LUKE 12
12
Pharisees Khan Laga Khomir Nimite Hushier
1Eitu homoi te, ketiya genti napara hazar hazar manuh khan ekjon he ekjon logot theng pora chapai kene jama kori ahhise, Jisu pora Tar laga chella khan ke koise, “Kopotiya pharisees khan laga khomir nimite hushier koribi. 2Prokahit nakoribole eku bhi bond kori kene nai, nahole janibo napara eku bhi lukai kene nai. 3Eitu karne andhar te tumi ki ki koise, eitu sob puhor te hunibo, aru nijor laga kamra te ki kan te hunai dise, eitu ghor chatai upor pora janai dibo.
Bhoi Nakoribi
4“Moi laga bondhu khan, Moi tumikhan ke koi ase, kon he gau morai dibo kintu eitu pasote eku koribo naparibo tarkhan karne bhoi nakoribi. 5Kintu kon ke bhoi koribo lage eitu Moi kobo: Kon pora aage te morai di dibo aru eitu pasote norok te phelai dibole odhikar ase, Tar ke he bhoi koribi! 6Ghor chiriya pansta duita pennies pora bikiri nakore neki? Aru eitu khan ekta bhi Isor pora napahore. 7Kile bhoi koribo, tumikhan laga matha te thaka chuli bhi sob genti kori kene ase. Eitu karne bhoi nakoribi; ghor-chiriya besi pora tumikhan he besi dam ase.
Manuh Khan Aage Te Khrista Ke Shikar Kora
8“Aru Moi tumikhan ke koi ase, kiman jon pora manuh khan aage te moi ke shikar kori loi, Manuh laga Putro pora bhi Isor laga dut aage te moi shikar koribo; 9kintu kon kon pora manuh khan aage te Moi ke ninda kore, Isor laga dut aage te bhi ninda koribo. 10Aru kon pora Manuh laga Putro birudh te kiba kotha koi, khyama di dibo; kintu Pobitro Atma laga nam ninda kori diya manuh kon bhi khyama napabo. 11Aru ketiya tarkhan pora girja ghor te tumikhan loi jai kene sasonkorta aru khyomota manuh khan aage te anibo, tumikhan keneka uttar dibo, nahole ki kotha kobo eneka bhabna kori kene chinta nakoribi; 12kilemane Pobitro Atma darai tumi ki kobo lage eitu thik homoi te sikhai dibo.”
Okora Dhoni Ekjon Laga Dristanto
13Genti napara manuh khan majot pora ekjon he koise, “Guruji, pitri pora shari diya sampoti moi logot bhag koribole bhai ke bujai dibi.” 14Kintu Jisu he tar ke koise, “Saathi kon pora tumikhan majot te bicharok nahole jhamela faisla kori diya manuh hobole moi ke bonai dise?” 15Aru Jisu he tarkhan ke koise, “Hushier koribi, aru dhon sampoti lubh kora nimite dhyan koribi; kilemane manuh ekjon laga jivon tu sampoti besi thaka pora bona nai.” 16Aru Jisu pora taikhan logot te ekta dristanto loi kene kotha koise, “Dhoni manuh ekjon laga kheti te dhan besi paise; 17aru tar nijor mon te bhabna korise, ‘Moi ki koribo, kilemane moi laga dhan iman besi rakhibole jaga he nai?’ 18Aru tar he koise, ‘Moi eitu koribo: Moi laga bhoral tu bhangai dibo, aru eitu pora dangor ekta bonabo; aru tate he moi laga dhan aru bostu sob jama kori rakhibo. 19Aru moi laga atma ke kobo, atma, besi saal karne tumi ki lage eitu sob bostu jama kori kene ase; aram kori thakibi, khabi, pibi aru khushi kori thakibi.’ 20Kintu Isor he tar ke koise, ‘Tumi okora! Eitu raati te he tumi laga atma loi jabo; aru tumi jama kori rakha sampoti tu kon laga hobo?’ 21Eitu karne kon pora nijor nimite he dhon jama kore, eneka hobo, aru Isor aage te tar dhoni nahoi.”
Eku Chinta Nakoribi
22Aru Jisu he Tar laga chella khan ke koise, “Eitu karne Moi tumikhan ke koi ase, tumikhan laga jivon nimite te, ki khabo eneka chinta nakoribi, nahole tumikhan laga gau nimite ki pindhibo eneka chinta nakoribi. 23Kilemane jivon tu khua lua pora bhi dangor ase, aru gau-mangso tu kapoor pora bhi dangor ase. 24Kauwa chiriya khan laga bhabna kori sabi: taikhan pora bijon nahisai nahole phosol jama nakore, taikhan laga bostu jama kora jaga, nahole bhoral bhi nai, kintu Isor pora palli ase. Eitu chiriya khan pora tu tumikhan he besi dam ase! 25Aru nijor laga jivon karne chinta hoi kene, olop homoi hole bhi lamba koribo para manuh tumikhan majot te kon ase? 26Jodi tumikhan pora eneka huru moru ekta bhi koribole napare, tetiya dusera sob karne kile chinta kori ase? 27Lily phul laga bhabna kori sabi, taikhan keneka uthi thake; taikhan pora kam nakore nahole suta bhi nabonai; kintu moi tumikhan ke koi ase, Solomon laga gaurab sob te bhi eneka sundor pora pindha nai. 28Kintu jodi ekta ghans kon tu aji ase aru kali jui jola jaga te phelai diye, eitu khan ke Isor pora eneka pindhi bole di ase, tu kiman bhi besi tumikhan ke dibo, hei biswas huru manuh khan! 29Eitu karne tumikhan ki khabo aru ki pibo, eneka chinta kori kene mon dukh nakoribi. 30Kilemane prithibi te manuh khan sob pora eitu khan bisari ase; aru tumar Pitri pora tumikhan karne eitu khan lage eneka jani ase. 31Kintu eitu bodli, Tar laga rajyo bisaribi, aru eitu khan sob tu tumikhan ke di dibo.
32“Bhoi nakoribi, hei jak mer khan, kilemane tumikhan ke rajyo dibole Pitri pora besi itcha ase. 33Tumi laga sampoti bikiri koribi, aru dukhiya khan ke madad dibi; aru ketiya bhi purana hoi kene beya nahua purse tumi karne lobi, aru tumi laga sampoti ketiya bhi nahara jaga, sorgo te jama koribo, tate choor manuh bhi nahhi aru puka pora bhi nosto nakore. 34Kilemane kot te tumi laga sampoti ase, tate tumi laga mon bhi thakibo.
Tumi Tayar Hoi Thakibi
35“Tumi khan kam koribo nimite tayar hoi thakibi aru saaki joli thakibi, 36aru manuh kon he nijor malik saadi bhoj pora ahha rukhi thake eitu nisna hobi, tetiya malik ahhi kene dorja te tukurabo aru loge loge dorja khuli dibo. 37Sevak kon malik ahha homoi te naghumai kene thake tai ashish; hosa, Moi tumikhan ke koi ase, Malik he nijor pora komor bandhi kene taikhan ke mez te bohibole dibo, aru tar pora taikhan ke seva koribo. 38Jodi raati baroh baji, nahole eitu piche te Tar ahhe, aru tarkhan naghumai kene paise, eitu sevak khan ashish hobo! 39Kintu eitu janibi, jodi ghor malik khan pora ki homoi te choor manuh ahhi ase eitu janile, tarkhan laga ghor tu bhangibo nadibole ase. 40Tumikhan bhi jugar kori thakibi, kilemane Manuh laga Putro bhi bhabna nathaka homoi te ahhibo.”
41Peter he koise, “Prabhu, Apuni eitu dristanto tu amikhan ke he koi ase na sob manuh ke koi ase?” 42Aru Prabhu he koise, “Tenehole imandar gyani nokor kon hobo, kon ke malik pora Tar laga sampoti sob upor te thik thak kori kene cholabole niyuk kori dise aru thik homoi te khua lua dibole kam dise? 43Malik ahha homoi te eneka thik thak kori thaka nokor ashish hobo. 44Moi hosa tumikhan ke koi ase, Malik pora tar laga sampoti sob upor te imandar hobole eitu nokor ke niyuk koribo. 45Kintu jodi eitu nokor pora nijor mon te eneka koi, ‘Moi laga malik ahha tu dery hoi ase,’ eneka hoi kene jodi tar pora dusera nokor aru nokorani khan sob ke mari kene tar nijor tu khua piya pora nisa hobo, 46Eitu nokor laga malik tu tar pora bhabna nathaka homoi, aru najana din te ahhibo, aru tar ke dondo dibo, aru obiswasi khan logot te rakhibo. 47Aru eitu nokor, kon pora malik laga itcha janise kintu eitu thik kora nai nahole malik itcha mote kam kora nai, besi beya pora dondo pabo. 48Kintu kon pora jana nai, aru teneka dondo pabole laga kam korise, tar pora olop dondo pabo. Kon ke besi di kene ase, eneka he besi mangibo; aru kon ke arubhi besi di kene ase eneka he besi dibo lage.
Shanti Nahoi Kintu Bhag Hobo
49“Prithibi te jui jolai dibole Moi ahhise; aru eitu hobole Moi besi monn ase! 50Moi baptisma ekta pora baptisma lobole ase; aru eitu nalua tak Moi laga mon aram napai! 51Moi prithibi te shanti dibole ahhise eneka tumikhan pora bhabna kori ase neki? Moi tumikhan ke koi ase, nahoi, kintu bhag kori dibole he ase; 52kilemane etiya pora ekta porial te pansta manuh majot te bhag hoi jabo, tinjon he duijon birudh, aru duijon he tinjon ke birudh koribo; 53Tarkhan bhag kori jabo; pitri he putro birudh aru putro he pitri birudh hobo, amaa he putri birudh aru putri he amaa birudh hobo, sasuri he buari birudh aru buari he sasuri birudh hobo.”
Homoi Onubad Kora
54Genti napara manuh khan ke bhi Jisu he koise, “Ketiya pachim phale megh uthi jua dekhi, loge loge tumikhan pora koi, ‘Borukhun ahhi jabo’; aru hosa eneka hoi. 55Aru ketiya dokshin phale pora hava mare, tumikhan he koi, ‘Gorom besi uthi jabo’; aru eneka hoi. 56Tumi kopoti khan! Tumikhan pora prithibi aru akash te ki ulai eitu onubad kori kene bujibole pare; kintu etiya ki hoi ase eitu kile tumikhan pora onubad kori nabuji?
Dushman Logot Te Faisla Kora
57“Aru tumi nijor karne kon tu hosa ase eitu kile bichar nakore? 58Tumi logote birudhi thaka manuh logot adalat te bicharok usor jua homoi te, raasta te he tar logote mil milap koribole sesta koribi, nahole tar pora bicharok haat te di dibo, kon pora odhikar haat te di dibo, aru odhikar pora bandhi-ghor te rakhibo. 59Moi tumikhan ke koi ase, tumikhan naya poisa sob tu natera tak tate pora ulabo naparibo.”
ទើបបានជ្រើសរើសហើយ៖
LUKE 12: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
