Luke 6
6
Sabbath Rampaube
1Pecai Sabbath benai pa hereiluhdung ga kahgwang kezeu dau, pe caisuimedung herei buidung nrieplu eh cidung de penui ba gage neu ngkak lwe tyeila.#Hez. 23:25 2Dede Phariseemedung kangge rangdi, “Daitei eh nnui Sabbath benai hezai kemakpe tei lano?”#Hez. 23:25 3Nah penui sam keli eh, Jisu rangdi, “David pa mzeu dige, pa nah pecu ngngwa kelamedung daipai teibi nnui Kesanglaisiu gade pei meni? 4Pa Tinggwang ki ga lütlu, nah tangku kemcibe de keulwe tyeilu, nah pecu ngngwa kelame de de peu, cide tyei kera hezai ma, cingkumedung ziemne gwale.”#Lev. 24:5-9, 1 Sam. 21:6 5Cidau pa penui dage rangdi, “Mina Nabe au sabbath nai reu Rampaube.”
6Sabbath tingba kedabe naige pa synagogue ga lütlu eh mide ledeu bam ge, cika mipei pe ba zetle tsai kedi ge bam. 7Dede laisiukecime nah Phariseemedung pa sabbath nai mide teihemi ziemi lakbi pecu pie ling bam, iciu eh penui pecu mmau kera kie peilu kera ziemne. 8Dede pa penui dai cet bambi kecu cilu eh pe ba ketsaibe dage rangdi, “Cuhlu, delwe anui kakga saplu lo.” Cine minabe cuhlu delwe cika saplu. 9Pecai Jisu penui dage rangdi, “Ih nnui dade keteu la, sabbath benai keyi tei kera mi kesia tei kera hezai no, keringria kelilu kerabe mi ngkapdi kerabe no?” 10Ge pa penui peciakne de pie twagwa gai eh pe dage rangdi, “N ba nzang pet gailo.” Nah pa iciu gaige pe ba yi dailu. 11Dede penui au penui rata sütdi nah Jisu de daipai tei ziebi kecu penui hangge ge dage rang bamdi.
Langkegaime kereiekena
12Pecai cipau tingdau pa kekie tei kera lamlwatu ga hangdi, nah pa tingmui zie pelane Tinggwang dade kie bamdi. 13Cu tingbalu ge, pa pe caisuimedung de pe dage qu gailu, nah pa cidung kakde kereiekena de kedetlu, cidung de de pa langkegaimedung de qulu: 14Simon (Pa pecu Peter de de msiak kebeube) nah pe caihereibe Andrew; nah James penai John; nah Philip nah Bartholomew; 15nah Matthew, nah Thomas; nah Alphaeus napei James; nah Zealot lie qu kelabe Simon; 16nah James napei Judas; nah Judas Iscariot, mide tui kegaibe tei kedibe de.
Samlamdung nah kehereidung
17Pecai pa penuide ngngwalu delwe lamlwatu gade nghunglu, nah kideu langkie ga saplu, pe caisuime maadi ge, nah mina maadi Judea deuceu leune gade nah Jerusalem nah jaaidikung ga kebam Tyre nah Sidon namdi gade gwang kebamme kakga. 18Penui pe sam kingnei zielie nah penui mateei tei hemilu zielie gwanglu. Mcikemak rabedung ne keliang teu kelamedung de de tei hemilu. 19Cu hemaabe pelane pecu deugai kera tei ladi, kedanemene kengkieng pe dade mpet eh penui pelane de teingkeilu kebamne.
20Pecai pa ngangcuh pe caisuimedung de pie eh rangdi, “Kegahme au samlam pungtu lie, kedanemene Tinggwang hegwangram au nnui gulu. 21Cu mzeu kelame samlam pungtu, kedanemene nnui nggeilu zielu. Cu hap kelame samlam pungtu, kedanemene nnui nui zielu. 22Mina Nabe ziemne mina nnuide ngkau, nah nnuide keu ntsam nah rang msia, nah nnui zi de sialie mlai cai nnui samlam pungtu lie. 23Cipaube nai nnui suiyilu, nah nnui suiyi eh nsaulu, kedanemene pielo, tinggim ga nnui ziehi au disüt lu. Kedanemene penui paumedung de caihakecime de iciu eh gwang delu. 24Dede ainie, nnui keheime au, nnui nnui kerelui ngau luda. 25Ainie, nnui cu nggei kebamme, nnui mzeu dizie. Ainie, nnui cu nui kebamme, nnui suisia nah hap zie. 26Ainie nnui, mina pelane nnuide rang hemi kecu dau, kedanemene penui paumedung de kenret caihakecime de iciu gwang da.
Ngauraume de keku
27Dede Ih nnui kingnei kebamme dage rangzeu, nnui ngauraume de kulu nah nnuide ngkau kelame dage ma keyi teigai lu. 28Nnuide reset kelame de samlam beulu nah nnuide rangkemsiame ziemne kielu. 29N bia ket lam kepeu kecubede, pecu kedale de nreu beulo, nah mige n pai keu teu kedibe dade, ncwa de peulak lie helo. 30Mina keheibe de n dade kie kelame de peulo, nah mi n gudung keu teudi kelame dade, cide kie caili so. 31Nah nang peu mina de ndage tei gai keneube, penui dage cinzwa tei gailu. 32Kedanemene nang ncu kukelame de rünne kula cai, n keyi daipai no? Kedanemene kemaume de penuide kukelame de ku lalu. 33Kedanemene kesang magade nang n dage keyi teigai kelame dage rünne keyi tei gaila cai, n ziemne cide dai gie ge no? Kemaume de cinzwa tei lalu. 34Nah magade nang penui dade ngaudailu kera kenlumme de rangkang releubeu lacai, nziemne cide dai gie ge no? Kemaume ne kemaume de releu beula, cide nzwa ngaudailu kerane. 35Dede nnui ngauraume de kulu, nah ma keyi penui dage tei gailu, nah magede ngau dailu kera cet mene releu beulu, iciulu cai nnui ziehi disüt zie, nah nnuide Hutube name tei luzie, kedanemene pa au mide twa neula kemakme nah kesiame dade de pe zaiyi lalu. 36Nnui Pei Tinggwang mide ngaunggia kecu nzwa eh, nnuide mide ngaunggia lulo.
Mimau kepeei
37“Nah mimau peei so, iciude n mau de peeilak. Mide mmau so, iciude ncu de n mau lak. Mimau gibeu lu, iciude n mau de gibeu zie. 38Peulo, iciude ncu de peu zie: mdet kehemi, nimkemtip, hecung kehekwa, nah pui kenlim, cidung de n pi gage ruigai beu zie. Kedanemene nang mdet kebeu dene, ncu de mdet caili daibeu zielu.”
39Pecai pa samgwa ge de penui dage rang si. “Miakcitme ge ne miakcitme ge lampui saulu buini? Penai hangna na hekwaki ga cakmiedi lakni? 40Ledeukelume au pe keledeube swa dima, dede mileune de, pecu ledeu cangkebeu caine, pe keledeube nzwa dizie. 41Nah nang daitei n sinabe miak ga tsingtwak keceuna de piee lano, dede nkatei n miak ga tsinglwa kebam de ncetla meno? 42Nang dainzwa n sinabe dage, ‘Sinabo, n miak ga tsingtwak keceuna de peu acu keu mpet lo,’ de eh ranglu lai, nangbe nkatei n miak ga tsinglwa kebam de pie mene? Nang hezai teikelabo! N miak gade tsinglwa de keu mpet raidi lu, iciude nang n sinabe miak ga tsing twak keceuna de keu mpet kera ngau mcigi luzie.
Tsingbang ge nah pe tsi
43Kedanemene tsingbang keyibe petsi kesia buila ma, mede tsingbang kesiabe petsi keyi buila ma. 44Kedanemene tsingbang ge de au petsi gade cilula kelane. Kedanemene mina hetubang gade tangzüttsidung railu lama, mede müntiakbang gade kubetsidung railu lama. 45Mina keyime pelung mabam keyi gade dai yibi keu mpet la, nah mina kesiame de pe kesia gade dai siabi keu mpet la. Kedanemene pe lung ga kebam gade pe mui rangpet kelane.
Kiketei kemriak nah kemiebe
46Cu nnui daitei eh Ih rang kebeube tei mene acu, ‘Rampaubo, Rampaubo,’ de qula no?#Mal. 1:6 47Mina keheibe de ada gwang eh a samdung kingnei nah cidungde mzai kelabe, pa daipai nzwa bi Ih nnui dage keulia zie. 48Pa au mige kige tei kebam nzwa, pa su hung ncoklu delwe tsura reu gage pe bangdwa dwakelu nzwada. Pecai duinaai gwang nah dui dicuh eh lwamie ki de sam, dede cide teukelai gailak di, kedanemene cide tei ntipsüt kelune. 49Dede kingnei lude tei mzaila kemakbe au, mige pebang dwa mene kideu reu gage ki tei kelube nzwa delie, cide de duidi cuh eh dui lwamie sam ge zette cide kaudi, nah ki cide pekap au dizu lie.”
ទើបបានជ្រើសរើសហើយ៖
Luke 6: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
