Yohana 18
18
Yesu yakhobwa, nahambwa
(Mat. 26.47-56; Mk. 14.43-50; Lk. 22.47-53)
1Olwa Yesu yali nasunjile amakhuwa ako, yarula nende abeechibe, niyaambukha omuchela kwaKidironi, ne ebweneyo omukunda kwaliyo; ne mukwenokwo niyeenjilamwo, ye omwene nende abeechibe. 2Khandi Yuda yesi, omwenoyo owamukhoba, yali niyamanya habundu tsana; shichila Yesu yalinji natsiitsangayo khandi akhanji halala nende abeechibe. 3Kho Yuda olwa yali namalile okhunyoola ing'anda yabasikari nende abakhalabani okhurula khubakhulundu babakuhani nende abaFarisayo, natsiayo, nibali nende tsitaha nende ebitsesol nende ebimanulwa biabwe. 4Kho Yesu, namanyile amakhuwa kosi akali okhwikhola khuye, yarula nabareeba ari Mukhaabanga wina? 5Nabo nibamukalusia bari Yesu oweNazareti. Yesu nababoolela mbu ISIE NISIE. Naye Yuda yesi, owamukhoba, yali nasinjiile ninabo. 6Kho olwa yabasunjila ari ISIE NISIE, beesenda inyuma, nibakwa hasi. 7Kho nabareeba khandi, ari Mukhaabanga wina? Nabo nibasunga mbu Yesu oweNazareti. 8Yesu nabakalusia ari Ndakhamuboolela mbu ISIE NISIE; kho nimuba nimukhaaba isie, leshe bano batsie butsia; 9mbu likhuwa elia yaboola liusibwe, mbu Khubeenabo aba wayambeele, shiyayangorakhwo kata mulala ta. 10Ne Simoni Petero yali nende olukanga; nalutsomola nakhupa omusumba wOmukuhani Omukhulundu, namurema eshirwi eshisaatsa. Ne eliira liomusumba oyo niMaliku. 11ManaYesunamusunjila Petero ari Kalusia olukangalwo mulula; eshikombe eshia Papa yambeele, shineshinyweelekhwo?
Yesu yaleerwa imbeli wOmukuhani Omukhulundu
(Mat. 26.57-58; Mk. 14.53-54; Lk. 22.54)
12Kho ing'anda eyo halala nende omuseesia omukhulundu, nende abakhalabani babaYahudi, nibamukwakhwo Yesu nibamuboha, 13nibamuyila ewaAnasi mbeliyo; shichila ye yali nyakhufialanyene Kayafa, owali nali Omukuhani Omukhulundu omuyika okwo. 14Ne Kayafa omwenoyo niye owali niyabachesiyia abaYahudi mbu kakhakaasa omundu mulala okhufwila abandu bosi.
Petero yamambakhana Yesu
(Mat. 26.69-70; Mk. 14.66-68; Lk. 22.55-57)
15Naye Simoni Petero yalondakhwo Yesu, khandi nende omwechi undi ario. Ne omwechi oyo yamanyikhana nOmukuhani Omukhulundu, niyeenjisibwa halala nende Yesu mulwanyi IwOmukuhani Omukhulundu; 16nebutswa Petero yali nasinjiile hamuliango, elwanyi. Mana omwechi undi oyo, owamanyikha ewOmukuhani Omukhulundu, yarula nasungana nomulindi womuliango, namuleera Petero mukari. 17Kho omukhaana oyo owalindanga omuliango namureeba Petero, ari Nawe wesi shioli mulala owokhubeechi bomundu oyo? Naye nakaana ari Isie ta. 18Ne abasumba nende abakhalabani bali nibasinjiileho, nibabwanile omulilo kwamaanda, shichila omunyili kwaliho; ne bali niboora omulilo; naye Petero yesi yali ninabo, nasinjiile niyoora omulilo.
Omukuhani Omukhulundu yareeba Yesu akamakhuwake
(Mat. 26.59-66; Mk. 14.55-64; Lk. 22.66-71)
19Mana Omukuhani omukhulundu namureeba Yesu akabeechibe, nende akameechesioke. 20Yesu namukalusia mbu Ndaboolanga habulafu imbeli weshialo shiosi; obushia ndeechesinjia mutsisinagogi khandi muhekalu ewa abaYahudi bosi bakhung'aananga; kata shindaboola likhuwa liosi masilisi ta. 21Ureebanga mbushiina? Reeba abeenabo abambulilanga, aka ndababoolelanga shinga olwa kali; lola, abo bamanyile amakhuwa aka ndaboolanga. 22Ne olwa yali nasunjile ario, mulala owokhubakhalabani owali nasinjiileho yamupaama Yesu olukhofi, naboola ari Kho omukalusia Omukuhani Omukhulundu orio? 23Yesu namukalusia mbu Nimba nimboolile obubii, murumbule obuloli khububii obwo; ne nimboolile obulayi, ukhupa mbushiina? 24Kho Anasi namuyila naboyilwe ewaKayafa Omukuhani Omukhulundu.
Petero amwambakhana Yesu khandi
(Mat. 26.71-75; Mk. 14.69-72; Lk. 22.58-62)
25Naye Simoni Petero yali nasinjiile niyoora omulilo. Nibamureeba bari Nawe wesi shioli mulala owokhubeechibe? Niyeeyambakhana, ari Isie ta. 26Mulala owokhubasumba bOmukuhani Omukhulundu, naye nomuluyia wabwe oyo owa Petero yarema eshirwi, nasunga mbu Shikhuluutsi noli mumukunda halala ninaye? 27Mana Petero niyeeyambakhana khandi; habwenaho itaywa niyilakula.
Yesu yaleerwa imbeli waPilato
(Mat. 27.1-2,11-14; Mk. 15.1-5; Lk. 23.1-5)
28Nibamurusia Yesu ewaKayafa, nibamuyila muPraitorio; ne kwali nikushili mumabwibwi; nabo abeene nibareenjila muPraitorio ta, mbu baleshe okhwonoonekha, ne mbu balie Pasaka. 29Mana Pilato narula natsia ewa bali, nasunga mbu Nelikhuwa shiina elia mumwinjilila omundu uno ninalio? 30Nibakalusia nibamusunjila bari Omundu uno narakhabeele omukholi wetsimbii, khane shikhwakhamuhaanile mumukhonokwo tawe. 31Kho Pilato nabasunjila ari Inywe mumubukule, mumuyaasie amalako keenywe shinga olwa kali. AbaYahudi nibamusunjila mbu Shikhufuchiililwa ifwe okhwira omundu yesi ta; 32mbu likhuwa liaYesu liusibwe elia yaboola, namanyia okhufwakhwe shinga olwa khwitsa okhufwana.
33Mana Pilato niyeenjila khandi muPraitorio, nalanga Yesu, namureeba ari Niwe Omuruchi wabaYahudi noho? 34Yesu nakalusia mbu Oboola orio khululwo, nohomba abandi bakhubooleele bario khwisie? 35Pilato nakalusia ari Nasi endi omuYahudi noho? Abelihanga lilio halala nende abakhulundu babakuhani bakhuhaanile mumakhono kanje; eshia wakholile nishiina? 36Yesu nakalusia mbu Oburuchi bwanje shibuli obwomushialo shino ta; ne oburuchi bwanje nibwakhabeele obwomushialo shino, khane abakhalabani banje bakhandasanila, mbu endeshe okhuhaanwa mumakhono kabaYahudi; nebutswa oburuchi bwanje shibuli bwahano tawe. 37Mana Pilato namureeba ari Kho okhali omuruchi? Yesu nakalusia mbu Niwe ouboolile orio, mbu endi omuruchi. Niko akachila ninzibulwa, khandi niko akachila ninzitsa mushialo, mbu erumbule obuloli khubwatoto. Buli mundu ouli wobwatoto ahulila omwoyo kwanje. 38Pilato namusunjila ari Obwatoto nishiina?
Yesu yakhalachilwa eshiina shiokhufwa
(Mat. 27.15-31; Mk. 15.6-20; Lk. 23.13-25)
Ne olwa yali naboolile ario, yarula khandi natsia ewa abaYahudi abo bali, nabasunjila mbu Shinduutsi eshikha shiosi muye ta. 39Ne muli nende eshiima, mbu emulekhuulile omundu mulala khuPasaka. Mwenya mbu emulekhuulile Omuruchi wabaYahudi? 40Mana nibayiiba khandi, nibaboola bari Omundu uno ta, habula Baraba. Naye Baraba yali omunuuli.
ទើបបានជ្រើសរើសហើយ៖
Yohana 18: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
