LUKE 5
5
Jisu He Prothom Chella Khan Ke Mata
1Ketiya manuh khan pora Isor kotha huni bole besi jama hoi kene usor te ahhise, Tar Gennesaret pukhuri usor te khara kori thakise. 2Aru duita nao samundor kinar te Tar pora dekhise; kintu maas dhora manuh khan tu nao pora ulai kene jal safa kori thakise. 3Nao majot te ekta, tu Simon laga thakise tate jaise aru maati pora samundor majot phale olop loi jabole Jisu he Simon ke koise. Aru tate bohi kene Jisu he manuh khan ke sikhai dise. 4Aru kotha kua tu ketiya ses hoise, Jisu he Simon ke koise, “Samundor doha jaga te nao loi jabi, aru maas dhoribo karne tate jal phelai dibi.” 5Aru Simon pora jawab di kene koise, “Guru, amikhan raatbhor jal marise aru eku bhi pua nai! Kintu apuni laga kotha te moi jal phelai dibo.” 6Aru ketiya taikhan pora eitu korise, maas besi dhori loise; aru tarkhan laga jal tu bhangibo nisna thakise, 7tetiya tarkhan laga saathi, dusera nao te thaka khan ke mati kene madad mangise. Aru tarkhan bhi ahhi kene nao duita bhi bhorta hoise aru samundor bhitor te dhubi jabo nisna hoise. 8Kintu ketiya Simon Peter pora eitu dekhise, tar Jisu laga theng te athukarhi kene koise, “Prabhu, moi pora dur kori jabi, kilemane moi paapi manuh ase.” 9Kilemane tarkhan pora eneka maas dhora tu dekhi kene tar aru tar logot te thaka khan he asorit lagise; 10aru teneka he Zebedee laga putro James aru John, kon he Simon laga saathi thakise tarkhan pora asorit lagise. Aru Jisu he Simon ke koise, “Bhoi nakoribi; etiya pora tumi bhi manuh laga atma bachabo.” 11Aru ketiya nao tu ahhi kene maati pongchise, tarkhan pora sob shari kene Jisu laga piche te jaise.
Jisu Pora Kuntho-rugi Safa Kora
12Ketiya Tar ekta sohor te thakise, kuntho-rugi pora bhorta hoi thaka manuh ekjon tate ahhise; aru tar ketiya Jisu ke dekhise, maati te athukarhi kene Jisu ke onurudh kori koise, “Prabhu, jodi apuni itcha hole, moi ke safa kori dibo pare.” 13Aru Jisu he nijor haat uthai kene tar logot te chuise, aru koise, “Moi itcha ase, safa hobi.” Aru tetiya loge loge kuntho-rugi pora tar ke sharise. 14Aru kon ke bhi nakobole Jisu he tar ke koise; kintu “Jabi, aru puruhit khan ke nijor dekhai dibi, aru Moses laga hukum te safa hua laga sakhi nimite ki daan dibole koi ase, eitu di dibi.” 15Kintu Tar laga khobor tu arubhi besi he jaise; aru genti napara manuh khan Tar laga kotha hunibole aru kisim kisim bemar hustho hobole jama korise. 16Kintu Jisu he manuh nathaka jungol te alag jaise aru prathana korise.
Jisu Pora Jothor-rugi Hustho Kora
17Eitu din majot te ek din, Tar he sikhai thaka homoi te, Pharisees khan aru kanoon pondit khan usor te bohi thakise, kon he Galilee laga bosti sob pora, aru Judea aru Jerusalem pora ahhise; aru hostho kori dibole Isor laga shakti Tar logot te thakise. 18Aru sabi, manuh khan pora jothor-rugi thaka manuh ekjon bisona te anise, aru tarkhan pora tar ke Jisu usor te anibole sesta korise; 19kintu, manuh khan besi jama hua pora tar ke bhitor te anibole raasta eku pua nai, tetiya tarkhan pora ghor upor te uthai loise aru ghor laga chatai tu phatai kene chenda bonaise, aru tar laga bisona te he niche te pathai kene Jisu laga aage te namai dise. 20Aru ketiya Jisu he tarkhan laga biswas dekhise, Tar eitu manuh ke koise, “Tumi laga paap sob khyama kori dise.” 21Aru pondit khan aru Pharisees khan pora nijor mon te hudi kene korise, “Isor ke ninda kora manuh, eitu kon ase? Isor nahole kon pora manuh laga paap khyama dibo pare?” 22Ketiya tarkhan pora nijor mon te huda tu Jisu he janise, Tar he tarkhan ke jawab dise, “Tumikhan kile nijor mon te prosno kori hudi ase? 23Kon tu kobole asani ase, ‘Tumi laga paap khyama korise,’ na nahole, ‘Uthibi aru berai jabi’? 24Kintu Manuh laga Putro he eitu prithibi te paap khyama dibole odhikar ase eneka tumikhan ke janai dibole he hoise”—tetiya jothor-rugi thaka manuh ke tar koise—“Moi tumi ke koi ase, uthibi, tumi laga bisona uthai kene ghor te jabi.” 25Aru loge loge tarkhan sob aage te tar uthise, aru tar kot te ghumai thakise eitu uthai loise aru Isor ke stuti kori kene, ghor te jaise. 26Aru sob manuh asorit hoi kene Isor ke mahima di kene koise, “Aji amikhan pora ekdom alag, napara kam kora ekta dekhise.”
Jisu Pora Levi Mata
27Eitu pasot te tar jai kene, manuh ekjon Levi koi kene, khajana tula jaga te bohi kene dekhise; aru tar pora tar ke koise, “Moi laga piche te ahhibi.” 28Aru tar uthise aru sob shari kene Jisu laga piche te jaise.
29Aru Levi pora Jisu laga nam te dangor bhoj ekta tar laga ghor te mani loise; aru tate khajana tula khan logot te dusera manuh khan bhi besi bohi thakise. 30Aru Pharisees aru pondit khan pora Tar chella khan logot te apoti korise, aru koise, “Kile tumikhan pora khajana tula khan aru paapi khan logot te khua aru piya kori ase?” 31Aru Jisu he jawab di kene koise, “Kon he bhall ase taikhan karne doctor nalage, kintu bemar manuh khan karne he lage. 32Moi dharmik manuh matibole nahoi, kintu paapi manuh khan paap shikar kori dibole ahhise.”
Logun Karne Prosno Huda
33Aru tarkhan pora Tar ke koise, “John laga chella khan pora majot majot te logun loi aru prathana kori ase, aru eitu nisna Pharisees khan laga chella khan bhi loi, kintu tumi laga chella khan tu khabo aru pibo eneka he ase.” 34Aru Jisu he tarkhan ke jawab di kene koise, “Dulha logot te thaka homoi, saadi te ahha alohi khan ke, tumikhan pora logun koribole dibo neki? 35Dulha tu tarkhan pora loi jabole din ahhibo, tetiya eitu din te he tarkhan pora logun lobo.” 36Tar pora aru ekta dristanto bhi koise: “Konu manuh pora bhi notun kapoor kati kene purana kapoor te nalagai; jodi eneka kore, kapoor tu phati jabo, aru notun kapoor tu purana logot te na-milibo. 37Aru konu manuh pora bhi purana chamra jhola te notun draikhya-roh narakhe; jodi eitu korile, notun draikhya-roh pora purana chamra jhola tu phatai dibo aru nosto hobo, aru chamra bhi nosto hobo. 38Kintu notun draikhya-roh tu notun chamra jhola te he rakhibo lage. 39Aru konu manuh pora bhi purana draikhya-roh pi kene notun tu pi bole monn nai; kilemane tar pora kobo, ‘purana tu he bhall ase.’”
ទើបបានជ្រើសរើសហើយ៖
LUKE 5: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
