प्रेरित 7
7
स्तिफनसये भासन ओडोव
1होकाम मुख्या सेवा डोने मीये ओपजोयो, “आव रो: डस्साज़ रो?”
2नोये हैओवारो, “डाज्यु भाइरं, नाना बैनिरं सोनो बाबुरं, ठैच्यो। महिमालो परमेस्वरये गेबाबु अब्राहामलाई हारानलं उलिज़्याव नकाम पनि ओङा:डे मेसोपोटामियालं उलिज़्याकं डर्सन ओयोव, 3होकाम होलाई हैओडोव, ‘नङ नडेस सोनो ननाल नाता रा:डे राङन, होकाम ङा नङलाई सटन्डे ङायानो डेसल नान’।”
4“होकाम कल्डीराई याडेसलाम राडे हारानलं ओलेव, होकाम ओबाबु उसिव झिन्डे परमेस्वरये नोलाई होलाम आव डेसल ओरोयो, जोलं आर्क जे जिलिज़्या। 5नोलाई परमेस्वरये आव पोलं सम्पति के होडेज़ गनाज़्याकं, ओखङ नैने पो पनि मायोवये। नो बेलाकं नोलो ओसन्तानरंज़ मालेवरं हैनि पनि नो डेस नङ सोनो नसन्तानराई याकुइटं ङायोरं वार्डे परमेस्वरये नोसं बाचा ओडोव। 6परमेस्वरये ऐ वार्डे हैओडोव, ‘नसन्तानरं अर्कालो ओडेसलं नाडे लेनेलेरं, होकाम होराई नोरंलाई चार सय बर्स समं कमारा झैडे बनै डुखं यानेलेरं’।” 7परमेस्वरये हैओडोव होकाम जो मीराई इस्राएलीरंलाई कमारा झैडे नैरं होराई यानिया ङा डानेङाले। होकाम नो इस्राएलीरं होलाम राडे आव पोकं ङासेवा डोनेलेरं। 8परमेस्वरये नोसं खतना झैने बाचा ओडोव, होकाम अब्राहामलो ओज़ा इसहाक उजरमिव आठ डिनका खतना#7:8 यहुडीराई याखार्ल टोबो ढर्मला चलन लेव जो परमेस्वरसं यहुडीराई बाचा डोसिव लेव ओझोयो। इसहाक याकुबलो ओबाबु ओटाव, होकाम याकुब बारं कुलराई याबाबु ओटाव।
9“योसेफसं खिस रिस डोडे याकुबलो ओज़ाराई याभाइ योसेफलाई मिस्र डेसल यायोव। हैनि पनि परमेस्वर नोसं लेव। 10परमेस्वरये नोलाई स्यान्टै डुखंलाम छुटैडे नोलाई मिस्र डेसला राजा फारोलो ओङाक डया डाडे बुड्डी ओयोव, होकाम फारोये नोलाई मिस्र डेस सोनो उज़ी:मला स्यान्टैटं रो:टं हाकिम ओझोयो।”
11“हो छिन्डे मिस्र डेस सोनो कनानलं अनिकाल टाडे बनै घ्योव डुखं ओटाव, होकाम गेपुर्खाराई ज़्यावज़ यामडैज़्याव। 12हैनि पनि याकुबये मिस्र डेसलं अन्न लिज़्या वार्ने रो: ठैडे ओङा:डेङा पालालं ओज़ारं, नो गेपुर्खारंलाई होलं उपरि:ङोरं। 13नेखेपका यानाकं योसेफये ओडाज्यु भाइराई याङा:कं ओबारेलं स्यान्टै पान्डे ओयोवरं होकाम योसेफलो ओझानरं वार्ने फारोलाई पनि ठा ओटाव। 14योसेफये ओबाबु याकुबलाई सोनो होस लेव स्यान्टै पचहतर जना ओझानरंलाई, ओल लेवङ उखुलोर। 15होकाम याकुब मिस्र डेसल नाडे, होलज़ उसिव, होकाम गेपुर्खारं पनि होलज़ यासिव। 16होकामटानि यामोरो सेकेमलं यालाङो, होकाम अब्राहामये सेकेमलं हमोरलो ओज़ारं लेवङाम ओये: झाडे ओलो:ङो खाडरलं यानोयोरं।” 17“हैनि पनि परमेस्वरये अब्राहामसं ओडोव बाचा पुरा ओटाने बेलाकं इस्राएली मीरं मिस्र डेसलं बनै याबंडिव, होकाम नोरं बनै भ्या याटाव। 18होकाम मिस्र डेसलं योसेफलाई मास:रेने छुटं राजाये राज्य ओडोव। 19होये गेपुर्खारासं बैमान ओडोव, होकाम गेपुर्खारंलाई कर डाडे याबाल्खरंलाई पाखाडे ख्याव उपरि:ङोरं होकाम ऐ जैडे बाभाका जर्मिव बाल्खरं सिरंये।”
20“आव बेलाकंज़ मोसा ओजर्मिव। नो परमेस्वरलो ओङा:कं बनै चाव लेव। नोलाई सोङमैना समं वामारं ओबाबुराई याज़ी:मलं मो:डे याङाव। 21नोलाई मामो:डुडे पाखाङ याख्याकं फारोलो मेमा ओज़ाये छेन्डे ओलाङो, होकाम ओल ओज़ा झैडे ओङाव। 22मोसाये परि:डे मिस्रीराई स्यान्टै ग्यान ओडोयो, होकाम मोसा पाङनेटं सोनो ये:न्ट बनै सिफालु ओटाव।”
23“होकाम मोसा चालिस बर्सका ओटाकं इस्राएली ओडाज्युभाइरासं डैसिने उयुङ ओडोव 24होकाम टछा टोबो मिस्रीये टोबो इस्राएलीलाई ओपो:ज़्याव र:ङडे मोसाये होलाई ओजोगोयो, होकाम हो बडलालं नो मिस्रीलाई पनि ओसो:यो। 25परमेस्वरये गेलाई आवलो उकुइटाम छुटैने ले वार्डे होराई बुझिरंके वार्डे मोसाये उयुङलं सुन्चिडे ओनैज़्याव। हैनि पनि नोराई आव माबुझिरंये।” 26ओपराटि नोरं या-याज़ याखप्सिज़्याव बेलाकं मोसा ओराव, होकाम नोरंलाई मिलैनेरं वार्डे ऐ ओडोवरं “ए भाइरं,जे के डाज्यु भाइरं ची कडा जे-जेज़ माचाव जेझैसिज़्याव?”
27“होकाम ओल उमीलाई पो:ने मीये मोसालाई हुट्टैडे हैओडोव, ‘गेखार्ल से:र झैसिडे निया डोने नङलाई काङ्काये उखुल्सोनो? 28नो आझ्योका मिस्रीलाई नोसो:यो मान्टी नङ ङालाई पनि सै:ने नपान्सङज़्याव रो?’ 29ऐटाव जबाफ ठैडे मोसा ढोङ्डे मिड्यान डेसल नाडे ओलेव। होल ओलेकं नेबऱ्याङ खेपा ओज़ानि नेजर्मिव।”
30“चालीस बर्स छिन्डे सीनै डान्डाटं कडिज़ मालेव पोलं पठरक्याटं चाङज़्याव मे:लो ओलप्कालं टोबो स्वर्गटा कटंवाललाई ओरो:ङो। 31मोसाये ऐटाव डर्सन र:ङ्डे अचम्ब ओटाव, होकाम नोलाई नजिकं नाडे ओर:ङनाकं घ्योव प्रभुलो ऐटाव ओगा ओठोयो, 32‘ङा नपुर्खा अब्राहाम, इसहाक सोनो याकुबलो ओपरमेस्वर ची।’ आव ठैडे मोसा ओछ्यासैये ज़्योङ-ज़्योङ उगुव, होकाम नोये हो लेवडे पनि मार:ङडुवये।”
33“होकाम घ्योव प्रभुये नोलाई हैओडोव, ‘नखङटा पनै हाइ कडालेकं नङ च्याङसिडे नलिज़्याव, के चोखो पो ची। 34मिस्रला लिज़्याव ङामीराई बनै डुखं याडैज़्याव ङा र:ङडेङानै, होकाम याघर्ज़्याव पनि ङाठोयोले। ङा नोरंलाई छुटैने राडेङाले। गराङन्के, ङा नङलाई मिस्र डेसलं परिङने ङाले’।”
35“आव हो मोसाज़, जोलाई उमीराईज़ ‘नङलाई काङ्काये से:र सोनो निया डोने ओझैसोनो’ वार्डे याम्सहिव, हो मोसालाईज़ परमेस्वरये पठरक्याटा र:नज़्याव स्वर्गटा कटंवालङाम आग्या याडे हाकिम सोनो छुट्कारा याने झैडे उपरि:ङो। 36आव मीयेज़ मिस्र डेसलं, घ्यामो समन्डर सोनो चालिस बर्स समं कडिज़ मालेव पोलं अचम्बला ये:न सोनो चिन्नरं सटन्डे नोरंलाई होलाम हाइडे ओरोयोरं।”
37“नो हो मोसाज़, जोय इस्राएलीरंलाई हैडाडे ओनैज़्यावर, ‘परमेस्वरये ङालाई उरुजिसोङो मान्टि जेडाज्यु भाइरंलामज़ टोबोलाई जेलागिटं अगमबक्ता झैनेले।’ 38आव हो मोसाज़, जो कडिज़ मालेव बनल लिज़्याव भ्या मीराई याखार्ल गेपुर्खारासं पाङने स्वर्गटा कटंवालसं लेव, होकाम आवयेज़ सीनै ढुरिटं गेलाई याने वार्डे परमेस्वरङाम ज्युङडा बचन ओडोयो।”
39“गेपुर्खाराई होये ओयोव आग्या मामानिरंये। नोराई होलाई रा:डे मिस्र डेसलंज़ वोल्डे नाने युङ याडोव। 40नोराई हारुनलाई ऐ याडोव, ‘गे गेङा:-गेङा: नाने डेवतारं झैड्यासि, कडालेकं गेलाई मिस्र डेसलाम हाइडे रैने मोसालाई कान्डे कै ओटाव गे गेम्सनये’।”#बाने ३२:१ 41होबेलाकं नोराई टोबो बाछालो ओअङ्ग्या याझोयो, होकाम होलो ओङा:कं मार पल्डे भोक याचरोयो, होकाम याकुइये याडोव ये:न र:ङडे भोज ज़्याडे बनै यारेङो। 42हैजैडे परमेस्वरये नोरंलाई ओरा:वरं, होकाम नोरंलाई नमटा लिज़्याव निमी, स्यावै सोनो सोरोराई यापुजा गोडोज़्यारंकं वार्डे ओरा:वरं, अगमबक्ताराई यापोस्टोकोटं एटाव सर्सिवले,
इस्राएलला मीरं, जे ङालाई चालिस बर्स समं
कडिज़ मालेव बनलं मार भोक, अन्न भोक सोनो भेटीरं जेचरैड्याङोरो?#यर्मिया १९:१३; आमोस ५:२५-२७
43जे मोलोखलो ओतिर्पाल
सोनो रेफन डेवतालो ओसोरो,
होसोनो पुजाडोने जेझोयो अङ्ग्यारं घुर्डे जेबाव।
आबो ङा जेलाई बेबिलोनलाम हाइडे टाडा ङाखेपैच्यो।
44 #
बाने २५:९; ४० “कडिज़ मालेव बनलं गेपुर्खाराई गोहाई याने चोखो पाल लेव। मोसाये नो चोखो पाल परमेस्वरये आग्या ओयोव अनंसार झैसिव लेव। 45#यहोसु ३:१४-१७गेपुर्खाराई पनि यापालालं यहुडीरंकाम उरुका मीराई याडेस याकुइटं यारैकं यहुडीरंकाम उरुका मीरंलाई परमेस्वरये नलाम ओखेपोयोरं होकाम यहोसुराई हो तिरपाल यारोयो। होकाम डाउडये राज्या ओडोव बेला समं यासज़ लेव। 46#२समुएल ७:१-१६; १ङाडेङा रो:रं १७:१-१४ राजा डाउडये परमेस्वरलो ओडया ओडोयो, होकाम याकुबलो ओपरमेस्वलो ओलागिटं टोबो ज़ी:म झैने आग्या उनी:व। 47#१राजा ६:१-३८; २ङाडेङा रो:रं ३:१-१७हैनि पनि परमेस्वरलो उज़ी:म डाउडलो ओज़ा सोलोमनये ओझोयो।”
48“हैनि पनि अगमबक्ताराई हैयावारो ले, स्यान्टैराई भन्डा घ्योव परमेस्वर कुइये झैसिव ज़ी:मलं मालेये,
49‘स्वर्ग ङाचुङने पो ची,
होसोनो प्रिठीबी ङाखङ नैने पो,
जे ङालाई खेटाव ज़ी:म झैडे जेयाङ! ङाना:सिने पो काङ उलिज़्याव? वार्डे घ्योव प्रभुये हैवार्ये,#यसैया ६६:१-२
50आव स्यान्टै बस्त ङा ङाकुइये ङाझोयो मा:ङकरो’?”#यसैया ६६:१-२
51“ए झ्याङस्या मीरं, जेयुङ लुङ स्यानाव सोनो जेना माठोयो भैरारं, जे एक्सप्ड्याज़ चोखो आत्मालो उबिरोड जेडोय। जेपुर्खाराई कै यालेरं जेपनि हैज़ जिलिज़्या। 52जेपुर्खाराई याम्सहटोयो काङका अगमबक्ताची ले के ड? होराई सहि मी रानेले वार्डे पाङने अगमबक्तारंलाई स्यान्टैलाई यासो:योरं। होकाम जे हो राव सहि सेवकलाईज़ ढोका याडे, जेसो:यो, 53परमेस्वरये स्वर्गटा कटंवालरंङाम ओयाच्योव ओन्याम डैडे जेनै, हैनि पनि नो जे जेममानिये।”
स्तिफनसलाई जुरये याझोमो
54होकाम नोरं आव रो: ठैडे यारिसैये याहा ङरि: ङरि: याकोयो। 55होकाम स्तिफनसये चोखो आत्माये ब्याल्डे स्वर्गडे र:ङडेज़ ओलेव, होकाम परमेस्वरलो ओमहिमा सोनो येसुलाई परमेस्वरलो ओछ्योकं वो:र्डे च्याङसिडे उलिज़्याव ओरो:ङो। 56होये ऐ ओवारो, “र:ङच्यो, ङा स्वर्ग ओफैसिव ङार:ङज़्या, होकाम मानवालो ओज़ालाई परमेस्वरलो ओछ्योकं वो:रडे च्याङसिडे उलिज़्याव ङार:ङज़्या।”
57होकाम नोरं ओ: ओ: कि:डे याच्याङसिव, होकाम याना सुइडे स्यान्टैये टखेपटंज़ ठर च्याङसिडे लो:प याछुपिव। 58होकाम नोराई होलाई सहरलाम टाडाङ लाङडे, जुरये याझोमो। होकाम ङाडेङा झुठा गोहाई याने साचीराई याक्वा हाइडे टोबो साउल उमिन लेव मीलो ओखङक यानोयो।
59नोराई स्तिफनसलाई जुरये याझोमज़्याकं, नोये प्रार्ठना ओडोव, “ए प्रभु, येसु, ङाआत्मा गलाङके।” 60होये उघुन्डा टिकिसिडे बनै घ्योव ओगा डाडे कि:डे हैओवारो, “ए प्रभु, आव पापलो ओडोस आवरंलाई टाराकं।” आढङ हैवार्डे ओसं ओफ्याव।
ទើបបានជ្រើសរើសហើយ៖
प्रेरित 7: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
