TAKADA 16
16
Timoti Biya Bulusu Nja Selasi
1Se Bulusu zo ta Darbe nja Listira, anya de nsubiya Yesu daa seni yi ma Timoti, de amaa yi ma Yawudawa nja nsu beigaskye ni Yesu, sede Adaa yi ma Helenawa na. 2Yayuwa de su ma Listira nja Ikoniya su beyi sheeda kyakyawu a kiya ke. 3Bulusu yaa bila de e la Timoti de su te a tepiya, sobon yomu e yi yaka sobon Yawudawa de su ma anya ni, guru su shina adaa ni Timoti ma Helenawa na. 4De Bulusu nja Selasi sua yi tepiya dege geri daa te geri daa, sua pala mbo de yayamanki Yesu nja toree ni Wurishelima yeda gye ntani de su biya yi. 5Se nsubiya Yesu su yi sori a siki beigaskye nja kowon nana sua jaa nyowa.
Bure ndani Bulusu A kiya Ni Nsebeki Makidoniya
6Bulusu nja nsu oboki e yi su yi tepiya a gunduma ni Pirijiya nja Galatiya, sobon Aworo nsuseki nana su beyi manki kelima a gunduma ni Asiya. 7De su zo a baki kesa ni Misiya, su yi kokori de su yuru a kesa ni Bitiniya, sede Aworo ni Yesu yeda su de su te ba. 8Se Su biya Misiya sonka ta ni Toruwas. 9A dederi ni ndani Bulusu bure e geni nseminji daa dege kesa Makidoniya sakisi yaa ologba yi nkye, <<Zo a Makidoniya de ki sua mu to.>> 10De ndani Bulusu bure, dandani mu dege nshiri ta kesa Makidoniya, de mu shina nkye Mirikisi sukwa mu de mu gye su nabari kyakyawu.
Lidiya Beyi Gaskye
11Mu yuru a kwanto dege Toruwas se mu butu ta totolo riki ni Samutaraki, Se nana ni bi mu ta Niyabolis. 12Dege anya ni mu yi tepiya ta Pilibi, a kesa ni Roma kuma ta totolo geri a gunduma ni Makidoniya. Mu zunwa anya ni ni worosu su nana. 13A nana ni asibi mu butu te akopa geri anya de biya ta totolo riki, anya ni mu pekye de mu samu anya lepa. mu zunwa a kisi namu para beta nja mata de su tala anya ni. 14Daa a siki mata de sua zi beta amu seni e yi ma Lidiya, yaa la woriki see e ma dege geri ni Tayatira, nsu bowuta ni Mirikisi. Se Obagizi bure dishiya e yi de e keleba manki de Bulusu yaa beyi. 15A beyi de Lidiya nja ntani a gizi yi su yi su tunkwasa, e mu naba a gizi yi e pala nkye. <<Nde ku yeda ni ma nsu beigaskye ni Obagizi Yesu,>> Se e sa dole nkye, <<Zo de ku zunwa a gizi na.>>.
Bulusu nja Selasi a Jaru
16Nana daa mua te anya de mwa yi lepa, mu gomu nja bunwa mase daa de e mani mungu aworo yaa pala mbode yaa zo a paru a geba. Yaa samu gyolo nyowa ba nsugizi yi de yaa pala yaruwa. 17Yaa mase mu yaa biya Bulusu nja ririgye amu yaa yi kuruwa , <<Ntani worosu mu su ma bunwa ni Mirikisi nsu girima la, worede sua gye ku turuki de kwa samu sila.>> 18E si geba ari kwanki nyowa. A karishe Bulusu ma ni sukuni ba se e juyi gyowe yaa mase ni e gye mungu aworo nkye, <<A siki seni Yesu kiristi ki butu bila yaa mase mu!>> dandani mungu aworo butu bila yi.
19Se nsu bunwa mase mu geni sadishiya samu gyolo su ripe, su ka Bulusu nja Selasi su yiri su ta a baki bije anya ni nsu shiriya. 20De su ka Bulusu nja Selasi ta anya ni anikari su pala nkye, <<Ntani woromu su ma Yawudawa na, sua rikishe geri amu 21Sua kokoyi alada de taka doka amu ni Romawa de mu keleba ko mu kokoyi ba.>>
22Se ntani su tala a kiya Bulusu nja Selasi, se anikari saga su keikei su mari su, su sa ntani dukwa su. 23A beyi de su yi Bulusu nja Selasi dukwa soseyi, se su la su kutiri a siki jaru, su ba nsu yanki jaru doka nkye su kpanku su nkyawu. 24De e keleba doka ni, e la su kutiri a siki siki jaru e domuna su seni a katakpo. 25A sisika dederi Bulusu nja Selasi sua yi lepa nja wonka ni yobo Mirikisi, worede su ma jaru nja su sua zi mbode sua yi. 26Dandani su zi kesa zizika soseyi ari kutiri laki jaru ma zizika. Dandani guru kopa ni jaru bure, serika de su domuna su nshi kunshe. 27De nsu kpanku jaru dege a kwana, e geni kopa jaru bure, e butu obalaba yi yaa bila de e kisa kiya yi sobon e ma geni kankye worede su ma jaru su la gudu. 28Sede Bulusu yi kuruwa nkye, <<Kede ki zi kiya ake suwo ba! Muma anya mu guru amu!>> 29Se nsu kpanku jaru yi sukwa de su keyi su wuta, e bise te puari a kisi a geba ni Bulusu nja Selasi yaa kakada nki. 30Se nsu kpanku jaru butu Bulusu nja Selasi zo a woze minya su nkye, <<Toree, mina Na yi de na samu sila?>> 31Su keleba nkye, <<Yeda nja Obagizi Yesu, ka samu sila e ke nja ntani gizi ake.>> 32Se su yi beta kelima ni Obagizi nja guru worosu su ntani gizi yi. 33A kwanki dederi ni nsu kpanku la su te wonkye su suwo; se dandani e shi nja guru ntani gizi yi su yi su tunkwasa. 34Nsu kpanku jaru ka yi Bulusu nja Selasi ta gizi nsu kpanku jaru e ba su mbosi; e sika nja peri siki sobon e zo yeda nja Mirikisi, e shi nja guru ntani gizi e yi.
35De anya kwa yi, anikari saka yaya ANKI e yi ta anya nsu kpanku jaru nja doka nkye: <<Ki shika Bulusu nja Selasi.>> 36Se nsu kpanku jaru gye Bulusu nja Selasi nkye mu shika ku. Kuzukam ku te selema.>>
37Sede Bulusu gye toree shoja nkye: <<Su yi mu dukwa a geba ntani su gye mu ko minana mu yi ba, kode nkye muma ntani kesa Roma na, su la mu sa siki jaru. Se kuzukam sua bila de su butu mu a boyi? Bulusu nkye ayi! Bila su de su zo nkyasu de su butu.>>
38De toree shoja gye toree kesa, de su zi nkye Bulusu nja Selasi su ma nsu Romawa, su yi womba, 39Se su zo ba Bulusu nja Selasi ankuri; dege anya ni se su butu nsu a jaru, su ologba su de su bila geri asu. 40A beyi de Bulusu nja Selasi butu a siki jaru, su ta a gizi ni Lidiya, anyade su gomu nja yayuwa de su kara su sori guyam, Se su te ma su.
ទើបបានជ្រើសរើសហើយ៖
TAKADA 16: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
