saiya, 3magputik kan manongod sa ano man na nawawara asin magsumpa na dai niya iyan nakua. 4-5Kun an sarong tawo magkasala kan arin man sa nasabing mga paagi, mabayad siya para sa kinua niya sa maraot na paagi. Sa aldaw na maaraman an saiyang kasalan, an kagsadiri babayadan niya kan bilog na kantidad na saiyang kinua asin madagdag pa siya nin beynte porsyento. 6Dadarahon niya sa padi an sarong lalaking karnero o kanding na mayo nin kaninan bilang dolot na kabayadan. Aramon nindo an kantidad kaiyan sosog sa kinaugalean na timbang kan santwaryo. 7Idodolot kan padi an atang para sa kasalan kan nasabing tawo asin papatawadon siya.
Mga Sakripisyong Bilog na Tinutong
8Pinagbotan nin Kagurangnan si Moises, 9na itao ki Aaron asin sa saiyang mga aking lalaki an minasunod na pagsusundon manongod sa tinutong na atang. Ibubugtak sa altar an tinutong na atang, asin an kalayo sa altar papabayaan na maglaad sa bilog na banggi. 10Masulot an padi nin tunika asin sarwal na lino, dangan hahaleon niya an abo kan tinutong na atang saka ibubugtak sa gilid kan altar. 11Dangan masangle siya kan saiyang gubing asin dadarahon niya an abo sa luwas kan kampo, sa sarong malinig na lugar. 12An kalayo sa altar kaipuhan danay na naglalaad; dai nanggad iyan pagpabayaan na mapalsok. Aga-aga, gagatongan iyan kan padi. Papakarahayon niya an mga tututongon na atang sa ibabaw kan mga igatong saka tututongon an mga taba kan dolot para sa katoninongan. 13Sa gabos na panahon, maglalaad an kalayo sa altar asin dai nanggad papabayaan na mapalsok.
Mga Dolot na Pagkakan
14An minasunod iyo an mga pagboot manongod sa dolot na pagkakan. An pading aki ni Aaron iyo an matao sa Kagurangnan kan dolot na pagkakan duman sa atubang kan altar. 15Dangan mahakbot an padi nin sarong gugom kan arina saka lana, kaiba an gabos na insenso dangan tututongon niya iyan sa altar bilang tanda na an gabos idinolot sa Kagurangnan. An parong kan dolot na iyan nawiwilihan nin Kagurangnan. 16-17An matatadang arina saka lana gigibohon na tinapay na mayo nin lebadura asin kakakanon kan mga padi sa sarong banal na lugar, duman sa patyo kan Tabernakulo. Itinao na iyan nin Kagurangnan sa mga padi bilang saindang kahirasan sa mga dolot na pagkakan. Banal iyan arog kan mga dolot para sa kasalan asin kan dolot na kabayadan. 18Sa maabot pang mga panahon, an gabos na aking lalaki ni Aaron pwedeng kumakan kaiyan bilang kahirasan ninda sa pagkakan na idinolot sa Kagurangnan. Magigin banal an siisay man na dumotdot kaiyan.
19Itinao nin Kagurangnan ki Moises an minasunod na pagsusundon 20para sa pag-orden bilang padi kan saro sa mga aki ni Aaron. Sa aldaw na ordenan siya, matao siya sa Kagurangnan nin sarong kilong arina bilang dolot (pareho kadakul kan itinatao sa aroaldaw na dolot na pagkakan). An kabanga kaiyan idodolot niya pagkaaga, asin an kabanga pagkabanggi. 21Sasalakan niya iyan nin lana saka lulutoon sa parilya, dangan roronoton asin idodolot bilang dolot na pagkakan. An parong kan dolot na iyan nawiwilihan nin Kagurangnan. 22Sa maabot na panahon, an siring na pagdolot sa Kagurangnan gigibohon kan lambang aki ni Aaron na maglilingkod bilang Halangkaw na Padi. Tututongon niya iyan bilang tinutong na atang sa Kagurangnan. 23Tututongon gabos an lambang dolot na pagkakan nin sarong padi; dai iyan pwedeng kakanon.
Mga Dolot para sa Kasalan
24Pinagbotan nin Kagurangnan si Moises, 25na itao ki Aaron asin sa saiyang mga aking lalaki an minasunod na pagsusundon manongod sa mga dolot para sa kasalan. An hayop na idodolot para sa kasalan kaipuhan na bunoon duman sa parteng amihan kan altar, sa lugar na binubunoan kan mga hayop na tututongon. Iyan sarong banal na dolot. 26An padi na madolot kan hayop iyo an makakan kaiyan duman sa banal na lugar, sa patyo kan Tabernakulo. 27Magigin banal an siisay man o an ano man na makadotdot kan laman kan hayop. An arin man na parte kan gubing na matipsikan kan dugo kaiyan kaipuhan hugasan sa sarong banal na lugar. 28Kun sarong koron an linutoan kan karne, kaipuhan pasaon iyan pakatapos, alagad kun sarong lutoan na metal an ginamit, kaipuhan kuskosan iyan asin balnawan nin tubig. 29An lambang lalaki sa pamilya kan mga padi pwedeng kumakan kan dolot na iyan; iyan orog kabanal. 30Alagad kun an dugo kaiyan dinara sa laog kan Tabernakulo asin ginamit sa seremonya kan paghale nin kasalan, kaipuhan dai iyan pagkakanon kundi tutongon.
ទើបបានជ្រើសរើសហើយ៖
Levitico 6: MBBBIK92
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Marahay na Bareta Biblia © Philippine Bible Society, 1992.