Lukasa 3
3
Euvifo LyaYohanesa Omushashi
(Mateusa3:1-12; Malukusa1:1-8; Yohanesa1:19-28)
1Movula onhimulongo nanhano yepangelo lyohamba Tibelius. Pontius Pilatus okwa li ohamba yaYudea, Helodesa okwa li ohamba yaGalilea, namumwaina Filipus okwa li ohamba yaItulea naTrakonitis, Lisanias okwa li ohamba yaAbilene, 2Annas naKajafas oyali aayambi aakulunhu yayakwawo. Pefimbo opo tuu mho eehapu vaKalunga ova hanga Yohanesa, omona waSakalia mombuwa. 3Yohanesa Omushashi okwa ya komikunda avihe vopopepi nomulonga waYordan, ndee ta uvifa kutya, aanhu ayehe naye itevulule ndee taa shashwa, opo Kalunga a vimepo eendjo vao.
4Nganhyi sha shangwa membo lyomuhunganeki Jesaya,
“Ewi lyomwiingivi mombuwa ali ti;
‘Longekivileni Mwene ondjila,
ukililifeni omalila yaye!
5Oitunu ayihe neendudu navi yelekanifwe,
oikulundudu neendudu navi halakanifwe po,
eendjila va ngonyoka navi ukililifwe,
noinghulundudu nayi yelekanifwe.
6Naanhu ayehe otaa ka mona ehupifo lyaKalunga.’”
7Eengudu vaanhu ove ya kuYohanesa evi shashe, ndee Yohanesa okwa ti kuyo, “Luvalo nye lwomayoka! Olye e mu lombwela kutya, amu vulu okuhanikapo ehandu lyaKalunga ndi ali uya? 8Ningeni oinima mbi tai holola kutya omweitevulula. Nye inamu tameka okwiilombwela kutya omu ho Abeleham. Oshonhyi andi mu lombwele, Kalunga ota vulu okuningila Abeleham oyana momamanya nga. 9Ekuwa olya tulwa pefina lyomuti, ndee kehe omuti ihau imi oiyimati oiwa otau kewapo, ndele tau ekelwa momundilo.”
10Aanhu oye mu pula ya ti, “Otu na okuninga ngeepi hano?”
11Okwa yamukula ta ti, “Kehe ngu ena oikutu iyali na pe mukwawo ngu ke na sha, nangu ena oilya na pe mukwao ngu keyi na.”
12Aafendelifi nayo oye ya ya shashwe, ndee oya pula Yohanesa ya ti, “Omulongi, otu na oku ninga ngeepi hano?”
13Okwe ya lombwela, “Inamu fendelifa aanhu shivulife nhyi sha tulwa po.”
14Aakwaita nayo oyemu pula ya ti, “Se otu na oku ninga ngeepi?”
Okwa tya kuyo, “Inamu nyeka omunhu oimaliwa nye inamu lundila. Kaleni mwa wanenwa kondjabi yeni.”
15Eteyameno maanhu olya enda ali indjipala, noya kala nomalimbililo momitima vao kutya ngiika Yohanesa oye Kilistus. 16Yohanesa okwe ya lombwela ayehe a ti, “Andi mu shasha nomeya, ndele aku zi ngu evule nge meenghono. Inandi wana nande okuvitula eemwiya veenghaku vaye. Ye ote ke mu shasha nOmhepo Ondjapuki nomundilo. 17Oku na oshiyelifo momake yaye, ta kombo oshipale shaye ndee ta yele, ndee oilya teyi siikilile momaanda yaye nolungu telu fike po nomundilo ihau vimi.”
18Nomakumaivo omendji ya yooloka, Yohanesa okwa uvifila aanhu Onghundana Oiwa, ndee teya kunghulile ya aluke ko keendjila vawo ovii. 19Ndele Yohanesa okwa nyenyetela Helodesa omupangeli, molwanyi a hombola po Herodias omukiinhu wondege yaye nomolwouyi auhe Helodesa e wu ninga. 20Opo nee Helodesa okwa weva ko ali ouyi nhyi a tula Yohanesa movologo.
Yesus ta shashwa
(Mateusa3:13-17; Malukusa1:9-11)
21Konima nhyi aanhu ayehe ya shashwa, naYesus okwa shashwa. Mhanga Yesus ali taa yalikana, eulu olya yeuluka, 22nOmhepo Ondjapuki oya kuluka, ndee tayi mu nambele ngonghuti. Ewi olya za meulu ali ti, “Oye Omumwange omuholike, onde ku panda.”
Ezimo lyaYesus
(Mateusa1:1-17)
23Pefimbo Yesus a tameka oshilongatumo shae, okwa li ena eevula vili lwopomilongo nhatu. Okwa kala nganhyi aanhu yemu vilaavilila kutya, ye omonamati waYosef yaEli, 24E li yaMatati, Matati yaLevi, Levi yaMelki, Melki yaYannai, Yannai yaYosef, 25Yosef yaMatatia, Matatia yaAmos, Amos yaNahum, Nahum yaEsli, Elsi yaNagai, 26Nagai yaMaat, Maat ya Matatia, Matatia yaSemei, Semei yaYosek, Yosek yaYooda, 27Yooda yaYohanan, Yohanan yaLesa, Lesa yaSelubbabel, Selubabel yaSalatiel, Salatiel yaNeri, 28Neri yaMelki, Melki yaAddi, Addi yaKoosam, Koosam yaElmadam yaEr, 29Er yaYosua, Yosua yaElieser, Elieser yaYorim, Yorim yaMatat, Matat yaLevi, 30Levi yaSimeon, Simeon yaYuda, Yuda yaYosef, Yosef yaYonam, Yonam yaEliakim, 31Eliakim yaMelea, Melea yaMenna, Menna yaMatat, Matat yaNatan, Natan yaDavid, 32David yaIsai, Isai yaObed, Obed yaBoas, Boas yaSalmon, Salmon yaNashon, 33Nashon yaAminadab, Aminadab yaAdmin, Admin yaArni, Arni yaHezron, Hezron yaPeres, Peres yaYuda, 34Yuda yaYakop, Yakop yaIsak, Isak yaAbeleham, Abeleham yaTela, Tela yaNahol, 35Nahol yaSeluh, Seluh yaLehu, Lehu yaPeleg, Peleg yaEbel, Ebel yaShela, 36Shela yaKainan, Kainan yaAlfasad, Alfasad yaSem, Sem yaNoa, Noa yaLamek, 37Lamek yaMetusala, Metusala yaEnok, Enok yaYared, Yared yaMahalalel, Mahalalel yaKainan, 38Kainan yaEnos, Enos yaSet, Set yaAdam, Adam yaKalunga.
ទើបបានជ្រើសរើសហើយ៖
Lukasa 3: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
