Daniel 6
6
1Dariusib idluarivâ ataniovingmut atanirusit 120 ililugit, atanioviub ilûnanganut pijuksat;
2Tâpkonungalo angajoᴋâᴋsuit pingasut ilivait, tâpkoalo ilangat, tagva Daniel; atanirusit kigligiksariaᴋarput pimaklinimingnik tâpkonunga, ataniᴋ sumut tiliartauᴋonago.
3Daniel iᴋanarnipauvoᴋ angajoᴋâᴋsoarnit atanirusinillo, piojomik aniniᴋarami ilumini, atanilo issumaᴋalipoᴋ angajoᴋâᴋsoangortitsomavlugo ataniovingmut ilûnânut.
4Angajoᴋâᴋsoâgli atanirusillo pasiklirutiksarsiorasuarput Danielimut ataniovik pitjutigivlugo; piviksamigli pasiklirutiksamiglônêt nagvângilat, tâmna nitornadlarmat, pilungnimiglônêt idluitomiglônêt nagvârviongilaᴋ.
5Tagva angutit tâpkoa oᴋarput: Danielimut tâpsomunga pasiklirutiksarsiniangilagut, kissiani Gudingata piᴋojangit pitjutigivlugit nagvârvigiguptigo.
6Angajoᴋâᴋsoâgli atanirusillo ilagêklutik katimavut atanimut, oᴋautilugolo imâk: Ataniᴋ Darius, issoᴋangitomut inôtsainarit.
7Atanioviub angajoᴋâᴋsoâgik, tilijaujullo, atanirusillo, atanituijullo, aulatsijullo ilûnatik kajusiᴋatigêkput ataniᴋ piᴋojaᴋartitsijuksaungmat, sôngojomiglo initirijutiksaliorluni, kinalônêt ᴋinulipat sumik gudit inuillônêt nalianit, igvit assingnit, ataniᴋ, uvlut 30 nâvlugit, tâmna loivit itisâluanut igitaksaungmat.
8Mâna, ataniᴋ, initirijutiksaᴋ palangairlauruk, aglaillo nalonaikusikit, soᴋosirungnaiᴋovlugit, Medenimiut Persiamiullo piᴋojangit soᴋosirungnangitut maliklugit.
9Tamanna pivlugo ataniub Dariusib aglait initirijutiksat nalonaikusipait.
10Danielilo ᴋaujilirami aglait nalonaikusitauninginik, majuarpoᴋ iglominut, (igalângit taima iglominêtut Jerusalimut sângajut upkoêrput) siᴋortorporlo pingasuitorluni uvloinaᴋ, tuksiarlunilo Gudine ᴋujagivâ, sorlo sivorngani ilusiᴋarami.
11Tagva angutit tâpkoa ilagêklutik katimavut, Danielilo naipipât ᴋinuluni tuksiarlunilo Gudiminut.
12Kaivut tagva, oᴋarlutiglo ataniub sângani ataniub initirijutinga pitjutigivlugo: Initirijutiksaᴋ nalonailingikiûk, angutit naliallônêt ᴋinulipat gudit inuillônêt nalianit, igvit assingnit, ataniᴋ, uvlut 30 nâvlugit, igitaksaungmat loivit itisâluanût? Kiovlunilo ataniᴋ oᴋarpoᴋ: Tamanna, nalautsivoᴋ, Medenimiut Persiamiullo piᴋojangit soᴋosirungnangitut maliklugit.
13Tâpkoalo kiovut oᴋarlutiglo ataniub sângani: Danielib ipsoma, Judit aularutijaujut ᴋitorngangita ilangata, kamagingilâtit, ataniᴋ, initirijutiksarlônêt nalonaikusilauᴋtat, uvloinarli pingasuitorluni tuksiarsôngovoᴋ.
14Ataniub tagva oᴋautsit tâpkoa tusaramigit, angijomik annupoᴋ, ômatiminilo kajusivoᴋ Danieli piulijomavlugo; siᴋiniubli nipininga tikidlugo ilungitorluni piulinasuarpâ.
15Tagva angutit tâpkoa ilagêklutik kativut atanimut, oᴋautilugolo: Nalungilatit, ataniᴋ, Medenimiut Persiamiullo piᴋojangit imaingmatta, initirijutit piᴋojallo naliallônêt ataniub palangairtanga soᴋosititaujungnangimat.
16Ataniᴋ piᴋojivoᴋ tagva, Danielilo ᴋaipât igilugolo loivit itisâluanut. Ataniublo nipliluni Danieli oᴋautivâ: Gudivît soraijuitomik kivgartortavît piuliniarpâtit.
17Ujaraᴋsoarlo ᴋaitauvoᴋ, ilivâlo itisâlub pânganut, ataniublo nalonaikutaminut nâligarijamilo nalonaikutanganut nalonaikusipâ, kajusijutaujoᴋ Danieli pivlugo soᴋosertitauᴋonago.
18Atanilo igloᴋsoaminut angirarpoᴋ, nirritailivlunilo unnuaᴋ nâvlugo; nipjausijartoᴋangilarlo sângani, sinigungnangilarlo.
19Uvlârarsukut tagva ataniᴋ makipoᴋ, tuavidlunilo loivit itisâluanut aivoᴋ.
20Itisâlublo pânganut Danielimut tikigami, ᴋaigarsukpoᴋ nippimut ârusuktomut; niplilunilo ataniub Danieli oᴋautivâ: Daniel, Gudib ômajub kivganga, Gudivît kivgartutsainartavît piulijungnarᴋâtît loivinît?
21Danieliblo ataniᴋ oᴋautivâ: Ataniᴋ, issoᴋangitomut inôtsainarit.
22Gudima ingilini tilivâ loivillo siggungit ipumingatipait, tâpkoalo idluiliorvigilungilânga; pasijaksaulunginama tâpsoma sângani; igvillotauᴋ sângni, ataniᴋ, idluitulilaungilanga.
23Tagva ataniᴋ angijomik ᴋuviasudlarpoᴋ, Danielilo ᴋaitauᴋovâ itersâlungmit. Taimaimat Danieli ᴋaᴋipât itisâlungmit, ᴋanoitomiglo sumiglônêt malungnartoᴋangilaᴋ tâpsomani, Gudini tatigingmago.
24Atanilo piᴋojivoᴋ, ᴋaipaillo angutit ipkoa pasiklilauᴋtut Danielimik, igipaillo loivit itisâluanut, tâpkoa, ᴋitorngangillo, nuliangillo; loivillo pâvait, sauningillo ilûnaita siᴋalilugit, itisâlub natinganut tulaumariᴋârtinagit.
25Ataniub Dariusib tagva inôᴋatigêt, nunaᴋatigêllo oᴋausiᴋatigêllo tamaita, nunani tamaini iniᴋartut, aglarvigivait: Ulapirᴋsaut aglivaliali ilipsingnut.
26Piᴋojivunga ataniovingma nunangini tamaini inuit sajuktuksaungmatta sivôralutiglo Danielib Gudingata sângani; tâmna Gudeongmat ômajoᴋ, itsainartoᴋ issoᴋangitomut, ataniovingalo assirojuitôvoᴋ, nâligauningalo naggatiᴋarniatsangilaᴋ;
27Piuliklipoᴋ saputjivlunilo, nalonaikutanik tatamnartuniglo piniarpoᴋ ᴋilangmilo nunamilo; tâpsomalo Danieli piulivâ loivit pitsartuninginit.
28Danielilo tâmna pilluangolipoᴋ Dariusib atanioningani, Korasiblo Persiamiojub atanioningani.
ទើបបានជ្រើសរើសហើយ៖
Daniel 6: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.