Efesiɛ́ŋ 4
4
Gɛfuág gá nuɔ́l ná Kilíse agá nɛlad
1Kánɛ́ gɔ́g yaŋuá inúbísógólonyó, yaŋuá inyá agá gians gá mbíne gágual ká nŋuálaan Ɔgúnɔ́ buol. Nsɛ́ gusɔ́d gán bá anyɛ́ Gɔdányá méebílén gigúl umáanúbɛ́laán 2Énubísélenyi busió buum, nudidɔga, nuɔ́mínɔɔn. Mɔnd mágual bɔbɛ, mbaán nobusió na gulɛ́ga wɔ́. 3Ánubɛ́gɛ́ndɛ́naán ká núbá buóny búmoóm agá nɛlad ɛnɛ́ Ɛsámb yá Mefúny nuéŋené, ta agá bumben búnúládaná banuá na banuá. 4Giɔ́b gá beédéb nyɛ anyɛ nuɔ́l ná Kilíse, núnyɛ́ númoóm gusúg, gɔɔ́gɔ anyɛ́ Ɛsámb yá Mefúny nyá ímoóm. Buanda táŋ búmoóm ubú Gɔdányá máanúbɛ́lɛ́gɛ́n ká nuágaan eŋís gá bú. 5Ɔgúnɔ́ nyɛ omoóm, guádáb gúmoóm, gɔɔ́gɔ anɛ́ nduén nyá imoom, 6Gɔdányá nyɛ́ táŋ omoóm, uwɔ́ unyá sié wa band gidigid, ugúmányɛ́ganɛn buanda gidigid, unyɛ kɔɔ́m gidigid na aga band gidigid. 7Sig eŋédéb ugúbianan ubú Gɔdányá agág gá bese méeŋín wɔ́, gɔɔ́gɔ anɛ́ Kilíse méediéŋeén gá buol bág. 8Buád buanda mbɔbɔnɔ ɔyɔnɔ́ ká: Anyɛ́ umáabɔ́lɛ́gaán ugumuana, uwayág bambɛ́lɛmbɛ́l, uwadɔ́mbán bɔ́, uwéŋin band manda má bese. 9Gubɔ́lɛ́g ugumuana guɔ́yɔ ká giág? Gúguamba guɔyɛd ká, umakɛ́n gudúnúg aya egegus. 10Ewe uméedúnúg, unyɛ sɔ́n ewe umáabɔ́lɛ́g ugumuana pát ká úfuógidonyi manda gidigid. 11Uwɔ́ umáal ká band bá, ebe bedúméb, ebéné mubús má Gɔdányá, bóndodió bedúmb Ndág ya Nsɔ́m, bómodió sɔ́n béndenyi band bá Gɔdányá, bónd béfúnyifunyi band gugál gág. 12Anányɛ umáal ká band bá Gɔdányá bá kabál kabál gá gualaan wɔ́ buól ká nuɔ́l ná Kilíse gumaan, 13guám anɛ́ diganuámɛ́nɛn basuá bem ká díbá omoóm agá guádáb na ká dɛ́lɛ́ns Mɔɔn wá Gɔdányá. Digagumaan agá guádáb diég agá edény wa Kilíse. 14Ány, didigand gubá biendiny, didigand gubɛ́fuáganan mɔɔn wa gilu uwɔ́ binób bá manaŋá abɔ́sa yugulené máy mem. Isána yá biád bá ɛmbɛ́dágɛ́dɛ́n digand gudídeŋenyi, band digand gudínéŋe na bɛsɔbɔ ɛbɛgɔn. 15Dímɔ́yɔnɛn gɔg meliŋítas basuá na basuá, dɛlɛ́ganɛn sɔ́n basuá na basuá, digagɔmaan agá buanda gidigid aga Kilíse unyá ɔduɔ́ wá beédéb. 16Uwɔ́ walaná ká band bág bá ɔlɔŋ, bábá baladan anyɛ́ ɔŋɔgɔn yá nuɔ́l ládaná nuɔ́l gidigid. Gɛsɛgɛl maláŋ mɔ́ nuɔ́l álaná buol bɔ́b anɛ́ buófonó, nuɔ́l gúgumaan bese. Anaány sɔ́n búnyá na giɔ́b gá beédéb. Bámálɛ́ganɛn bɔ́bɔ́ na bɔ́bɔ́, giɔ́b gɔ́baan nobusió.
Na nsua na nɛ́nuán
17Buanda ebue inuɔ́yɔnɔ́ yond inúsílen agá ɔfɛ́n wá Ɔgúnɔ́ nyɛ ká: Nudiánd gúbígɔ́lɔɔn anɛ band bádiálɛnsána Gɔdányá, ɛmbɛ́dágɛ́dɛ́n sɔ́b digúdúgúne ta gá buanda. 18Sɛ́nyɛ anyɛ mbíne. Bányɛ anyɛ benyi ɔgɔ́ gusɔ́d ugugɔ́s ugú Gɔdányá éŋené, gágual ká bányɛ́ na ɔduɔ́ gulal, badigúlɛnsaan ta buanda. 19Bádigúlɛnsaan sɔ́n ɔduɔ́ gɔnɔ́, báguág duɔ́l dɔ́b gá gubídɔ́bɔ, gɔb águám gá guala manda móndodió má ɔduɔ́ gɔnɔ́. Gɔɔ́gɔ búbú bámbaná. 20Banuá gɔg, saá nɛnama iniány numáafɔ́nɔfɔɔ́n manda málɛ́ŋaná Kilíse. 21Anyɛ́ búnyá ká bégunúlínsi ubú Yésu nyá, obónd ebenúfúnyifunyi gɔɔ́gɔ́ meliŋítas mányá agagá, 22nugúbianan gɔg ká núnɛɛn bielínyélínyé bán bá nsua bínyá gubá biágaan nagadá wanɔ biíle, gágual ká, bɛsɛmɛ́dɛ́n bán égunúnéŋe, ɛbɛ́baan nanɔ agá bunyím. 23Ánubɛ́nɛɛ́n ká Ɛsámb yá Mefúny núgi ɛmbɛ́dágɛ́dɛ́n sán. 24Ánulád gɛŋɛ́lɛŋɔ́siɔ gá gual ugú Gɔdányá méedényígényí. Meliŋítas guódonyi gual uguány ká gubá osi, na begubeg.
25Buád buanda, buófonó ká núdɔ́mb gunéŋenin. Nsɛ́ mɔnd gidigid ɔ́yɛdɛn sɔ́gɔ́ waga meliŋítas gágual ká dinyɛ agá nɛlad. 26Ɔ́mɔ́b ilób, ídigudídígín ká ál buanda bá bɔbɛ, nsɛ́ ɔdɛm wɔ́w fuog, ɔ́ny maányɛ údínaábɛ́dɛ́mɛ́n. 27Nudiéŋín Satan gias. 28Nsɛ́ beéb diánd guéb, nsɛ́ bála gɛnɔg gá buol na ɛmbɔg sɔ́b ká bábia buanda bégúdúgúne sɔ́n band basámaná. 29Nudigálá biád bá gugál, ánugálá gugál gúdúgúnené bɔsɔ́gɔ́ ká bágúmaan agá guádáb, nugála manda másɛ́gɛmananá ká médúgúne band bɔ́bídɔ́lɛ́gɔnɔ́. 30Nudilóbógónyí Ɛsámb yá Mefúny, ínyɛ́ bulinsi Gɔdányá máanuág ká údíye ká nunyɛ bág, na ká buɔ́s búndodi, ugodísódi busió buum. 31Nudibɛ́dɛ́gaán bɔbɛ ubú básaágunuál agán gá ɛdɛm. Nudiliŋi, nudiɔ́b ilób. Dugogó, ɛnsɛgɛ na anama yá bɔbɛ gidigid diánd guánɛ́g aganuá. 32Búguófoon ká núbá banuá na banuá agá bese, nudidɔká, nunɛnanɛn gɔɔ́gɔ anɛ́ Gɔdányá máanúnɛ́nɛ́n góbusió bá buanda ubú Kilíse máal gán góbusió.
ទើបបានជ្រើសរើសហើយ៖
Efesiɛ́ŋ 4: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល