Efesiɛ́ŋ 1
1
Mbígélid
1Yaŋuá Pólo, inyɛ edúmeb wá Yésu Kilíse agá gubílén gá Gɔdányá. Nŋuɔ́ŋɔɔ́n ebe bányá bá Gɔdányá agá giɔ́b gá beédéb gínyá Efɛs, giádábaná Yésu Kilíse. 2Nsɛ́ Gɔdányá Sié wasɔ na Yésu Kilíse Ɔgúnɔ́ wasɔ nufɔ́n wónd únúfá bumben.
Nubo ná kand nsúgie
3Nukany bá na Gɔdányá, Sié wa Ɔgúnɔ́ wasɔ́ Yésu Kilíse unyá gudɛfɔ́n agás gá nɛlad na Kilíse, na anama yá bɛfɔn gidigid bíleniné ugumuana aga Ɛsámb yá Mefúny. 4Ká gus sién gúbɛ́lɔŋɔ, Gɔdányá mabá umámán gudiéyid agá nɛlad na Kilíse, ká dɛ́bá bág na ká, dɛ́bá kandɛ gɛbɔ́liɔ́ agág gá éŋís, anyɛ́ gúnyá ká ugúdɛ́lɛ́ga. 5Nsua na nsua, umediéyid ká dɛɛ́y baan bág. Umandɛ́n agá Yésu Kilíse ká wál bú nɔ́. Anaány umáambá ká wál gág gá gubílén. 6Nsɛ́ díkánya wɔ́ gɔg góbusió bá bese waga unyá duúmé, ɔwɔ́ uméediéŋín gá gilé, anyɛ́ dínyá bulada na mɔɔn waga umenyené gubíléne. 7Na manɔŋ má Kilíse Gɔdányá máadiáŋɔ́n agá bɔbɛ uwond uwadɛ́nɛnɛn bɛfal bás. Ány uméedídíyé nanyá bese waga unyá duúmé. 8Gɔdányá móodífuógí na bese waga, uwadifá nsiŋi na gɔlɛns gidigid. 9Uwedílínsi nugéd nág númáabá nuɔsɛ́gɔ́n nsua. Umabá umámán gusɔ́mb ká ugaal nɔ́ agá bese waga, uwadambɔn nɔ́ aga Kilíse. 10Nugéd unuány nyɛ ká, gɛsɛgɛl gaal gɛ́másɛgɛman, ugagɔ́sá manda má gúmuana gidigid na má gus ká Kilíse bá Ɔgúnɔ́ wá mɔ́. 11Agá nɛlád nás na Kilíse, dimadáŋáb niaf ɛnɛ́ bámáadɛ́dánɛn, gágual ká umakɛ́n gudiéyid gumaányɛ nsua. Anaány ufuógonyó manda gidigid gɔɔ́gɔ anyɛ́ umáasɔ́mb. 12Nsɛ́ díkanyá gɔg budúme bá Gɔdányá, basuá dimáabá bóbúsió gá guág ɛdɛm saás aga Kilíse. 13Banuá sɔ́n nunyá agá nɛlad na Kilíse, anyɛ́ numɔ́ɔb gugál gá meliŋítas, gúnyá Ndág ya Nsɔ́m inúleniné na gisódio. Núguádáb Kilíse, Gɔdányá uwanuág bulinsi bág ká udíye ká nunyɛ bág. Bulinsi ubuány nyɛ Ɛsámb yá Mefúny iyɛ́ umɔ́ɔyɛ́d ká ugadífá. 14Ɛsámb yá Mefúny iyaány nyɛ niaf ná busió ná manda má bese ɔmɔ́ Gɔdányá bɛ́dɛ́ganá góbúsió bá band bág. Digabia mɔ́ anyɛ́ ugonúfuógi gisódio gás. Nsɛ́ díkánya gɔg budúme bá Gɔdányá!
Pólo gúbísógólonyi góbúsió bá beédéb
15Anyɛ́ inyá guɔ́b ká nuguádábaan Ɔgúnɔ́ Yésu, na nanyá nubílénené ebe bányá bá Gɔdányá, 16buád buanda yaŋuá sɔ́n, ndiɔ́dɔmbɔ́nɔ́ guéŋeen Gɔdányá giod gá bese gán góbúsió. Gigúl gidigid ɛgɛ́ mbísógólónyó, nŋúnúbɛ́dága. 17Nŋuófoon Gɔdányá Sié wa nugúm, Gɔdányá wa Ɔgúnɔ́ wasɔ Yésu Kilíse ká únúfá agá nsiŋi yíleniné agagá ká nuɔ́sɔn wɔ́, núbaan nobusió na gɔlɛnsan wɔ́; 18úfuun ɛdɛm sán ká sɛ́bia gise, núlɛns buanda ubú numáag ɛdɛm sán gá bú anyɛ́ umáanɔ́bɛ́lɛ́gɛ́n, nuónd núlɛ́ns sɔ́n bɔnɛ́m búnyá bunɔ́g giod, bɔnɛ́m umáabɛ́dɛ́gɛ́nɛ́n band bányá bág. 19Nguámba sɔ́n ká núlɛ́ns gianta gág gá bugaga giálaná buol nagadá wasɔ basuá beédéb. Gianta gá bugaga igiány, Gɔdányá medíyé meliŋítas má gɛ́, 20gigúl ɛgɛ́ uméenyúgí Kilíse aga ebeguén, uwelukuminyi wɔ́ agág gá ɔmbɔ́g uwɔnɛm ugumuana. 21Uguány, Kilíse máamányɛ́gɛ́nɛ́n manda gidigid, bugaga gidigid, na manda gidigid mányá na bugaga uguány muana. Ɔfɛ́n wág gúgúme gudɔ́mb ɛfɛ́n gidigid sɛ́nyá agá gus gá nɛ́nuán, na ugúlené. 22Gɔdányá máag buanda gidigid gúsígúsié wa bɛgɔnd bá Kilíse, uwond uwéŋin wɔ́ ká úbá Ɔgúnɔ́ wá giɔ́b gá beédéb, 23gɛ́gɛ́ giád gínyá nuɔ́l nág. Ugúsɔ́dɔɔn busió buum nagadá wa giɔ́b igiány, gɔɔ́gɔ́ anɛ́ Gɔdányá sɔ́dɔnɔ́ busió buum aga Kilíse.
ទើបបានជ្រើសរើសហើយ៖
Efesiɛ́ŋ 1: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល