Luka 20
20
Umbhuzo nesimba lyaJesu
(Mateo 21:23-27; Mako 11:27-33)
1Limwe izhuba echinolayija banhu mutempeli ebhaunula iNdebo iMbuya, bakulwana babatebuji nabakwali bomulawo akale nabakulugulu bose bakezha, 2beti kwaali, “Tibuje, unowawana kupi masimba okuta yezwi kana kuti ndiyani wakakupa masimba yaya?”
3Wakabashandula eti, “Nami ndichamubhuza chinhu chimwempela, ndibujeni, 4umbhabhatizo waJoni wakava kuna Mwali kana kubanhu?”
5Bakatanga kubhuzana chabochabo beti, “Tingoti kudenga, uchati, ‘Ani biya ini musakadimbwa mwaali?’ 6Asi tingoti, ‘Kubanhu’ banhu bose banotipubula namabwe, nokuti balogunchikana kuti Joni wakabeli undebambeli waMwali.” 7Nokudalo bakashandula beti, abatoziba kuti lwakava kupi.
8Jesu wakati kunaibo, “Nami neebo anditomubuja kuti yezwi ndozwita nesimba lyani.”
Unkwejaniso wabacheneki bominda wonzhambi
(Mateo 21:33-46; Mako 12:1-12)
9Wakatanga kubuja banhu unkwejaniso yoyu: “Unhu wakabyala unzhambi muminda uwe, akabhatisa balimi unda uwe, akenda kuneimwe inyika kwonshaji undefu. 10Pawakaswika unshaji, wakatuma unshingi kubalimi kuti benonkobelabo unchelo wonzhambi, asi balimi bakondoba unshingi, bakombwiliza esina zwalosenga. 11Wakatuma umwe unshingi; noyu bo bakondoba, bakombhata nenzila isina chilemelela, bakombwiliza esina chinhu. 12Wakatuma unshingi watatu, yoyu bakondwajisa bakontatamila. 13Nokudalo mweni wominda wonzhambi wakati, ‘Ndotani biya? Ndobatumila mwananhulumyana wangu unodikana, ateni banonoundemekeja.’ 14Balimi yaba pabakombona, bakalangana bakati, ‘Yoyu ndiye undyi wefuma, atiumbulayeni kutila kuti ifuma ibe yedu!’ 15Nokudalo bakomposela kuzhe kwominda wonzhambi bakombulaya.
“Ani biya ini zwaachata kubalimi mweni wominda wonzhambi?” 16“Unoozha kwobabulaya balimi yaba, kova epa unda wonzhambi uwe kunabamwe balimi.”
Pabakazwiwha yezwi, bakati “Pe pe kusibe alo!”
17Koga wakabalinga akati, “Zwinolebani biya yezwi zwakakwalwa zwinoti:
‘Ibwe lyakalambwa nababaki,
ndilyo lyakooba ilyo linodikana kasa.’
18Wose unhu unowila panelyo ibwe unoovunauka ebe zwibabi asi kana yelo ibwe lingombwelela pezhulu ponhu linoompwachaula.”
Umbhuzo nokulipa mutelo
(Mateo 22:15-22; Mako 12:13-17)
19Bakwali bomulawo nabakulwana babatebuji bakakweja kuunsunga pakale yopo, asi bakatya banhu; nokuti bakaziba kuti unkwejaniso wakabeleba ibo, 20Bakondingilija kuti bompyangile undandu, bakatuma bachengeji kuti bezwite balolulama, kuti bombhate namawhi aachaleba, kutila kuti bompile kubatongi. 21Bakombhuza beti, “Ndayiji, tinoziba kuti munoleba nokulayija ichokomende, amuna ishalulo, asi molayija inzila yaMwali nechokomende. 22Tinovumilwa kulipa mutelo kunaKesali kana ne?”
23Koga iye abona buchengeji bwabo, wakati kwabali, 24“Nditondejeni ikobeli lina untojaniso wani nezina lyani?” Bakati, “WaKesali.”
25Wakati kwabali, “Nokudalo ipani kunaKesali zwinhu zwaKesali, kunaMwali zwinhu zwaMwali.”
26Nokudalo abajakongwanila undandu muna zwaakaleba pambeli pabanhu, bakachenamiswa nenshandulo yiye, bakawhilijila.
Umbhuzo nokumuka kubafi
(Mateo 22:23-33; Mako 12:18-27)
27Kwakezha kwaali bamwe babaSadusi, ibo banoti, akuna kumuka mukufa, 28bakombhuza beti, “Ndayiji, Mozesi wakatikwalila mulawo eti, ‘Kana unhulume afa kova esiya unkaji esina mwana, ununa unokwelela kulobola inchilikaji ezwalile unkulu bana.’ 29Feno kwakabeli banhulumyana bashanu banababili, wokutanga wakalobola akafa esanhu aba nabana, 30nowabili neebo, 31watatu neebo wakontola akata alo, bose beli bashanu bana babili bakafa besaba nabana. 32Kumapejelejo unhukaji yoyu wakafabo. 33Pakumuka kwabakafa unooba unkaji wani? Nokuti bose belibashanu banababili bakabako ndobola?”
34Jesu wakati kwabali, “Banhu bonshaji yono banolobolana, 35asi yabo balomilila unshaji ukumuzha akale banoomuka kubafi, abatoolobolana, 36nokuti abachinoofa, banokwelana nengilozi akale bana baMwali beli bana bokumuka kubafi. 37Asi nenyaya yokumuswa kwabakafa, naMozesi wakatondejela pachena pakututuma kwedenje, paakashobelela Tezi eti ‘ndiMwali waAbhulahamu, naMwali waIsaki naMwali waJakobe.’ 38Feno aatoba Mwali wabakafa koga wabapenyu, nokuti bose bapenyu nomunaiye.”
39Bamwe bakwali bomulawo bakashandula beti, “Ndayiji mwashandula zwibuyanana.” 40Bakava bakatya kuumbhuza mimwe mibhuzo.
Umbhuzo pezhulu paMesiya
(Mateo 22:41-46; Mako 12:35-37)
41Koga wakati kwabali, “Ini biya Kristo ewhi Mwananhulumyana waDavidi? 42Nokuti Davidi nokukwe unoti mulukwalo lweJimbo,
“Tezi wakati kuna Tezi wangu:
“Gala kululyi lwangu,
43kuswikila babengi babo baba chitobelelo chamakumbo awo.”
44Davidi unoonshoba eti “Tezi unoba mwananhulumyana uwe chini?”
Jesu unochenjeja pezhulu paBakwali bomulawo
(Mateo 23:1-36; Mako 12:38-40)
45Banhu bose bechinowhilila, wakati kubalayijwa babe, 46“Chenjelelani bakwali, banoda kumbala zwimbalo zwilefu, banoda kumuswa kana beli kumusika, banoda kugala pezwigalo zwabanolemekejwa muSinagogi nokumabhiko, 47banokwibila inchilikaji jingumba jabo akale banota minamato milefu kuti beyebwe. Banoolangwa pakulwana kasa!”
ទើបបានជ្រើសរើសហើយ៖
Luka 20: LTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for The World International
