Ex 26
26
Is Cajlobal Dios
(Ex 36.8-38)
1Chemlayokab lajoneb jenan k'ap chi oc yin in cajlobal. A lino caw wal watx' tol tx'umbil chi oc yin, yetok yax tx'al, c'al tx'al púrpura, c'al yetok cak tx'al; cax chi tz'islay oc yechel querubín yin an, yuj junok mactxel jelan tz'isoni. 2Masanil juntzan tu', lajanc'al chi yunej: nan yoxlajoneb metro chi yun is tel, cab metro chi yun is sat. 3Cax chi tz'islay yin oyeb jenan, cax junxanej chi yunej, ac'ala' chi yun c'apax oyebxa tu'. 4Cax chi oc xoyjab yax tx'al is mitx'banilok yin jun pac'ok is ti' jun jenan an babel; ac'ala' caytu' chi yun c'apax junxa jenan an yet tzunanil tu'. 5A ton yin an babel jenan, yetok c'apax an yet is cab, yowalil chi watx'ji oc xoyjab junok 50 juntzan yax tx'al tu', chi yal elapnok tol junejc'al chi yun chalen ba. 6Cax chi watx'ji c'apax 50 gancho naba oro, yet chi je' mitx'len ba an cab jenanil, caytu' chi yun watx'ji el junok jenan yiban in cajlobal.
7Chemlayokab c'apax 11 jenan is xil no chiwo yet chi oc yiban in cajlobal tu'. 8Masanil juntzan tu', lajanc'al chi yunej, nan is canlajoneb metro chi yun is tel; axa sat xin, cab metro chi yunej. 9Chi lajwi tu', cax chi tz'islay ay oyeb, cax yin junnej jenan chi yunej, wakeb chi yun pax junxa jenan. A nanok jun yet is wak jenan tu', a tu' chi aytek pakan bay satak mantiado tu'. 10Chi watx'ji c'apax oc xoyjab junok 50 mitx'banil yin jun pac'ok is tilak jun babel jenan tu', cax chi oc c'apax junokxa 50 mitx'banil yin jun pac'ok ti' yet is cab jenan. 11Chi watx'ji c'apax 50 gancho naba bronce, yet chi je mitx'len ba cab jenanil, cax junxanej jenan chi yuncan elok. 12Yujtol 11 jenan yayji xil no chiwo tu', xan ayto nan jenan chi aycan pakan yintak, axca yayji bay is satak. 13A jun tu', ec'ban jun metro is tel yintak an yalan, nan metro ec'ban bay junjun tilak, a ton chi makchen el is tilak an aycan yalan.
14Chi watx'ji c'apax ay tz'umal no calnel bonbil yetok cak, yet chi oc yiban jun jenan xil chiwo tu'; yetok junokxa makan tz'um caw wal lababixac'al yet chi oc yiban jun tu'.
15Watx'jokokab c'apax juntzanok te chemte' tol acacia chi oc yin in cajlobal, waan chi yun yoqui. 16Nan is so' metro chi yun is tel junjun te chemte' tu'; axa sat xin, 65 centímetro chi yunej. 17Chi cancan cabcabok yuc'a' junjun te chemte' tu' bay ok ay waanok, lajanc'al chi yuncan xol.*fn* Caytu' chi yun masanil te chemte' chi oc yin in cajlobal tu'. 18A yet ok watx'nelay te' tu', 20 te' ok oc bay yetc'ulal sur. 1940 ch'en plata chi watx'ji ay batxlubok te' 20 tu', cabcab chi yun cancan yalan junjun te', junjunc'al bay junjun is yuc'a' te'.
20Axca tu' chi yun c'apax bay jun pac'xa, chi yal elapnok a ton bay yetc'ulal norte; 20 c'apax te chemte' tu' chi watx'ji elok. 21Ac'ala' 40 ch'en plata chi oc batxlubok, cabcab ch'en chi aycan yichok junjun te'. 22Axa bay jun pac'xa bay yetc'ulal yayub c'u, wakeb te chemte' tu' chi watx'ji. 23Chi watx'ji c'apax el cabokxa te' ok oc bay txiquinlak bay jun pac' tu'. 24A juntzan chemte' tu', nububi chi yun bay yich masantac'al chi ajapnok bay chi junanej ba yuj junok argolla, caytu' ok yun c'apax bay junxa txiquin. 25A yuj cabxa te tu' xan waxakeb te chemte' tu' yin masanil, yetok 16 is batxlub, chi yal elapnok tol cabcab is batxlub junjun te'.
26Watx'jokokab oyeb te regla tol naba acacia, ok oc yin te chemte' bay jun pac'ok in cajlobal. 27Oyeb c'apax te' ok oc yin te chemte' bay junxa pac', oyeb c'apax te' ok oc bay jun pac'xa yintak, a ton bay yetc'ulal yayub c'u. 28A te regla chi oqui, a bay is nan te chemte' tu' chi oqui, junnejc'al yayji te', masantac'al bay junjun txiquin. 29Chi lajwi tu', cax chi oc oro yinlak te chemte' tu', cax chi oc c'apax argolla naba oro bay chi eq'uel te regla tu'. Chi oc c'apax oro yin te regla tu'. 30Chi watx'ji aj in cajlobal, axca yayji yechel chin tx'ox ayach bay jolom witz ti'. 31Watx'jokokab c'apax junok an cortina yetok yax tx'al, an tx'al púrpura, cak tx'al, c'al yetok an lino tx'umbil, tz'isbil oc yechel querubín yin an tu' yuj junok jelan tz'isoni. 32Chi lajwi tu', cax chi aj locan yetok gancho naba oro yin caneb te oy tol acacia. A te oy tu', yowalil chi oc c'apax oro yin te'; chi oc c'apax caneb batxlubal naba plata. 33Chi lajwi tu', cax chi aj locan an cortina tu' yalan yetc'ulal bay ayoc ch'en gancho oro ayoc yin tu' yiban, axa bay yintak octok an cortina tu', a tu' chaoctok te caẍail trato. Axca tu xin, a an cortina tu' chi oc makilok jun lugar chi yik Wet yayji, yetok junxa lugar chi yik Asannej in ay wet. 34Chi lajwi tu', cax chaon oc is makil te caẍail trato bay chi ak'lay tan yobtakil, a tu' ay bay lugar asannej in ay wet. 35A satak eltek an cortina tu', a tu' cha watx'nej ay te meẍa, bay yetc'ulal norte bay in cajlobal tu'; axa pax bay yetc'ulal sur, a tu' cha watx'nej ay jun batxlub candil bay satak te meẍa.
36Axa bay ti' in cajlobal tu xin, a tu' chi watx'ji oc junok an cortina yetok yax tx'al, an tx'al púrpura, cak tx'al, yetok an lino tx'umbil; tz'isbil c'apax oc is yelbub yuj junok jelan tz'isoni. 37Chi watx'ji c'apax oyeb te oy naba acacia, cax chi oc oro yin. A yin te' ok aj locan an cortina tu', cax chi oc c'apax gancho oro yin. Chi watx'ji c'apax ay oyeb batxlub bay ok ay te oy tu', naba bronce chi oc yin.
ទើបបានជ្រើសរើសហើយ៖
Ex 26: ATBYK89
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Kanjobal (Q’anjob’al) © Sociedad Bíblica de Guatemala 1989