Roma 10
10
Pɛ Yúda pwɛ pɛ mvémvé kaa náá ke tsɛʼɛ ndaʼ taʼ Ntsɛɛpɔŋ
1Pɔ́ŋmɛ́ páá, yɔ́b yɛ́ a ndzó ndzɔʼ ya, mə mbó ntsɛʼɛ Mboʼmvé ndúŋú ŋkyé pɛ́ Yúda nɛ́, pɛ́ɛ́ ŋgâ, pɔ́b tséʼé ndzǔne. 2Ŋkyé ŋgâ mə cʉ̌yí ndzé ŋgâ, pɔ́b tséʼé zyaŋambəb ne no Mboʼmvé. Ntsʉʼ mbé, yéré zyaŋambəb pe tséʼé zɛ́no yáŋme pó. 3Mbziʼe njʉ́ pɔ́b kɛ pe zɛ́ njʉ́ Mboʼmvé zhyɛ́ ŋɔŋ pɛ ŋgerɛ́ŋged siŋ ye nɛ́ pó, pɔ́b taʼ wɔ́b mɛndɔ́b ne mbéne ŋgerɛ́ŋged, mbó mbé fɛ́ mbəb yɔ́b syé siŋ ŋgerɛ́ŋged Mboʼmvé pó. 4Ŋkyé ŋgâ, a Kristo mbé yuŋɔ tó kaŋ. Yânéré kɛ́ʼɛ́ ŋgâ ŋkɔŋɔ pɔŋ pɛ́ pɔ́b tséʼé psyɛ́ndzɔʼ náá nɛ́, Mboʼmvé zhʉ́ wɔ́b njʉ́ puŋgerɛ́ŋged nɛ́.
5Mbɛ ŋkɔʼɔtómbəb Mǔsê, kɛ ke ŋweʼe mbziʼe njʉ́ tɛɛmbɛ́ kaŋ zhyɛ́, Mboʼmvé zhʉ́ ŋɔŋ njʉ́ ŋugerɛ́ŋged nɛ́, ŋkhoʼyɛ́ a kɛ nsó ŋgâ: «Ŋɔŋ wɛ́ a nyí njʉ́ kaŋ tsɔ́ nɛ́, náʼá ndáá ndúŋú ntsɛʼɛ tsómvé.» 6Tsʉ́ʼmbé, mbéne ŋgerɛ́ŋged siŋ Mboʼmvé yɛ́ a zhyɛ́ psyɛ́ndzɔʼ nɛ́, tsɔɔ ŋgâ: «Wo ndɛ naʼ tsɔ ndzó ndzɔʼ yo ŋgâ, a náʼá ŋkɔʼɔ wɔ pépéé?» Wo pó nɛ́ ŋgyɛ́ ŋgâ Kristo shʉyí syé. 7Kii nsó ŋkʉ́rʉ́ ŋgâ: «A ŋkʉyo shʉyí wɔ́ ndzó sə́b?» Mbǒ wo pó nɛ́ ŋgyɛ̌ ŋgâ Kristo pó ntwɔ́ ndzɔʼɔ pfɔ̂pɔŋ. 8Tɛ nsó wéré tsɔ̂ ŋgâ kɔ́ nɛ́? A tsɔɔ ŋgâ: «Nsó Mboʼmvé pɛɛ ne ghə wo, a pɛɛ tswee wo, a pɛɛ ndzó ndzɔʼ wo.» Nsó wéré a nsó psyɛ́ndzɔʼ wɛ́ psî cʉ́rɛ nɛ́. 9A pɛ́ɛ́ yɛ́ wo nsó ne ntswee wo tsetsɛrɛ pɔŋ ŋgâ, a Yěsô Kristo mbé Ntsɛɛpɔŋ, wo pó mbzyɛ́ ndzó ndzɔʼ yo ŋgâ, Mboʼmvé kɛ zhʉyɛ́ wé ne vó nɛ́, mbǒ wo ŋkʉ́yó ntsɛʼɛ ndzǔne. 10Ŋkyé ŋgâ mbzyɛ́ne ndzó ndzɔʼ wo, zhyɛ́ ŋgâ Mboʼmvé tiŋɛ́ wo njʉ́ ŋuŋgerɛ́ŋged nɛ́. Nsóne ne tswee wo tsetsɛrɛ pɔŋ, zhyɛ́ ŋgâ Mboʼmvé kpee wo. 11Ɔ́ŋɔ́, Ŋweʼe Yáŋme tsɔ́ ŋgâ: «Ntsyé ŋɔŋ wɛ́ a tséʼé psyɛ́ndzɔʼ mbəb yé nɛ́, náʼá ntseʼe pfɔ́shʉ́ŋ pó.» 12Néré kɛ́ʼɛ́, ŋɔŋ Yúda pú ŋɔŋ Gerɛʼ, kaa náá mbɛɛ taʼ no. Ŋkye ŋgâ, pɔ́b kpaʼ náá ke ntsɛʼɛ taʼ Ntsɛɛpɔŋ, wɛ́ a zhyɛ́ meno sʉ́ʼʉ pe zááme, mbəb ŋkɔŋɔ pɔŋ pɛ́ pɔ́b fú wé náá nɛ́. 13Ŋkyé ŋgâ Ŋweʼe Yáŋme tsɔ́ ŋgâ: «Ntsye ŋɔŋ wɛ́ a fú Ntsɛɛpɔŋ nɛ́, ŋkʉ́yó ntsɛʼɛ ndzǔne.»
14Kɛ́ʼɛ́, tɛɛmbɛ́ ŋɔŋ fú wé nɛ́ pé níŋ, kii psyɛ́ndzɔʼ yé pɛ́ɛ́ mbəb yé? Tɛɛmbɛ ŋɔŋ tíí ndzɔʼ mbəb ye pe níŋ, kii pě ndzoʼo njʉ́ pe nsó no yé nɛ́? Tɛɛmbɛ ŋɔŋ zoʼ no yé pé níŋ kii a pe ŋɔŋ ncʉ́rɛ? 15Tɛɛmbɛ ŋɔŋ cʉ́rɛ níŋ kii pé twɔ́ wé? A zhyɛ yéré a pe ŋweʼéme ŋgâ: «Ndebéne gháʼmbwo mbwó ŋkhoʼyɛ́ pɔŋ pɛ́ pɔ́b cʉ́rɛ Ŋkəŋ sʉ́ʼʉ nɛ́, tsé ŋkʉ́yo nɛ́!» 16Tsʉʼ mbé ŋkɔŋɔ pɔŋ náá kɛ́ pé nyí njʉ́ Ŋkəŋ sʉ́ʼʉ kɛ tsɔ́ nɛ́ pó. Ŋkyé ŋgâ ŋgaŋatsɔ́kpaŋató Mboʼmvé Ezaya nsó mbɛsə́b ŋgâ: «Ntsɛɛpɔŋ, a kɛ psyɛ́ wɔ́ mbzyɛ́ nsó wɛ́ psi kɛ cʉrí nɛ́?» 17Á nsó wɛ́ pe cʉ́rɛ nɛ́ fɛ́ psyɛ́ndzɔʼ ŋkhoʼyɛ́ pe zoʼ nɛ́, no yéré yɛ́ pe ncʉríne pe zoʼo nɛ́, á Nsó Kristo. 18Mə mbó mbzírɛ́ nɛ́ ŋgâ, tɛ pɔ́b kɛ pe zoʼ nsó wéré pɔɔ? Ngaŋ! pɔ́b kɛ zoʼ kpaʼ siŋ. Ŋweʼe Yáŋme tsɔ́ ŋgâ: «Ŋkɔŋɔ ndúŋú tsetsáʼ náá kɛ zoʼ ndzəb yɔ́b, nsó wɔ́b pó mgbáʼá ndzó ŋkɔŋɔ pɛ sáámvé náá.» 19Mə mbzírɛ́ nɛ́ ŋgâ, pɔ́ŋ Issayɛ kɛ pé zoʼ pɔɔ? Néré, kaŋ Mǔsê tsɔ́ ŋgâ: «Mo Mboʼmvé mə náʼá ŋgyɛ puŋ tséʼé sháŋá mbəb ŋgɔŋ wɛ́, á zyé mbé pé cyó yɔ́b nɛ́ pó, mə náʼá ŋgyɛ́ puŋ tséʼé pʉ̌ŋgye mbəb ŋgɔŋ wɛ́ a zyé mbé tséʼé cyó zé nɛ́ pó.» 20Ezaya ŋgaŋatsɔ́kpaŋató Mboʼmvé kɛ gbǎndzɔʼ yé, kaʼatɛ nsó ŋgâ: «Mo Mboʼmvé, pɔŋ pɛ́ pɔ́b kɛ pé tsé ntáʼá nɛ́ pó, kɛ zhʉ́ ya. Mə kɛ nyoʼ mbəb ya pwó pɔŋ pɛ́, pɔ́b kɛ pé tsé mbzírɛ́ ya ne cyó yɔ́b nɛ́ pó.» 21Tsʉʼmbɛ́ ne Issayɛ, a nsó ŋgâ: «Ndzyěne ne ndzɔʼɔwáá mbáŋ ne fwɔ̌nab, mə kɛ tsiŋa pwó ya pwó pɔŋ pɛ́, ndzɔʼ yɔ́b tʉ̌ŋ ŋgaʼmbwó nɛ́, pwɛ ghaŋámíító.»
ទើបបានជ្រើសរើសហើយ៖
Roma 10: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
