Luka 23
23
Yesu Alimbeli kwaPilatu
(Matewu 27.1,2,11-14; Mako 15.1-5; Johane 18.28-38)
1Mbunga wose wakamilika uyenda naye kuna Pilatu. 2Bakatangisa wuntilika milandu beti, “Tawuwana ebudzila tjaba tjedu ntome, eti tisilipe luketo kuna Khesari, kakale ezwiti ndiye Khirisitu, mambo.”
3Pilatu wakawumbhuzwa eti, “Ndiwe Mambo wemaJuta?”
Iye wakawun'handula eti, “Wajalo.”
4Pilatu eba eti kubaphirisiti bakulu nekumbunga, “Nlume iwhoyu anditowuwana ananlandu.”
5Koga banhu bakayendila mbeli, beti, “Unodzonga banhu, ediya muJudiya yose, ebvila kuGalile edza ewhoti muno.”
Yesu Alimbeli KwaHherodi
6Pilatu paakawha ikoku, wakabhuzwa kuti nlume iwhoyo uNghalile. 7Paakaziba kuti ndewebugalo gunotongwa naHherodi, wakawumpindisila kuna Hherodi, muna igogo lubaka Hherodi waka ali muJerusalema. 8Hherodi wakahanha kwazo ebona Yesu, ngobe gwaka gwaba lubaka gulefulefu eyemula wumbona, ngentha yekuti waka ewha nekukwe, waka egalabgwe kuti unowhobona jenamiso linoyetiwa nayiye. 9Ndizo wakawumbhuzwa mibhuzo minjinji; koga Yesu akuna tjaakahandula. 10Baphirisiti bakulu nebakwali bakabalimile ipapo, bewuntilika milandu yakasima. 11Hherodi nebagwi bengwa babe bakawunseka bekawundhadila; bakawumbadza tjiyambalo tjakanaka, bekawumbgwiliza kuna Pilatu. 12Muhhuba ilelo Pilatu naHherodi bakaba bakwinya, kuhule baka bebengana.
Yesu Unotongegwa Bulawa
(Matewu 27.15-26; Mako 15.6-15; Johane 18.39-19.16)
13Pilatu wakadana baphirisiti bakulu, nebatungamili, nebanhu, 14akati kubali, “Mahhisa nhu iwhoyu kundili muti unhu unodiyila banhu ntome; koga imi hule kweholesesa andizowana iwhoyu nhu ananlandu muzwinhu zose zwamunoleba; 15kene naHherodi bo, wawumbgwiliza kutili. Akuna tjaathama tjingata kuti abulawe. 16Ndizo, ndowhowunloba, awunsunungula.” 17(Wakajalo ngobe panzano wephasika waka akafanila kuti abasunungulile nsungwa un'ompela.)#23.17 vesi 17 ayipo mudzimwe whalo whulukugwi dzetjiGiriki
18Banhu bose bakamimila panhu pan'ompela beti, “Ngaabulawe, mutisunungulile Bharabhasi.” 19Bharabhasi unlume waka akasungwa elimujele, nentha yepanduka kwaka kwayetika munzi-nkulu, kose nebulaya.
20Pilatu wakapamha akalebeleka nabo ngobe waka ehaka sunungula Yesu; 21koga bakamimila beti, “Muwunkowhomele, muwunkowhomele!”
22Wakati kubali, kwebutatu, “Nentha yeni, wathamani tjakayipa? Akuna nlandu wandawana muwunli waangabulayigwa; ndowhowunloba akowunsunungula.”
23Koga bakayendilambeli bemimila nemawhi apehhugwi kuti akowhomegwe. Mimila kwabo kwakakunda. 24Ndizo Pilatu wakati ngakuyetiwe sehaka kwabo. 25Wakabasunungulila iye waka akasungwa alimujele ngentha yepanduka nebulaya, wabaka bakumbila; akabapa Yesu kudze bate ludo gwabo.
Kowhomegwa kwaYesu paTjileyanyo
(Matewu 27.32-44; Mako 15.21-32; Johane 19.17-27)
26Bakati beyenda naye, bakahangana naSimoni wehango yekuKhureni, waka atjamboswika ebvazwe kuminda, bakawumbhata bakawumpikisa tjileyanyo, akayenda akatjisenga alihule kwaYesu.
27Wakatobegwa nebanhu banjinji, kose nebafumakadzi baka bekuwa bewunlilila. 28Yesu ebatjebuka wakati, “Bakololokadzi beJerusalema musindililile, muzwililile imwi nebana benyu. 29Lingani, anohha mahhuba pabanowholeba beti, ‘Bakakombolegwa bakahaya mbeleko, nezwizwalo zwisakazwala, nemahhamu asakatongomwisa!’ 30Ipapo banowhoti kumatombo, ‘Mutiwile’; nekuzwitombwana, ‘Mutivukidzile.’ 31Ngobe hapa bethama bejali kulukuni gunyolo kowhobatjini kulukuni gwakawoma?”
32Kuna bamwe batjinyi babili bakayendiwa nabo bo kuti banobulawa. 33Bakati baswika kubugalo gunoyi Pepe tjeN'holo, bakawunkowhomela patjileyanyo ipapo, kan'ompela nebatjinyi, umwe kuludli gugwe umwe kulumehwe gugwe. 34Yesu wakati, “Tate mubayetile mazwibhatigwa; ngobe abatoziba tjabanothama.”
Bagwi bengwa bakakobana zwiyambalo zwizwe ngekandila malipa. 35Banhu bakama, bakalingilila; koga batungamili bakawunseka, beti, “Wakatjidza bamwe; ngaazwitjidze, hapa ali Khirisitu, N'halugwa weNdzimu!”
36Bagwi bengwa bakawunseka bo, bakawumpa wayini inohababa, 37beti, “Hapa uli Mambo wemaJuta, uzwitjidze!”
38Kwaka kwakakwagwa pehhugwi kukwe kuyi, “Iwhoyu Ndiye Mambo WemaJuta.”
39Umwe webatjinyi waka akalembedziwa patjileyanyo wakawugongobola eti, “Awuta iye Khirisitu? Uzwitjidze, utitjidze bo!”
40Koga umwe wakawuntjemela eti, “Awutohla Ndzimu, saku wawanika nlandu bo kan'ompela naye? 41Iswi kwakatilizana; ngobe towamutjila mbhayilo wakafanila zwiyeto zwedu; koga nlume iwhoyu akuna tjaatjinya.” 42Eba eti, “Yesu, undikumbule hapa uswika mubumambo gugo.”
43Yesu wakawun'handula eti, “Lebeswa, ndoti kukuli, nasi nowhoba nami muPharadayisi.”
Tjinyika kwaYesu
(Matewu 27.45-56; Mako 15.33-41; Johane 19.28-30)
44Kwaka kwatjibe lubaka hhuba lili panhongoma#23.44 Awa yebutanhatu kubvisila hhuba labhuda, kwakaba hhalima hango yose kuswikila hhuba litewuka#23.44 Awa yehhanalume kubvisila hhuba labhuda, 45hhuba lakadzima; netjisitilo tjethempeli tjakapaluka tjikaba kabili. 46Yesu, emimila newhi lipehhugwi, wakati, “Tate, mumaboko enyu ndotula meya yangu!” Atjijalo wakafema gwebupelo.
47Nlawuli webagwi bengwa bali gulu wakati abona tjayetika, akalumbidza Ndzimu, eti, “Lebeswa, iwhoyu nlume wayesina nlandu waakalulama!”
48Banhu bose baka babuya bewholingilila, babona tjayetika bakabgwilila kumizi yabo balihhele buyendasi. 49Bose baka bezibana naYesu nebafumakadzi baka bawuntobela kubvila kuGalile bakama kulekule bakabona kose kwaka kuyetika.
Mbiganyo waYesu
(Matewu 27.57-61; Mako 15.42-47; Johane 19.38-42)
50Kwaka kuna nlume unoyi Josefa, ali umwe wemakombgwa, ali mbuya kakale akalulama, 51waka esabvumilana nenkumbulo neyeta kwabo, waka ebva kunzi wemaJuta unoyi Arimathiya akalindila bumambo gweNdzimu. 52Nlume iwhoyu wakayenda kuna Pilatu enokumbila kuti apiwe mbili waYesu. 53Wakawuntulula patjileyanyo, akawumpetelela nejila lelineni. Akanowumbiganya mukumbu tjakatshiwa muhongwe, tjisanhu tjikatongobiganyiwa nhu mutjili. 54Laka lili hhuba leBaakanyila, kotangisa sabatha.
55Bafumakadzi baka babva naye kuGalile baka tobela hule, baka bona kumbu, kose nebiganyiwa kwembili uwe; 56bakakotjibgwilila kanyi, baka baakanya mhoza nemafuta.
Bakanyaluluka muhhuba lesabatha sekunoleba nlayo.
ទើបបានជ្រើសរើសហើយ៖
Luka 23: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
