Bata 7
7
Stephen sanhedrin dage makerang
1Cidau cingku kedibe keteudi, “Aidungde kesang deni?” 2Ge Stephen keligai,
“Mipeimedung, sinamedung, nah a peimedung, a sam kingneilo: Anui pei Abraham, Haran ga pa kelungh dwa, Mesopotamia ga kebamdau Tinggwang kendu pecu liagai; 3nah pa pe dage ranggai, ‘N kibaume nah n deu pütdi delwe Ih ncu keulia kera deu dega mie lulo.’#7:3 Ken. 12:1 4Cidau Abraham Chaldeanme deu gade mpetlu delwe Haran ga lunghdi; cikade, pe pei tsai dige, Tinggwang pecu ngngwa gwang cu nnui lungh kebam deude gage kaibeu.#7:4 Ken. 12:5 5Dede cika pa pecu mabam gede peuma, mi pideu tie nage de. Dede pa pe na gah liede, pecu nah pecai pe leuhme de hangdeu gum kera peu zielie sampet beu. 6Dede Tinggwang pe dage ainzwa ranggai, n leuhme au cikemakme deuga sangme ge zie, nah cika kebamme penuide peu hebaangme ge teizie nah penuide mmi hai mdai ge peu reisüt zie. 7Tinggwang rangdi, ‘Dede Ih penui kila teikela leuh de mmau zie, nah cipaucai n leuhme tetmpetlwe heni aide gade acu reca zie.’ 8Ge Tinggwang Abraham dage hegeukerum samkak#7:8 Samkak: Aide mi hangna mede ciswa kekiee kakga samting kelu de rangbam. zai de kaibeu, nah Abraham pe na Isaac lunghlu eh pecu lang hesetne benai pe geu rumlu; nah Isaac pe na Jacob lunghlu, nah Jacob dade anui paume kereiekena bau lunghlu. 9Jacob namedung penui sinabe Joseph de penui riak eh pecu Egypt gage zwa gaidi. Dede Tinggwang pecu ngngwa la 10nah pa keherei leune gade pecu kelibeu. Pa pecu Egypt gwangpei Pharaoh dwade maci peu nah peu pecu ngau pe suilu, nah peu pecu Egyptme reu nah pe kilungme pelane reu kedi teilu. 11Cu Egypt nah Canaan pelane ga herakum kum gwang, nah cide ne keherei sütdi, nah anui paume ketyeipok ngaugai lakdi. 12Dede Jacob Egypt ga taktyeipok bamlie kecu siu luge, pa anui paume de cika kemie raitube tei eh langgai. 13Nah pe kenabe kemie ga, Joseph pe sinamedung depeu pecu cigai, nah Joseph kilungme de Pharaoh cilu. 14Pecai pe sinamedung de langcaili gai eh Joseph pe pei Jacob de nah pe kibaume pelane de qugai, pelane ge riakhena-mengei. 15Cine Jacob Egypt ga miedi, nah cikade pa nah anui paumedung tsaidi. 16Penuide Shechem gage punggwanglu delwe Abraham ne Shechem ga Hamor name dade rangkang le luikelu herau gage kaizeu dida. 17Tinggwang Abraham dage sampet kebeude tei kera ting nna gwang ge, minadung Egypt ga lungh kiee süt petlu, 18Egypt deu reuga hegwang kedage Joseph de ci kemak ge cuh kemaktane.#Tet. 1:7,8 19Hegwang aide anui leuhme de cwa nah anui paumedung dade pe zaisia, penui kemei tei eh penui na ngienadung depeu lungmpet gai, iciu eh peu penuide tsaidi kerane. 20Cipau tingdau Moses de mnalu; nah pa Tinggwang dwade hezu yisüt. Nah pecu pe pei ki gade keicum ge ngkwet cuhlu.#Tet. 2:2 21Nah pecu hegwale ge lungmpet kegaidau, Pharaoh napui pecu pe na teilu eh pekatei pe na nzwa pecu ngkwet cuhlu. 22Moses de Egyptme maci pelane pwa ledeu beu, nah pa pe samrang nah pe bata ga ngkiengsüt. 23Dede pa mmi riakdai kedidau, pa pe sinamedung, Israelmedung de redau kera pe lungningdi.#Tet. 2:11 24Nah Israelme gede teukehei teikebam ngau luge, Moses pe lam sap nah pe kum pei eh Egyptme peide teitsetdi. 25Kedanemene pa pe sinamedung Tinggwang pecu teu penuide teumpet beu zielie kecu cilu zieha de cet, dede penui aide ci luma. 26Pecai benai pa Israelme kangge nggi kebam ga gwang, nah pa penaide nggnwa kezuyi lulo eh ranggai, ‘Nnui au caihereiswacing, daitei eh nnui hangge ge de tei rejam bamno?’ 27Dede pe kidabe dage kemau tei kegaibe Moses de cwakgidi eh rangdi, ‘Caune ncu nai reu kedibe nah tutiakbe tei beuno? 28Nang nziene Egyptme peide teitset kedinzwa, nang acu de teitsetdi neu lani?’#Tet. 2:13,14 29Sam aide rang kegaidau Moses pakdi, nah pa Midianme deuga sangme ge teila di, nah cikade pa pe na hangna lunghlu. 30Mmi riakdai ge gwang kedicai, tinggimgwame ge hetaideu ga Sinai Deutu tsinghum gega miheu gade peu pecu ngaugai.#Tet. 3:1 31Moses mi cide ngau luge, pe swagahdi; nah pa cide pie zielie petge, pa Rampaube kwa siu:#Tet. 3:2,3 32‘Ih n paume Tinggwang, Abraham, Isaac, nah Jacob Tinggwang.’ Cidau Moses mbeudi nah piegai kera ngngidi. 33Ge Rampaube pe dage rangdi, ‘N pi gade n picum lwakdi, kedanemene nang sap kebam nide au kemci nilu.#Tet. 3:5 34Ih Egypt ga kebam a minadung keherei kebam ngau kesangda, nah Ih penui mra kegai kwade siu eh Ih penuide kelilu kerane hung bam; cine gwanglu, Ih ncu Egypt gage langgai zie.’ 35Moses aide de nda penui mlai kedibe da, ‘Caune ncu anai reu kedibe nah tutiakbe tei beuno?’ de rang eh. Pa au Tinggwang ne tinggimgwabe tsinghum gade Moses de peu ngau kegaibe de ngha teu mina reu kedibe nah kelikelube tei zielie langkegaibe da. 36Moses aide Egypt gade nah jaaidi kegie gade nah mmi riakdai ge hetaideu gade miswakegah nah mimakecang batadung tei eh penuide Egypt gade ngngwa mpetbeu. 37Moses aipaude Israelme dage ranggai, ‘Tinggwang acu teucuh kebeu kenzwa nnui sinamedung kakgade caihakecibe gede teucuh beuzie.’#Hez. 18:15-18 38Pa au hetaideu ga hemaabe de ngngwa kelabe deda, nah Sinai Deutu gade tinggimgwabe pecu mpau kecube deda nah anui paume de ngngwa kelabe deda; pa kering sam anuide pwapeu kera ngau kelube deda. 39Dede pa au anui paumedung pe sam pungrau kedibe deda, penui pecu mlaidi eh penui lung Egypt le ge nreucaili gaidai di. 40Penui Aaron dage ranggai, ‘Anui lampui sauliabeu kera rabedung tei beulo. Kedanemene Moses, anuide Egypt gade ngngwa kempetbe de au daitei dibi anui ci meda.’ 41Cine penui cidau ketumna ge teilu delwe mamie cide de ratak tei pwapeu, nah penui bata de ziemne penui suiyilu.#Tet. 32:4,6 42Dede Tinggwang penui dade nreu delwe penuide pütdi, caihakecime laisiukwak gage rauteu kelanzwa, penuide peu tinggim ga hegidung de reca ladi kerane.
‘Israelmedung, nnui mmi riakdai ge hetaideu ga keladau,
makaunedung daptsetlwe acu reca nah ratak teibeu ni?
43Nnui rabe Molech#7:43 Molech: Aide Hebrewme let gade, pekie cai “Hegwang.” Molech au Ammonme reca kela rabe. reca paiki de pwa luda,
nah nnui rabe Rephan hegi de,
nah nnui reca kera tei kelu miedung de;
cine Ih nnuide Babylon gwale ge langgi dizie.’#Amo. 5:25,26
44“Anui paumedung hetaideu ga keladau zierang paiki de penui dala. Cide Tinggwang Moses de rang kebeu nzwa, pa kengau rehi de nzwa teilu. 45Reca paiki de ngau keludau, anui paume Joshua kangga de, Tinggwang ne gwa mpetkedi heleuhdung deu penui gumkelu ga cide punggwanglu. Cide David tingdau kecang cika bamdi. 46Pa Tinggwang miakngau gade petaube teilu, nah pa Jacob Tinggwang ziemne bam kera heni ge tei kera kie. 47Dede Solomon ne Tinggwang ziemne ki de teilu. 48Dede Hutube heba le ketei ki ga lungh lama, caihakecibe kerang nzwa,
49‘Tinggim au a hegwangbam, nah kideu au a pidau.
Nang a ziemne ki daikenzwa ge teilu buino? de eh Rampaube rangla,
mede Ih mtak kera ni daipai no?#7:49 Isa. 66:1-2
50Aidungde pelane a ba ne teigai de meni?’#Isa. 66:1,2
51Nnui lung ketakmedung, nah nnui lung nah nnui kwen hegeurum kemakmedung, nnui Kemci Rabe de renia mui lala. Nnui paume reniakela nzwa nnuide reniala. 52Nnui paumedung caihakecime caube de tei keherei meno? Penui Kesamsangbe gwangkera mrairang kegaimedung de teitset dida, cu nnui au cipaude de kecwabe nah teitset kedimedung dida,#2 Hel. 36:16 53nnui Moses zaidung tinggimgwame dade ngaulu dede cide mzai kemakmedung.”
Stephen de tangtsu kesam
54Ma aidungde siu keludau, baudi peupeime penui rata sütdi, nah penui Stephen de penui rata eh geigimdi. 55Dede pa, Kemci Rabe puipung eh tinggim ngangcu piegai nah Tinggwang kendu de ngau; nah pa Jisu Tinggwang ba zetle sapbam eh ngau. 56Stephen rangdi, “Ainie, Ih tinggimdung ngkei kegai, nah Mina Nabe Tinggwang ba zetle sap kebam ngau.” 57Cidau baudi peupeime penui kwen ngketlwe sahbak eh mrung eh pelane de peda pak gwang. 58Pecai pecu namdi gwale teukerei mpetlwe penui pecu tangtsu le sam. Zierangmedung penui pai gaulwe rehangme ge Saul lie kecu pi gage kaidi. 59Penui Stephen de tangtsu le sam kebamdau, pa kiegai, “Rampaube Jisu, a rabe de ngngwa lulo.”#Lei. 31:5 60Nah pa kwaktung mie sahbak gai, “Rampaubo, aipau maude peu penui reuga gwangdi helo.” Pa aide ranggai eh tsaidi.
ទើបបានជ្រើសរើសហើយ៖
Bata 7: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
