2 Korɛŋto 5
5
A zhyɛ psyɛ́ndzɔʼ pe tsómvé
1Psi cʉ̌yi ndzé ŋgâ ywoʼɔ́tsó zhí ndúŋú tsetsáʼ pɛɛ taʼ ntab yɛ́, a kʉyo sáʼá taʼ zhyémve nɛ́. Mbɛ néré, psi tséʼé taʼ ndáb yɛ́ a kwód Mboʼmvé ne tómbəb ye nɛ́ pépéé, yɛ́ a naʼ ŋgú ndzó cyó nɛ́ pó, a pe kwód ŋumesɔŋ ne pwó me pó. 2Ne ŋkhoʼyɔŋ, psi tsé ndzoʼo zúʼú kaʼatɛ, ŋkyé ŋgâ psi tsé ndzɔ́ŋɔ mgbéé ndúŋú mbəb zhí yɔŋ, njʉ́ pe ndɛ mgbéé ndzwé nɛ́, ndáb zhí yéré yɛ́ a pépéé nɛ́. 3No pɛ́ɛ́ ndaʼ ŋgâ psi ndɛ náʼá mbé ntsíŋí, psi náʼá pɛɛ ne ndzwé mbəb psi. 4Ŋkye ŋgâ, piŋi pɛ piŋi ndzó ntab yɔŋ nɛ́, piŋi tsé ndzoʼo zúʼú, njʉ́ pɔŋ pɛ́ pɔ́b kyɛ́ peʼ tédme nɛ́. Taʼ no yóʼó! a pe nɛ́ pe ŋgâ piŋi zɔŋɔ sɔ́rɔ ndzwé yéré pó. Ntsʉʼmbé, piŋi nzɔŋɔ mgbéé ncyó ndzwé ndúŋú yéré. Yânéré ŋgâ yɛ́ a ye tsómvé nɛ́ kʉyó mé yɛ́ a fɛ́ vó nɛ́. 5A kɛ tsúŋu Mboʼmvé, tsúŋɔ wíŋi ndúŋú yéré no yɛ́ a náʼá mbɛ nɛ́. A pó fɛ́ Zhʉye yáŋme ne piŋi, yânéré ŋgâ piŋi zé ŋgâ, a náʼá mbó fɛ́ pɛ foʼ zááme ne piŋi. 6Néré kɛ́ʼɛ́, piŋi tséʼé shʉ̌ndzɔʼ ghɛmbɛ néré tsé ndzɛ́ ŋgâ ŋkhoʼyɛ́ piŋi kɛ tsó ndzó yɔŋ ndzǎbmbəb nɛ́, piŋi zé nɛ́ ŋgâ piŋi pe nɛ́ pe ndzó ywoʼɔ́ tsó yiŋi pó. Taŋa yiŋi kɛ saa nɛ́ pfúŋɔ́ Ntsɛɛpɔŋ. 7Ŋkye ŋgâ a zhyɛ́ psyɛ́ndzɔʼ, piŋi nyí, a zhyɛ́ míí pó. 8Ɔ́ŋɔ́ psi tséʼé shʉ̌ndzɔʼ mbó ŋkʉ́yé ne ntěne yɔŋ ndzǎbmbəb, ŋgú tsó pfúŋɔ́ Ntsɛɛpɔŋ. 9Ŋkʉ́rʉ́, no yɛ́ psi zɔŋɔ nɛ́ a pɛɛ ne ŋgyɛ̌ne no yɛ́ a pǔ wé nɛ́, kii psi kɛ tsɛʼɛ ndzǎbmbəb yɔŋ, kii psi tê tě! 10Ŋkye ŋgâ, a nzɔŋɔ ŋgâ ŋkɔŋɔ wíŋi náá ŋkʉ́yó ntsɛ́ ndzó ywoʼɔ́ sábáfiʼ yɛ́ siŋ Kristo nɛ́, a fiʼɛ wiŋi. Yânéré ŋgâ mbɛ wɔ̂wɔ̂ kʉ́yó tséʼé tsɔʼɔfaʼ ye yɛ́ a kɛ fáʼa ŋkhoʼyɛ́ a kɛ pɛ ndúŋú tsetsáʼ nɛ́, kii a kɛ faʼa sʉ́ʼʉ kii a kɛ fáʼa kəpɔŋ.
Pɔŋ záʼá mbəb Kristo pwɛ Mboʼmvé njʉ̌yí sáʼá
11Njʉ́ psi zé yɔ́b yɛ́ pɔ́ɔ́ Ntsɛɛpɔŋ yéré nɛ́, psi táʼa njʉ́ tɛɛmbɛ pɔŋ psyɛ́ no Mboʼmvé nɛ́. Ntsʉʼmbé a siŋ Mboʼmvé a zɛ́ ŋkɔŋɔ wíŋi náá. Mə mkpâŋ ŋgâ ŋ ŋkɔʼɔtómbəb yuŋ, puŋ cʉ̌yi cʉ̌yi ndzɛ́ ywí ndzó ndzɔʼ yuŋ. 12Psi tsé mbé zɔŋɔ mbɔ́rɔ́ tsé nyóʼó mbəb zhí ne tómbəb zhi ŋkʉ́rʉ́ ne puŋ pó. Ntsʉʼmbé psi zɔŋɔ ntee ywoʼ ne puŋ, ŋgâ puŋ tiʼé ŋkyé ywí, kɛ́ʼɛ́ ŋgâ puŋ tséʼé no yɛ́ tɛɛmbɛ puŋ pɔ́rɔ́ pwó pɔŋ pɛ́, mɔ́b tiʼéne ghɛmbɛ, mbé twɔ̌ ndzɔ́ʼɔ́ meno pɛ́ a ndzó ndzɔʼ nɛ́ pó, ntsʉʼmbé, mbɛ́ɛ́ ndúŋú meno pɛ́ míí pɔŋ tsɛ́ ndúŋú nɛ́. 13A pɛ́ɛ́ yɛ́ kpaʼ sísíŋ, psi kɛ pé pɛ ghəghəŋ nɛ́, mbǒ psi kɛ pé néré pé pwó Mboʼmvé. A pɛ́ɛ́ yɛ́ psi tséʼé zé ŋkhoʼyɔŋ nɛ́, mbǒ a pé néré ŋkyě wuŋ. 14Kəŋe yɛ́ Kristo kɛ tséʼé ŋkyé wíŋi nɛ́, zɔ́ wíŋi kaʼatɛ, piŋi pɛ́ piŋi zé ŋgâ taʼ ŋɔŋ wé mɔʼɔ kɛ pfó ŋkyé ŋkɔŋɔ pɔŋ náá nɛ́, yéré nyóʼó ŋgâ ŋkɔŋɔ pɔŋ náá kɛ kaa náá pfó. 15A kɛ pfó ŋkyé ŋkɔŋɔ pɔŋ náá, yânéré kɛ́ʼɛ́ ŋgâ ŋkɔŋɔ pumɔ́b náá ndɛ mbó tsó mvé ŋkyě tómbəb yɔ́b, ntsʉʼmbé ŋkyě pé yé, yé wɛ́ a kɛ pfó mbó njʉyɛ́ ŋkyé wɔ́b nɛ́. 16Ndzyěne ŋkhoʼyɔŋ, piŋi ndɛ ndiŋɛ́ ŋɔŋ pe njʉ́ pumésɔŋ tíŋɛ́ nɛ́. A pɛ́ɛ́ yɛ́ piŋi kɛ tíŋɛ́ Kristo pe njʉ́ pumésɔŋ tíŋɛ́ nɛ́, mbǒ a ne ŋkhoʼyɔŋ kaʼa, piŋi pó mbé zɛ́ wé pe néré ŋkʉ́rʉ́ pó. 17Néré, a pɛ́ɛ́ yɛ́ ŋɔŋ pwó Kristo nɛ́, mbǒ a tsʉʼ taʼ ŋɔŋ ffé. Ŋkye ŋgâ ŋkɔŋɔ zuŋ meno náá kɛ záʼ, kɔŋe náá cʉ́ʼɔ́ pe ffé ŋkhoʼyɔŋ. 18Ŋkɔŋɔ wéré náá twɔ́ pwó Mboʼmvé, yé wɛ́ a kɛ zhʉyíí sáʼá zhyɛ́ pɔ́b yǎ mbəb Kristo nɛ́, mbó tsɔʼɔ ywí ne fǎʼne faʼ zhʉyíí sáʼá yéré nɛ́. 19Ŋkyé ŋgâ mbɛ ne ŋkɔŋɔ ndzáʼa náá, Mboʼmvé kɛ yǎ mbəb Kristo njʉyíí sáʼá ywɛ pumésɔŋ, kii tsé náá no yɛ́ pɔ́b kɛ vô nɛ́. Mbó twɔ́ ywí ŋgâ psi ŋgú cʉrí nsó zhʉyǐ sáʼá. 20Néré kɛ́ʼɛ́ psi pɔŋ pɛ́ Kristo twɔ́ nɛ́, Mboʼmvé pó ndzáʼá mbəb psi, fú wuŋ. Ne tíí Kristo, psi poʼómbwó nɛ́ ne puŋ, ŋgâ puŋɛ Mboʼmvé zhʉyǐ sáʼá yuŋ pɔ́b nɛ́. 21Kristo, yé wɛ́ a kɛ pe zhyɛ́ cyó no kəpɔŋ nɛ́ pó, Mboʼmvé kɛ fú wé ne kəpɔŋ ŋkyé wíŋi kɛ́ʼɛ́ ŋgâ, a yǎ mbəb yé, piŋ pé ŋgerɛ́ŋged siŋ yé.
ទើបបានជ្រើសរើសហើយ៖
2 Korɛŋto 5: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល