TAKADA 11
11
Biturusu Gye Nsubiya Yesu Beta a kiya mbode paru
1Yayamanki nja yayuwa de su ma a kowon anga a siki kesa Yawudiya su zi nkye nzun worede su ma Yawudawa ba du su keleba beta Mirikisi. 2De Biturusu te a Wurishelima, worosu Yawudawa nsubiya Yesu de su sakisi alada su ni yanka su geni lepi Biturusu, 3su nkye, <<Mina sa de ki te a gizi ni worede su yi su yanka ba ari ki si mbosi nja su.>>
4Se Biturusu pala gye su guru mbode paru nkye: 5<<Ni ma a siki totolo geri ni Yopa ni ma yi lepa, se ndani na bure. Ni geni mbodaa ma sonka kankye totolo woriki dege bisi a keteri wuru, e sonka zo anya de ni ma. 6Ni kone siki yi ni geni nama nsu tepiya kisi nsu seni wuru, ni geni mesi, alankpa nja nsusuwa bisi. 7Ni zi murinya daa ma gye ni nkye, <Dege a bisi, Biturusu. Kisa de ki suku.>
8Ni keleba, <Yi, Obagizi! Mbode mani dola taba yuru a baki na ba.>
9Anya ni murinya Mirikisi keleba dege bisi yi beta nja ni jaja nkye, <Kede ki sukwa mbode Obagizi yi sere ki nkye e ma nsu dola.> 10Mbo mu paru son wuku, se su la mbo ni te a bisi.
11<<A kyakya kwanki ni ntani wuku de su saka su butu dege Keseriya su zo sakisi a baki kopa ni gizi de ni ma a siki yi. 12Aworo gye ni nkye te nja su kede puari geba ba. Yayuwa shida mu su te nja ni, ari mu yuru a gizi ni nseminji ni. 13Koneliyus gye mu guru yiride e geni meleku sakisi a gizi yi ma nkye, <Ki saka manki te a Yopa de su sukwa Sima de seni yi ma Biturusu. 14E shina yaa yi ke beta de ka samu sila e ke nja gizi ake guru.>
15De ni para yi su beta, se Aworo Nsuseki sonka a kiya su kankye de e sonka a kiya mu tun dege pari. 16Se ni turunwa ni beta Obagizi pala nkye: <Yaaya yi tunkwasa ni riki, sede oku sua yi ku tunkwasa ni Aworo Nsuseki.> 17Nde Mirikisi ba su kyawuta yiride e ba mu, worede mu sadishiya nja Obagizi Yesu Kiristi, waa ma e ni de na nana Mirikisi?>>
18De Yawudawa nsubiya Yesu su zi yomu, su lesa mbode sua pala se su yobo Mirikisi, sua nkye, <<Nzun yomu worede su shina Mirikisi ba su samu dama de sua juyi bila mbo mumungu de su samu leyi.>>
Ntani Nsu Biya Yesu A siki Antakiya
19Kuzukam nsubiya Yesu de su yi gudu yaapi a kesa bombom sobon ni takaasi ni Isitipanu worosu asu te a kesa ni Pinikiya, nja Sayipuru nja totolo geri ni Antakiya, su ma gye Yawudawa na kede manki Mirikisi. 20Sede worosu nsubiya Yesu, dege Sayipuru nja Sayiri, su te a Antakiya su ma gye Helenanshi manki du, su ma gye su nabari kyakyawu a kiya ni Obagizi Yesu. 21Obagizi ma nja su, nyowa ntani beigaskye nja juyi biya Obagizi.
22Nabari ni mbode paru Antakiya e keyi kuni ni nsubiya Yesu de su ma a Wurishelima, se su saka Barnaba te Antakiya. 23De Barnaba keyi e geni kyakyawu ni mbode Mirikisi yi su nshi, e ja su sori guyam guru asu e kwa gye su nkye su sakisi ngaskye a siki Obagizi ni dishiya asu guru. 24Barnaba e ma nse kyakyawu la, e sika ni Aworo nsuseki nja beigaskye, ntani nyowa su juyi bila mbo mumungu kuma ta anya Mirikisi.
25Se Barnaba te a Tarsu de e bilaa Shawulu, 26De Barnaba geni yi, e keyi zo a Antakiya. Su la shekera daa guru Barnaba nja Bulusu su ma gomu nja ntani nsubiya Yesu nja su kokoyi ntani nyowa. A siki ni Antakiya na su para sukwa yaya gizi Yesu kiristi.
27A kwanki ni worosu anebi su zo dege Wurishelima su ta Antakiya. 28Daa a siki asu seni e yi ma Agabus, e dege a bisi e yi beta nsori ni Aworo nkye sua yi totolo nyunwa a siki kesa nyowa a durinya. Da mu paru a kwanki solota ni Kalaudiyu la. 29Se nsu yayagizi Yesu yeda, de konse e beyi yiride e manshi, su yi showura de su sua yayuwa de sua zunwa gunduma Yawudiya nto. 30Yomu na su yi, su saka kyawuta asu te anya toree yiri nani Barnaba nja Shawulu.
ទើបបានជ្រើសរើសហើយ៖
TAKADA 11: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
